އީދު ބައިބަލާ ޗެލެންޖު 1443ގެ މިސްޓަރ ބައިބަލާގެ މަޤާމު ކްލަބް ޓީނޭޖްގެ އަސްލަމް ވަހީދު ކާމިޔާބުކޮށްފިއެވެ.
މިއީ އަސްލަމްއަށް މިސްޓަރ ބައިބަލާގެ މަޤާމު ލިބުނު ތިންވަނަ ފަހަރެވެ. މިއާއެކު އޭނާ ވަނީ ތިން ފަހަރަށް މިސްޓަރ ބައިބަލާގެ މަޤާމު ހޯދި ދެވަނަ ކުޅުންތެރިޔާއަށް ވެފައެވެ. މީގެ ކުރިން ތިން ފަހަރަށް މި މަޤާމު ކާމިޔާބުކޮށްފައިވަނީ މުޙައްމަދު ޝިނާން (ނާނި) އެކަންޏެވެ. މިސްޓަރ ބައިބަލާގެ މަޤާމަށް ހޮވުމާއެކު އަސްލަމްއަށް ވަނީ ޓްރޮފީއާއެކު 10،000 ރުފިޔާގެ ފައިސާގެ އިނާމެއް ދީފައެވެ.
މުބާރާތުގެ ފައިނަލް މެޗުގައި އަސްލަމް ކުޅުނު ޓީނޭޖް ބަލިވީ ކްލަބް 010 އާއި ވާދަކޮށް ގަދަ ހިފުމަކަށް ގޮސްގެންނެވެ. މުބާރާތުގެ ފެއަރ ޕްލޭ ޓިމަކަށް ހޮވުނީ ކްލަބް އީގަލްސްއެވެ.
މިސްޓަރ ބައިބަލާގެ މަޤާމް އަސްލަމް ކާމިޔާބު ކުރިއިރު، އެންމެ އުންމީދީ ކުޅުންތެރިއަކަށް ހޮވުނީ ޓީނޭޖްގެ އަލީ ވިދާދްއެވެ. މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ އީގަލްސްގެ އިބްރާހިމް ޝަމީން، ޓީސީގެ ހަސަން ތައުހީދު، ޓީނޭޖުގެ ހާމިދު ރަޝީދު އާއި އިބްރާހިމް މުހައްމަދު އަދި ކްލަބް 010 ގެ އަލީ ވިޖްހާންއެވެ.
