ކްލޮޕް ގަބޫލުކުރާގޮތުގައި އެޑްވާންޓޭޖް އޮތީ ރެއާލަށް

މި ސީޒަނުގެ ޔުއެފާ ޗެމްޕިއަންސް ލީގުގެ ފައިނަލަށް ލިވަރޕޫލާއި ރެއާލް މެޑްރިޑް ނިކުންނައިރު، އެޑްވާންޓޭޖް އޮތީ ރެއާލަށްކަަމަށް ލިވަރޕޫލްގެ ކޯޗު ޔާގަން ކްލޮޕް ބުނެފިއެވެ.

މި މަހުގެ 29ގައި ފައިނަލް އޮންނައިރު ދެ ޓީމުން ވެސް އަންނަނީ ވަރުގަދައަށް ތައްޔާރުވަމުންނެވެ. ދެ ޓީމު ވެސް ފައިނަލަށް ދަތުރުކޮށްފައިވަނީ ފޯރިގަދަ ސެމީ ފައިނަލް މެޗުތަކެއް ކުޅުމަށްފަހުއެވެ. ލިވަޕޫލް ފައިނަލަށް ދިޔައީ ސެމީގައި ވިލަރެއާލްގެ މައްޗަށް ކުރި ހޯދައިގެންނެވެ. އަދި ރެއާލް ފައިނަލަށް ދިޔައީ ސެމީގައި ވަރުގަދަ މެންޗެސްޓާ ސިޓީ ކަޓުވާލުމަށްފަހުއެވެ.

ސްޕެނިޝް ލަލީގާގެ ޗެމްޕިއަންކަން ރެއާލުން ވަނީ ހޯދާފައެވެ. ރެއާލުން ޗެމްޕިއަންކަން ހޯދާފައިވަނީ ލީގުގައި ބާކީ ހަތަރު މެޗު ވެސް އޮއްވައެވެ. ކްލޮޕް ގަބޫލުކުރާ ގޮތުގައި އެކަމާ ގުޅިގެން ޗެމްޕިއަންސް ލީގުގެ ފައިނަލްގެ ކުރިން ރެއާލަށް އެއްވެސް ޕްރެޝަރެއް ނޯންނާނެއެވެ.

ލިވަޕޫލުން ވަނީ ދާދި ފަހުން އެފްއޭ ކަޕްގެ ޗެމްޕިއަންކަން ހޯދާފައެވެ. އަދި އިނގިރޭސި ޕްރިމިއަރ ލީގުގެ ތަށި ހޯދުމުގެ ރޭހުގައި ލިވަރޕޫލް އަންނަނީ ވާދަކުރަމުންނެވެ. މެންޗެސްޓަރ ސިޓީއާއި ވެސްޓް ހޭމް ޔުނައިޓެޑް ކުޅުނު މެޗު އެއްވަރުވުމުން ލިވަޕޫލަށް އުންމީދެއް އެބަ އޮތެވެ. މިރޭ ސައުތެމްޓަން ބަލިކޮށް އެއް ޕޮއިންޓަށް ފަރަގު ކުޑަކުރުމުގެ ފުރުސަތު ލިވަރޕޫލަށް އެބަ އޮތެވެ. ޕްރިމިއަރ ލީގުގެ ތަށި ހޯދުމުގެ މަސައްކަތުގެ އިތުރުން ޗެމްޕިއަން ލީގުގެ ފައިނަލް ކުރިއަށް އޮތުމަކީ ކްްލޮޕް ގަބޫލުކުރާ ގޮތުގައި ފަސޭހަކަމެއް ނޫނެވެ.

ލިވަރޕޫލާއި ރެއާލް ވަނީ މީގެ ކުރިން ވެސް މުބާރާތުގެ ފައިނަލްގައި ބައްދަލުކޮށްފައެވެ. އެއީ 2018 ވަނަ އަހަރުއެވެ. އެ އަހަރުގެ ފައިނަލްގައި ލިވަރޕޫލް ބަލިކޮށް ރެއާލުން ވަނީ 13 ވަނަ ފަހަރަށް ޗެމްޕިއަންސް ލީގުގެ ތަށި އުފުލާލާފައެވެ. އެފަހަރު ލިވަރޕޫލްގެ މައްޗަށް ރެއާލުން ކުރި ހޯދާފައިވަނީ 3-1ންނެވެ.

މި އަހަރުގެ ޗެމްޕިއަންސް ލީގުގެ ފައިނަލް ކުޅޭނީ ފްރާންސްގެ ޕެރިހުގައެވެ.