ޕީޕީއެމް ތެރެއިން ޔާމީނު ނޫން ބޭފުޅަކު ވެރިކަމަށް ގެނައުމުގެ ބޮޑު ކެމްޕޭނެއް ހިންގާކަމުގެ ތުހުމަތު
17 މެއި 2022 | އަންގާރަ 07:48ޕީޕީއެމްއިން ވަކިކުރިނަމަވެސް ހުންނަވާނީ ރައީސް ޔަމީނާއެކު ކަމަށް ނަހުލާ ވިދާޅުވި
ވިލިމާލެ ކައުންސިލް މެމްބަރު ނަހުލާ އަލީ- ނަހުލާ އަލީ ޕީޕީއެމުން ވަކިކޮށްފައިވަނީ މިހިނގާ މެއި މަހުގެ ތެރޭގައި
ޕީޕީއެމް ތެރެއިން ޔާމީނު ނޫން ބޭފުޅަކު ވެރިކަމަށް ގެނައުމުގެ ބޮޑު ކެމްޕޭނެއް ހިންގާކަމުގެ ތުހުމަތު މާލޭ ސިޓީ ވިލިމާލޭ ދާއިރާގެ ކައުންސިލް މެމްބަރު ނަހުލާ އަލީ ކުރައްވައިފިއެވެ.
ނަހުލާ ރާއްޖެއެމްވީއަށް ވިދާޅުވީ، އޭނާ ޤަބޫލުކުރައްވާ ސިޔާސީ ލީޑަރަކީ ރައީސް ޔާމީނު ކަމަށާއި، ޕީޕީއެމްއިން ވަކިކުރިނަމަވެސް ހުންނަވާނީ ރައީސް ޔަމީނާއެކު ކަމަށެވެ.
ނަހުލާ ވިދާޅުވީ ރައީސް ޔާމީނު ނޫން ބޭފުޅަކު ވެރިކަމަށް ގެނައުމުގެ މަސައްކަތް ޕީޕީއެމް ތެރެއިން ބަޔަކު ގެންދަނީ ކުރަމުން ކަމަށެވެ. އެގޮތުން އެކަން ކުރަނީ ޕީޕީއެމްގައި ތިބި ރައީސް ޔާމީނާ ދެކޮޅު، އަދި ރައީސް ޔާމީން ވާދަކުރެއްވުމަށް ނޭދޭ ބަޔަކުކަމަށް ނަހުލާ ތުހުމަތުކުރެއްވިއެވެ. އޭގެ ތެރެއިން އެއް ބޭފުޅަކީ ޕީއެންސީގެ ނައިބު ރައީސް އަދި ހުޅުމާލޭ ދާއިރާގެ ކައުންސިލް މެމްބަރު އިބްރާހިމް ޝުޖާއު ކަމަށްވެސް ނަހުލާ ވިދާޅުވިއެވެ.
ނަހުލާ ވިދާޅުވާ ގޮތުގައި، ރައީސް ޔާމީނަށް ތާއީދު ކުރާ މީހުން ޕާޓީން ބޭރުކޮށް، ރައީސް ޔާމީނަށް ނިކަމެތިކަން ދިނުމަށް ބަޔަކު ޕީޕީއެމް ތެރެއިން ދަނީ މަސައްކަތް ކުރަމުންނެވެ.
ނަހުލާ އަލީ ޕީޕީއެމުން ވަކިކޮށްފައިވަނީ މިހިނގާ މެއި މަހުގެ ތެރޭގައެވެ. ޕީޕީއެމުން ބުނީ ނަހުލާ އަލީ އަދި އޭނާގެ މަންމަ އައިމިނަތު ލީލާ ޕާޓީން ވަކިކުރަން ސުލޫކީ ކޮމިޓީން ނިންމާ، އެކަން ކޮމިޓީގެ ފަރާތުން އެންގުމުން އެ ނިންމުން ތަންފީޒުކޮށް، އެ ދެމީހުންނަށް ވެސް އެކަން އަންގާފައިވާ ކަމަށެވެ.
ޕީޕީއެމްގެ ސުލޫކީ ކޮމިޓީން ނަހުލާގެ މައްސަލަ ބަލަން ފަށާފައިވަނީ ޕީޕީއެމްއާއި އެ ޕާޓީގެ ލީޑަރޝިޕް ބަދުނާމުކޮށް ނަޙުލާ ހަޤީޤަތާއި ޚިލާފު ދޮގު ވާހަކަތަކެއް ދައްކަވަމުން ގެންދަވާކަމަށް ބުނެއެވެ. މިހެން މިކަން ހާމަކޮށް އެޕާޓީގެ ފަރާތުން މިމައްސަލައިގައި ބަޔާނެއްވެސް ނެރެފައިވެއެވެ.
