ޗެއާޕާސަން ހޮވުމަށް ބޭއްވި އިންތިޚާބުގައި މެމްބަރުން ބުނެދޭން ބޭނުންވި ވާހަކަ ވަރަށް ސާފުކޮށް ބުނެދީފިކަމަށް ޗެއާޕާސަންކަމުގެ މަޤާމު ކާމިޔާބުކުރެއްވި އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.

ވާދަވެރި ކެމްޕެއިނަކަށްފަހު 7000ށް ވުރެ ގިނަ ވޯޓުގެ ތަފާތަކުން މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ (އިންތި)އާ ވާދަކުރައްވާ ފައްޔާޒު ވަނީ ޗެއާޕާސަންގެ މަޤާމު ކާމިޔާބު ކުރައްވާފައެވެ. އިންތިޚާބު ކާމިޔާބުކުރެއްވުމަށްފަހު އިންތިޚާބުގެ ކާމިޔާބީ ފާހަގަކުރެއްވުމަށް ޖަގަހައަށް ވަޑައިގެން ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުން ފައްޔާޒު ވިދާޅުވީ ޕާޓީ އިތުރަށް ހަރުދަނާކުރުމުގެ މަސައްކަތްކުރައްވާނެކަމަށެވެ. އިންތިޚާބަށް ފައްޔާޒުގެ ޓީމުން ނުފޫޒު ފޯރުވާކަމަށް އިންތިގެ ޓީމުން ކުރާ ތުހުމަތުތަކާއި ގުޅޭގޮތުން ކުރެވުނު ސުވާލަށް ޖަވާބު ދެއްވަމުން ފައްޔާޒު ވިދާޅުވީ ސަރުކާރުގައި އުޅޭ މީހަކަށްވާތީވި އޮންނަ ނުފޫޒެއް އޮންނާނެކަމަށެވެ.

އިންތިޚާބާ ގުޅޭގޮތުން ޝަކުވާއެއް އޮތްނަމަ އެކަމެއް އޮންނަ އުސޫލުގެ ތެރެއިން ބެލިގެންދާނެކަމަށް ފައްޔާޒު ވިދާޅުވިއެވެ. އިންތިޚާބަށް ނުފޫޒުން ފޯރުވުމުގެ ގޮތުން ކެމްޕެއިން ޓީމުން ކަންތައްތަކެއް ކޮށްފައިނުވާނެ ކަމަށް ފައްޔާޒު ވިދާޅުވިއެވެ. ނަމަވެސް ވަކިވަކި ފަރުދުންގެ ހިސާބުން ކަންތައްތަކެއް ހިނގާފައި ހުރެދާނެކަމަށާއި އެފަދަ ކަންކަން އިންތިއަށް ތާއީދުކުރެއްވި ފަރާތްތަކުންވެސް ކޮށްފައިވާކަން ފާހަގަވެފައިވާކަމަށެވެ. އެކަންކަން ބެލޭނެ އިންތިޒާމު ޕާޓީގެ ތެރޭގައި ހަމަޖެހިފައިވާކަމަށް ފައްޔާޒު ވިދާޅުވިއެވެ.

އިންތިޚާބުގެ ނަތީޖާއިން މެމްބަރުން ބުނެދިން ވާހަކައަކީ ޕާޓީ ހިންގަން ބޭނުންވަނީ މިހާރު އޮތް ސަރުކާރާއެކުގައި ކަމަށް ފައްޔާޒު ވިދާޅުވިއެވެ. އަދި ކުރިޔަށް އޮތް 2023 ވަނަ އަހަރުގެ ރިޔާސީ އިންތިޚާބުވެސް އެމްޑީޕީން ކާމިޔާބުކުރަން ބޭނުންވާކަން މެމްބަރުން ބުނެދީފިކަމަށް ފައްޔާޒު ވިދާޅުވިއެވެ.

ފައްޔާޒު ވިދާޅުވީ މިކާމިޔާބީން އެންމެ ބޮޑަށް ދޭހަވީ އެމްޑީޕީގެ މެމްބަރުން ސަރުކާރާ ދޭތެރޭ ހިތްހަމަޖެހޭކަން ކަމަށެވެ. އަދި ރައީސް ޞާލިހަށް އޮތް އިތުބާރު މިއިންތިޚާބުން ފެނިގެންގޮސްފިކަމަށާއި މިސަރުކާރު ވަރުގަދަކުރަން އާންމު މެމްބަރުން ބޭނުންވާކަން ފެނިގެންގޮސްފައިވާކަމަށް ފައްޔާޒު ވިދާޅުވިއެވެ.

ފައްޔާޒު ވިދާޅުވީ މަޤާމާ ހަވާލުވެވަޑައިގަތުމަށްފަހު އެންމެ ފުރަތަމަ ކަމެއްގެ ގޮތުގައި ކުރައްވާނީ ކުރިންވެސް ވިދާޅުވިފަދައިން އިސްލާމީ އެންމެ މަތީ މަޖިލިސް ގާއިމުކުރުންކަމަށެވެ. އަދި 2023 އާ ހިސާބަށް ދާއިރު ރައްޔިތުން ބޭނުންވާ ކަންކަމާމެދު މަޝްވަރާކުރެވި މެމްބަރުންގެ ފަރާތުން މަޝްވަރާ ހޯދައިގެން އިންތިޚާބުގެ ކަންކަން ކުރިޔަށް ގެންދަވާނެކަމަށް ފައްޔާޒު ވިދާޅުވިއެވެ.

ފައްޔާޒު ވިދާޅުވީ ރިޔާސީ އިންތިޚާބަށް ނިކުންނަވާ ބޭފުޅަކު ކަނޑައަޅާނެ ގޮތެއް ނިންމާނީ ޕާޓީގެ އެކި ގުނަވަންތަކުންކަމަށެވެ.

ރިޔާސީ އިންތިޚާބު ބާއްވާނަމަ އެމްޑީޕީގެ ޓިކެޓް ހޯދުމަށް ޕްރައިމަރީގައި ވާދަކުރައްވާނެކަން ރައީސް ނަޝީދު ވަނީ އިއުލާން ކުރައްވާފައެވެ.

ވެރިކަމުގެ ނިޒާމާ ގުޅޭގޮތުން ބަދަލުތަކެއް ގެނައުމަށާއި ރިޔާސީ ނިޒާމު ކާމިޔާބުކުރެވޭ ގޮތް ބަދަލުކުރުމަށް 30 އިންސައްތަ ވޯޓުން ރައީސް ކަމަށް އާދެވޭ ގޮތަށް ހަދަން ރައީސް ނަޝީދު ބޭނުންފުޅުވެއެވެ.

އޮގަސްޓްމަހުގެ ތެރޭގައި އެމްޑީޕީގެ ކޮންގްރެސް ބާއްވަން ތާވަލުކޮށްފައިވާއިރު ޤާނޫނުއަސާސީއަށް ބަދަލު ގެންނަން ރައީސް ނަޝީދު ހުށަހަޅުއްވާ ހުށަހެޅުންތަކާމެދު ގޮތެއް ނިންމަން އަހާނީ އެ ކޮންގްރެސްގައެވެ.

ދެވަނަ 'އުކުޅަސް ކޮންގްރެސް'ގެ ރިޔާސަތު ބަލަހައްޓަވަން ޖެހޭނީ އަލަށް އިންތިޚާބު ކުރާ ޗެއާޕާސަނެވެ. ޗެއާޕާސަން އިންތިޚާބު ވާދަވެރިވެގެންދިޔަ މައިގަނޑު ސަބަބަކީ އެޔެވެ.