އިންތިޚާބުން ހާމަވީ ޕާޓީ އުފެދުނު މަޤްސަދާ އެއްގޮތަށް ޕާޓީގެ މެމްބަރުން ތިބިކަން: ރޮޒައިނާ
ރޮޒައިނާ ވަނީ ޕާޓީގެ އެންމެން ގުޅިގެން މަސައްކަތް ކުރުމަށް އެދިވަޑައިގެންފައި
އެމްޑީޕީގެ އަންހެނުންގެ ރޫހުގެ ރައީސްއަކަށް އަލަށް އިންތިޚާބުވެވަޑައިގެންނެވި ރޮޒައިނާ އާދަމް ނޫސްވެރިންގެ ސުވާލުތަކަށް ޖަވާބުދެއްވަނީ
ހޮނިހިރު ދުވަހު ބޭއްވި އެމްޑީޕީގެ އެތެރޭގެ އިންތިޚާބުން ހާމަވީ އެ ޕާޓީގެ އާއްމު މެމްބަރުން ތިބީ ޕާޓީ އުފެދުނު މަޤްސަދާ އެއްގޮތައްކަން ކަމުގައި އެ ޕާޓީގެ އަންހެނުންގެ ރޫހުގެ ރައީސްއަކަށް އަލަށް އިންތިޚާބުވެވަޑައިގެންނެވި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
އިންތިޚާބުގައި ލިބިވަޑައިގެންނެވި ކާމިޔާބީއާ ގުޅޭ ގޮތުން ނޫސްވެރިންގެ ސުވާލުތަކަށް ޖަވާބުދެއްވަމުން ރޮޒައިނާ ވިދާޅުވީ، އެމްޑީޕީ ބަދަލުވަމުން އަންނަކަން އިންތިޚާބުން އެނގޭ ކަމަށެވެ. އެމްޑީޕީއަކީ ޑިމޮކްރެޓިކް އުސޫލުތަކަށް ލޯބިކުރާ ޕާޓީއެއް ކަމަށާއި އިންތިޚާބުގެ ނަތީޖާއާއެކު އާއްމު މެމްބަރުން ދީފައިވަނީ ވަރަށް ބޮޑު މެސެޖެއް ކަމަށް ވެސް ރޮޒައިނާ ވިދާޅުވިއެވެ.
ރޮޒައިނާ ވަނީ އެ މެސެޖު އަޑުއައްސަވައި އޭނާއާއެކު އިންތިޚާބުގައި ވާދަ ކުރެއްވި ހުރިހާ މެމްބަރުން ގުޅިގެން ޕާޓީ ހިންގަން މަސައްކަތް ކުރުމަށް އެދިވަޑައިގެންފައެވެ.
ރޮޒައިނާ ވިދާޅުވީ އެމްޑީޕީއަކީ އައު މެމްބަރުންނަށް އަބަދުވެސް އުފަލާއެކު މަރުހަބާ ކިޔާ ޕާޓީއެއް ކަމަށާއި އެކަން އެގޮތުގައި ބާއްވަވާނެ ކަމަށެވެ. އަދި އިންތިޚާބުގައި ވެސް އެކަން ހާމަވެގެން ގޮސްފައިވާ ކަމަށް އޭނާ ވިދާޅުވިއެވެ.
މީގެ އިތުރުން 2023ގެ ރިޔާސީ އިންތިޚާބު އެއްބުރުން ކާމިޔާބު ކުރުމަށް ޕާޓީއަށް މެމްބަރުން އިތުރުކުރުމުގެ މަސައްކަތް ކުރަން ޖެހޭ ކަމަށާއި އެކަން ކުރެވޭނީ އެހެން ޕާޓީތަކުން ވެސް އެމްޑީޕީއަށް އަންނަ މެމްބަރުންނަށް މަރުޙަބާ ކިޔައިގެން ކަމަށް އޭނާ ވިދާޅުވިއެވެ.
ރޮޒައިނާ މިހެން ވިދާޅުވީ އިންތިޚާބުގެ ކެމްޕޭނުގެ ތެރޭގައި ޗެއާޕާސަންގެ މަޤާމަށް ކުރިމަތިލައްވައި އަދި މިހާރު އިންތިޚާބުވެވަޑައިގެންފައިވާ އިިކޮނޮމިކް މިނިސްޓަރު ފައްޔާޒު އިސްމާއިލްއަކީ އެހެން ޕާޓީއަކުން އެމްޑީޕީއާ ގުޅިވަޑައިގެން މެމްބަރެއް ކަމަށް ބުނެ ވާހަކަތައް ދެކެވިފައިވާތީއެވެ.
ރޮޒައިނާ ވަނީ އިންތިޚާބުގެ ނަތީޖާ ކޮންމެ ގޮތަކަށް އައި ނަމަވެސް ޕާޓީގެ އެންމެން ގުޅިގެން 2023 ގެ ރިޔާސީ އިންތިޚާބު ކާމިޔާބު ކުރުމަށާއި 2024ވަނަ އަހަރު ބާއްވާ މަޖިލިސް އިންތިޚާބުގައި އަންހެނުންގެ ރޯލު އިތުރު ކުރުމަށް މަސައްކަތް ކުރުމަށް ވެސް އެދިވަޑައިގެންފައެވެ. އަދި ޕާޓީ "ހިންގާލާނެ" ކަމުގެ ޔަޤީންކަން ވެސް ރޮޒައިނާ ދެއްވިއެވެ.
