ނުކުޅެދުންތެރިކަން ހުންނަ ކުދިންނަށް ޚާއްސަކޮށްގެން ބާއްވާ ކުޅިވަރު ޕްރޮގްރާމް ފަަށައިފިއެވެ.
ސްޕެޝަލް އޮލިމްޕިކްސް މޯލްޑިވްސްގެ ފަރާތުން ކުރިއަށްގެންދާ މި ޕްރޮގްރާމްގެ މަގުސަދަކީ އެއްވެސް ކުއްޖެއް ނުވަތަ މީހެއް ތަފާތުނުކޮށް، ނުކުޅެދުންތެރިކަން ހުންނަ ފަރާތްތަކަށް ކުޅިވަރުގެ ތެރެއިން ފުރުސަތު ހޯދައިދިނުން ކަމަށް ޔޫތު މިނިސްޓަރު އަޙުމަދު މަޙްލޫފް ވިދާޅުވިއެވެ.
އާޓިފިޝަލް ބީޗު ސަރަހައްދުގައި ކުރިއަށްދާ މި ކުޅިވަރު ޕްރޮގްރާމުގައި ހިމެނޭ ކުޅިވަރުތަކަކީ ބެޓްމިންޓަން ފުޓުބޯޅަ އަދި ދުވުމުގެ އިތުރުން ސްވިމިންއެވެ. މީގެ ތެރެއިން ސްވިމިން އިއްޔެ ފަށާފައިވާއިރު، މިނިސްޓަރު ވަނީ މި ޕްރޮގްރާމުގައި ވީހާ ވެސް ގިނަ ކުދިން ބައިވެރިކުރުމަށް އެދިފައެެވެ. މި ކުޅިވަރު ޕްރޮގްރާމް ކުރިއަށްދާ ގޮތް ބައްލަވާލެއްވުމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙުމަދު ވަނީ އިއްޔެ އެ ސަރަހައްދަށް ވަޑައިގެންފައެވެ.
މިކަމާ ގުޅިގެން މިނިސްޓަރު މަޙްލޫފް މިއަދު ކުރެއްވި ޓުވީޓެއްގައި ވަނީ ސްޕެޝަލް އޮލިމްޕިކްސް މޯލްޑިވްސްގެ ފަރާތުން ކުރާ ބުރަ މަސައްކަތަށް ޝުކުރު އަދާކުރައްވާފައެވެ. އަދި މި ކަހަލަ ޕްރޮގްރާމްތަކުގައި ސަރުކާރު ހިއްސާވާ ކުންފުނިތަކާއި އަމިއްލަ ކުންފުނިތަުގެ އެހީތެރިކަން ބޭނުންވާ ކަމަށް ވެސް މިނިސްޓަރު ވަނީ ވިދާޅުވެފައެވެ.
މީގެ އިތުރުން މިނިސްޓަރު ވަނީ އެ މަސައްކަތް ކުރިއަށް ގެންދިޔުމުގައި ރައީސުލްޖުމްހޫރިއްޔާގެ އަނބިކަނބަލުން ދެއްވާ އެއްބާރުލެއްވުމާއި ސަމާލުކަމަށް ވެސް ޝުކުރު އަދާކުރައްވާފައެވެ.
