ނޯތު އެޓްލާންޓިކް ޓްރީޓީ އޮގަނައިޒޭޝަން (ނޭޓޯ)އާ ގުޅުމަށް ނިންމައި ސްވިޑްންއިން ވެސް އެކަން އިއުލާންކޮށްފިއެވެ.
ހޯމަދުވަހު ބޭއްވި ނިއުސް ކޮންފަރެންސްގައި އެކަން އިއުލާންކުރެއްވީ، ސްވިޑްންގެ ބޮޑުވަޒީރު މަގްޑަލީނާ އެންޑަރސަންއެވެ. ގާނޫނު ހަދާ މަޖިލީހުގައި މިކަމަށް ބަހުސްކުރުމަށްފަހު ނޭޓޯއާ ރަސްމީކޮށް ގުޅުމަށް ނިންމާފައިވާކަމަށް ބޮޑުވަޒީރު ވިދާޅުވިއެވެ.
ސްވިޑްންގައި ވެރިކަންކުރާ ޕާޓީ، ސޯޝަލް ޑިމޮކްރެޓިކް ޕާޓީން އެކަމަށް ތާއީދުކުރާކަން ހާމަކޮށްފައިވަނީ އާދީއްތަ ދުވަހުއެވެ.
އަދި ފިންލެންޑާއެކު ނޭޓޯއާ ގުޅުމަށް ހުށައަޅުއްވާނެކަމަށް ބޮޑުވަޒީރު ވިދާޅުވިއެވެ.
ފިންލޭންޑުން ރަސްމީކޮށް ނޭޓޯއާ ގުޅުމަށް ނިންމައި އެކަން އިއުލާން ކުރީ އާދީއްތަ ދުވަހުއެވެ.
ފިންލޭންޑުގެ މި ނިންމުން ރަސްމީކޮށް އިއުލާން ކުރެއްވީ، އެގައުމުގެ ބޮޑުވަޒީރު ސަންނާ މަރިންއެވެ. މި ނިންމުން އިއުލާންކުރެއްވުމަށް ބޭއްވި ނިއުސް ކޮންފަރެންސްގައި ބައިވެރިވެވަޑައިގެން ފިންލޭންޑްގެ ރައީސް ސައުލީ ނީނިސްޓޯ ވިދާޅުވީ، މިއީ ތާރީޚީ ދުވަހެއް ކަމަށާއި، މިއީ މުޅިން އައު ބާބެއްގެ ފެށުން ކަމަށެވެ.
ބޮޑުވަޒީރު ވިދާޅުވީ، މި ނިންމުމާމެދު ގާނޫނު ހަދާ މަޖިލީހުން ފުރިހަމަ ބަހުސެއްކޮށް ރަނގަޅު ނިންމުމެއް ނިންމާނެ ކަމަށެވެ. އެއަށްފަހު ރަސްމީކޮށް ނޭޓޯގައި ބައިވެރިވުމަށް ހުށައަޅާނެކަމަށް ބޮޑުވަޒީރު ވިދާޅުވިއެވެ.
ފިނިހަނގުރާމައިގެ ދުވަސްވަރުން ފެށިގެން ފިންލޭންޑާއި ސްވިޑްންއިން ގެންގުޅެމުން އައި ނިއުޓްރަލިޓީގެ ސިޔާސަތު ދޫކޮށް ނޭޓޯއާ ގުޅުން ވެގެންދާނީ ޔޫރަޕުގެ ސަލާމަތީ ކަންކަން ވަރަށް ބޮޑަށް ބަދަލުކޮށްލާނެ ކަމަކަށެވެ. ފިންލޭންޑުން އެގައުމުގެ ނިންމުން އިއުލާނުކުރުމާގުޅިގެން ރަޝިއާއިން ވަނީ، މިއީ ސީދާ އެގައުމަށް އަމާޒުކުރި ނުރައްކަލެއް ކަމަށާއި، މިނުރައްކަލާ އެގައުމުން ކުރިމަތިލާނެކަމަށް ބުނެފައެވެ.
އެގައުމުގެ ސަލާމަތަށް ނުރައްކާވާއިރު މަޑުން ނޯންނާނެކަމަށާއި، 'އަސްކަރީ ޚާއްސަ ހަރަކާތްތައް' ކުރިއަށް ގެންދާނެ ކަމަށް ރަޝިއާއިން ވަނީ ބުނެފައެވެ.
ނޭޓޯ އުފެދިގެން އައީ 1949 ވަނަ އަހަރު، 12 މެމްބަރު ގައުމާއެކުގައެވެ. މިހާރު ނޭޓޯގެ މެމްބަރު 30 ގައުމު އޮވެއެވެ.
