ރޭގެ މެޗުގައި ވާނާ ނުފެނުނު ސަބަބު ޓުޗެލް ސާފުކޮށްދީފި

އިނގިރޭސި އެފްއޭ ކަޕްގެ ފައިނަލްގައި ރޭ ލިވަޕޫލް އަތުން ބަލިވި މެޗުގައި ޗެލްސީއަށް ކުޅެމުން އަންނަ ޖަރުމަނުގެ ފޯވާޑް ޓީމޯ ވާނާ ނުފެނުނު ސަބަބު އެ ޓީމުގެ ކޯޗު ތޯމަސް ޓުޗެލް ސާފުކޮށްދީފިއެވެ.

ރޭގެ މެޗުގައި ލިވަޕޫލް އަތުން ޗެލްސީ ބަލިވެފައިވަނީ ޕެނަލްޓީ ޝޫޓްއައުޓްގައެވެ. ސެޒާ އަޒްޕިލިކުއޭޓާއާއި މޭސަން މައުންޓުގެ ޕެނަލްޓީ ނާކާމިޔާބުވެ ޗެލްސީ ބަލިވީ 6-5 ންނެވެ.

މެޗު ފެށިއިރު ވާނާ ބެންޗުގައި ހިމަނާފައި ވީ ނަމަވެސް، ގިނަ ބަޔަކު ގަބޫލުކުރީ ރޭގެ މެޗުގައި އޭނާ ފެންނާނެކަމަށެވެ. އަދި މި ސީޒަންގައި ޗެލްސީގައި މޮޅު ކުޅުމެއް ދައްކަމުން އައި ކައި ހަވާޓޭޒް ރޭގެ މެޗަށް އެކުލަވާލި ޓީމުގައި ވެސް ހިމެނިފައެއް ނުވެއެވެ.

ރޭގެ މެޗުގައި ވާނާ ބޭނުން ނުކުރީ ކީއްވެގެންތޯ ގިނަ ބަޔަކު ސުވާލު ކުރަމުން ދަނިކޮށް، ޓުޗެލް ވަނީ އެކަން ސާފުކޮށްދީފައެވެ. ޓުޗެލް ހާމާކުރި ގޮތުގައި ވާނާ ބޭނުން ކޮށްފައިނުވަނީ މެޗުގެ ކުރިން ކުރިއަށް ދިޔަ ވޯމްއަޕްގައި އޭނާއަށް ލިބުނު އަނިޔާއަކާ ގުޅިގެންނެވެ.

މީގެ އިތުރުން ޓުޗެލް ބުނީ މެޗަށް އެކުލަވާލި ޓީމުގައި ހަވާޓެޒް ހިމަނާފައިނުވަނީ އޭނާގެ ހޭމްސްޓްރިންގަށް ލިބުނު އަނިޔާއެއްގެ ސަބަބުން ކުރީ ދުވަހުގެ ފަރިތަކުރުންތަކުގައި ބައިވެރުވެފައިނުވާތީ ކަމުގައެވެ. އަދި އަނިޔާގައި ހުރެ ފަރިތަކުރުންތަކުގައި ބައިވެރިވެއްޖެ ނަމަ، އިތުރަށް އަނިޔާއެއް ލިބިދާނެކަމުގެ ބިރު އޮތް ކަމަށް ވެސް ޓުޗެލް ބުންޏެވެ. އަދި އިތުރު ޓެސްޓު ހެދުމަށް ފަހު މެޗު އޮތް ދުވަހުގެ ހެނދުނަށް ނަތީޖާއަށް މަޑުކުރިކަމަށާއި، އެއަށްފަހު ވެސް ހަވާޓޭޒަށް ކުޅެވޭނެ ހާލަތެއް ނުފެނުނު ކަމަށް ޓުޗެލް ބުންޏެވެ.