ސިއްޙީ ދާއިރާގެ ޓެކްނިކަލް ވަޒީފާތަކަށް ނިކުންނަ މީހުން މަދު: އައިޖީއެމްއެޗް

ސިއްޙީ ދާއިރާގެ ޓެކްނިކަލް ވަޒީފާތަކަށް ނިކުންނަ މީހުން މަދުކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނެފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އައިޖީއެމްއެޗްގެ ކޮންސަލްޓެންޓް ސަބް ސްޕެޝަލިސްޓް އިން ކާޑިއޮލޮޖީ ޑރ. މުހައްމަދު ޝަނީޒް ނަޖްމީ ވިދާޅުވީ ސިއްޙީ ދާއިރާއަށް ބޭނުންވާ މުވައްޒަފުންގެ ތެރޭގައި ހިމެނެނީ ހަމައެކަނި ޑޮކްޓަރުންނާއި ނަރުހުން ނޫން ކަމުގައެވެ. މިއީ ޓެކްނިކަލް ވަޒީފާތައްވެސް ހުންނަ ދާއިރާއެއް ކަމަށް ޑރ. ޝަނީޒް ވިދާޅުވިއެވެ.

އެހެންނަމަވެސް ސިއްޙީ ދާއިރާއަށް ބޭނުންވާ ޓެކްނީޝަނުން ރާއްޖެއިން ހޯދުމަށް ދަތިވާކަމަށް ޑރ. ޝަނީޒް ވިދާޅުވިއެވެ. އަދި ސިއްޙީ ދާއިރާއަށް ނިކުންނަ ގިނަ މީހުންނަކީ ޑޮކްޓަރެއް ނުވަތަ ނަރުހެއްގެ ވަޒީފާއަށް ނިކުންނަ މީހުން ކަމަށް އޭނާ ވިދާޅުވިއެވެ.

މިދެމެދުގައި ވަރަށް ގިނަ ވަޒީފާތައް ހުންނަ ކަމަށާއި، އެހެންނަމަވެސް އެ ވަޒީފާތަކަށް ހޭލުންތެރި ނުވާކަމަށްވެސް ޑރ. ޝަނީޒް ފާހަގަކުރެއްވިއެވެ. ޓެކްނީޝަނުންގެ މި ވަޒީފާތަކުގައި ރާއްޖޭގައި މުޅިންހެން އުޅެނީ ބިދޭސީ މީހުން ކަމުގައި އޭނާ ވިދާޅުވިއެވެ.

އައިޖީއެމްއެޗުން ވަނީ އެކި ބަލިތަކަށް ޚާއްސަ ޑޮކްޓަރުން އަތޮޅުތެރޭގެ ރީޖަނަލް ހޮސްޕިޓަލުތަކަށް ފޮނުވުމުގެ ޕްރޮގްރާމެއް ފަށަން ނިންމާފައެވެ. މި ޕްރޮގްރާމަކީ މާލެ ނައިސް އަތޮޅުތެރެއިން އެކި ބަލިތަކަށް ފަރުވާ ލިބޭނެ އިންތިޒާމު ހަމަޖެއްސުމަށް ފަށަން ނިންމާފައިވާ މަސައްކަތެކެވެ. އެގޮތުން ދޭތެރެ ދޭތެރެއިން ޑޮކްޓަރުން ހޮސްޕިޓަލުތަކަށް ފޮނުވައި ބަލި މީހުންނަށް ފަރުވާ ދެވިގެންދާނެ ކަމަށް އެ ހޮސްޕިޓަލުން ބުނެއެވެ.