ތ. ކަނިމީދޫ ތަރައްގީކުރުމާ ގުޅޭގޮތުން ހޯމަ ދުވަހުގެ ޖަލްސާގައި ޓޫރިޒަމް މިނިސްޓަރާ ސުވާލުކުރަނީ
15 މެއި 2022 | އާދީއްތަ 16:35ހޯމަ ދުވަހު ކުރިއަށްދާނީ މިއަހަރުގެ ދެވަނަ ދައުރުގެ ފުރަތަމަ ޖަލްސާ
ޓޫރިޒަމް މިނިސްޓަރ ޑރ. އަބްދުﷲ މައުސޫމް
ފަތުރުވެރިކަމުގެ ބޭނުމަށް ތ. އަތޮޅު ކަނިމީދޫ ތަރައްގީކުރުމުގެ މަސައްކަތާ ގުޅޭގޮތުން ހޯމަ ދުވަހުގެ ޖަލްސާގައި ޓޫރިޒަމް މިނިސްޓަރ ޑރ. އަބްދުﷲ މައުސޫމާ ސުވާލުކުރުމަށް ތާވަލުކޮށްފިއެވެ.
ޓޫރިޒަމް މިނިސްޓަރާ ސުވާލުކުރައްވަނީ ތިމަރަފުށޫ ދާއިރާގެ މެމްބަރު އަބްދުﷲ ރިޔާޒެވެ. އެއީ ރިޒޯޓެއްގެ ގޮތުގައި ތ. ކަނިމީދޫ ތަރައްގީކުރުމަށް މިހާރު ސަރުކާރުން ގެންގުޅުއްވާ ވިސްނުންފުޅާ ގުޅޭގޮތުންނެވެ.
ހޯމަ ދުވަހުގެ ޖަލްސާއަށް ވަޑައިގެން ފަތުރުވެރިކަމުގެ ދާއިރާއާ ގުޅޭގޮތުން އެހެން މެމްބަރުން ކުރައްވަން ބޭނުންފުޅުވާ ސުވާލުތަކަށްވެސް ޖަވާބު ދެއްވާނެކަމަށް ޓޫރިޒަމް މިނިސްޓަރ ވަނީ ވިދާޅުވެފައެވެ.
ހޯމަ ދުވަހު އޮންނާނީ މިއަހަރުގެ ދެވަނަ ދައުރުގެ ފުރަތަމަ ޖަލްސާއެވެ. މި ޖަލްސާގައި މިނިސްޓަރާ ސުވާލުކުރުމުގެ އިތުރުން ބައެއް އެހެން މަސައްކަތްތައްވެސް ކުރުމަށް ވަނީ ތާވަލުކޮށްފައެވެ.
މިއަހަރުގެ ފުރަތަމަ ދައުރުގެ މަސައްކަތްތައް ނިންމައި މަޖިލިސް ޗުއްޓީއަށް ދިޔައިރު، ގާތްގަނޑަކަށް 50 އިންސައްތަ މަސައްކަތްވަނީ ނިމިފައެވެ. މި އަހަރުގެ ފުރަތަމަ ދައުރު ކުރިއަށްދިޔައީ ފެބްރުއަރީ 3 ވަނަ ދުވަހުން ފެށިގެން އެޕްރީލް 25އަށެވެ.
