އަނެއްކާވެސް ލޯތައް ހުޅުވޭނީ އަގު ނުކުރެވޭވަރުގެ ހިތާމައަކާ ކުރިމަތިވީމަބާ؟

މީގެ ހަތް މަސް ކުރިން އަޅުގަނޑުމެންގެ ތެރޭގައި ވަރަށް ބާރަށް ދެކެވުނު ވާހަކަތަކެއްގެ ހަނދާން އައުކޮށްލާނަމެވެ. ހަނދާން އައުކޮށްލަން މި އުޅެނީ ވަރަށްވެސް ހިތާމަވެރި ހާދިސާއެއްގެއެވެ. އެއީ މާލެއިން ވ. އަތޮޅަށް ދަތުރުކުރި ލޯންޗެއް އޮޅުވެލި ކައިރިން ދިޔަވި ޙާދިސާއެއް ހިނގައި، މަންމައަކު މަރުވެ، އޭނާގެ ހަތް އަހަރުގެ ދަރިފުޅު މާކަނޑަށް ގެއްލުނު ހާދިސާއެވެ. އަދިވެސް ހަމަ މިފަދަ ހާދިސާއަކަށް ބަލާލާނަމެވެ. އެއީ ހދ. ނޮޅިވަރަންފަރުން ފުރައިގެން ހދ. ހަނިމާދޫއަށް ދަތުރުކުރި ކުޑަ ލޯންޗެއް ބަންޑުންޖަހާލި ހާދިސާގައި އެއް އާއިލާއަކަށް ނިސްބަތްވާ 4 މީހަކާއި އިތުރު މީހަކު ނިޔާވި ހާދިސާއެވެ.

މި ދެ ހާދިސާވެސް ހިނގާފައިވަނީ ވަރަށް މޫސުން ގޯސް ދުވަސްވަރެއްގައެވެ. ދަތުރުކުރާ ފަރާތްތަކުން މޫސުމަށް ސަމާލުވުމަށާއި، ދަތުރުކުރާއިރު ސަލާމަތީ ކަންކަމަށް ސަމާލުވުމަށް ކަމާބެހޭ ފަރާތްތަކުން އިލްތިމާސްކޮށްފައި އޮއްވައެވެ. ލައިފް ޖެކެޓް އެޅުންފަދަ ސަލާމަތީ އެއްވެސް ފިޔަވަޅެއް ނާޅައެވެ. މިއިން އެއްވެސް ކަމަކަށް ސަމާލުނުވެ ފެށި މި ދަތުރުތަކުގެ ނަތީޖާއަކަށްވީ އެތައް ފުރާނައެއް މި ދުނިޔެ ދޫކޮށް ދިޔުމެވެ. އެ އާއިލާތަކަށް އެ ލިބުނު ހިތާމައާއި ހިތްދަތިކަމަކީ މުޅި އުމުރަށްވެސް އެމީހުންނާއެކު ވާނެ ހިތްދަތިކަމެއްކަން ޔަގީނެވެ.

މި ދެ ހިތާމަވެރި ހާދިސާގެ ހަނދާން އައުކޮށްލަން މި ނިންމީ މި ދުވަސްވަރަކީވެސް ވަރަށް މޫސުން ގޯސް ދުވަސްވަރަކަށް ވުމާއެކުއެވެ. ކޮންމެ ދުވަހަކުވެސް ރާއްޖޭގެ އެކި ހިސާބުތަކަށް އެކި އެލާޓްތައް ނެރެމުންދާއިރު ކިތަންމެ ކަނޑު ގަދަ ވީނަމަވެސް މޫސުމަށް ނުބަލާ ދަތުރުތައް ފަށާ މީހުން އަދިވެސް މަދެއް ނޫނެވެ. މިގޮތަށް ދަތުރުތައް ކުރާއިރުވެސް އަދިވެސް ފާހަގަވާ އެއްކަމަކީ ލައިފް ޖެކެޓް ނާޅާ ކަމެވެ. ރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާ ބެހޭ ގަވާއިދަށް ދެވަނަ އިސްލާހު ގެނެސް، މޫސުމީ ސަމާލު ނެރެފައިވާ ސަރަޙައްދެއްގައި ދަތުރުކުރާނަމަ ލައިފް ޖެކެޓް އަޅަން މިހާރު ވަނީ މަޖުބޫރު ކޮށްފައެވެ. އެހެންނަމަވެސް މިކަން އަދިވެސް މިގޮތަކަށް ނުހިނގައެވެ.

އަނެއްކާވެސް އެހެން ކަމެއްގެ ހަނދާން އައުކޮށްލާނަމެވެ. ސިނަމާލެ ބްރިޖް ހުޅުވި ހިސާބުން މާލެ ސަރަހައްދުގައި ހިނގާ އެކްސިޑެންޓުތައް ގިނަވެގެން ދިޔައެވެ. އެކްސިޑެންޓުތަކުގައި ބޮޑެތި އަނިޔާތައް ލިބުނެވެ. އެހާ ހިސާބުން ސިނަމާލެ ބްރިޖާއި، ހައިވޭއިން ދަތުރުކުރާއިރު ހެލްމެޓު އަޅަން މަޖުބޫރުކުރިއެވެ. އެހެންނަމަވެސް މިކަންވެސް އެންމެ ފުރަތަމަ ވީ އުނދަގޫ ކަމަކަށެވެ. އެހެންނަމަވެސް މިގޮތަށް އަމަލުކުރަމުންގޮސް އޭގެ އަސްލު ރައްކާތެރިކަން އެނގިގެންދިޔަ ހިސާބުން މިހާރު މިކަން މިވަނީ ގިނަ ބަޔަކު ޚާއްސަ ސަމާލުކަމެއް ދީގެން ކުރާ ކަމަކަށް ވެފައެވެ.

ކަނޑުމަގުން ދަތުރުކުރާއިރު ލައިފް ޖެކެޓް އެޅުމަށްވެސް މިވަނީ ހަމަ މިހެން ކަމަށް ވެދާނެއެވެ. ހަގީގަތުގައި ލައިފް ޖެކެޓް އަޅައިގެން ތިބުމަކީ ހާދިސާއެއް ހިނގާ ދަނޑިވަޅުގައި އެތައް ބައެއްގެ ފުރާނަ ސަލާމަތްކުރެވިގެންދާނެ ކަމެކެވެ. ދަތުރު ފެށުމުގެ ކުރިން ދަތުރުކުރާ އެންމެންގެ ގައިގައި ލައިފްޖެކެޓް އެޅުވުމަކީ ލޯންޗުގެ ފަޅުވެރިންގެ ޒިންމާއެކެވެ. އެމީހުން އެކަން ނުކޮށްފިނަމަ ދަތުރުކުރާ މީހުން އެމީހުންނަށް އެކަން ހަނދާން ކޮށްދޭން ޖެހެއެވެ. ހަމަގައިމުވެސް ގެއްލިގެންދާ ފުރާނައަކީ އަނބުރާ ގެނެވޭނެ އެއްޗެއް ނޫނެވެ. އަގު ނުކުރެވޭ ވަރުގެ ހިތާމައަކާ ކުރިމަތިނުވަނީސް އަހަރުމެން އެންމެންގެ ލޯތައް މިވަނީ ހުޅުވަން ޖެހިފައެވެ.