ޚިޔާލުތަފާތުވުންތަކާއި ވާދަވެރިކަން އުފެދިފައިވީނަމަވެސް، އެމްޑީޕީގެ ރައީސް، ރައީސް މުހައްމަދު ނަޝީދު އާއެކު މަސައްކަތްކުރެވޭނެކަމާމެދު ކުޑަކޮށްވެސް ޝައްކުނުކުރައްވާކަމަށް އެމްޑީޕީގެ ޗެއާޕާސަން އިންތިޚާބު ކާމިޔާބުކުރެއްވި އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ވާދަވެރި ކެމްޕެއިނަކަށްފަހު 7000ށް ވުރެ ގިނަ ވޯޓުގެ ތަފާތަކުން މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)އާ ވާދަކުރައްވާ ފައްޔާޒު ވަނީ ޗެއާޕާސަންގެ މަޤާމު ކާމިޔާބު ކުރައްވާފައެވެ. އިންތިޚާބުގައި ޗެއާޕާސަން ކަމަށް ވާދަކުރެއްވީ އެމްޑީޕީގައި މިހާރު އުފެދިފައިވާ ދެ ފެކްޝަނުންނެވެ. އެހެންކަމުން ކެމްޕެއިންގެ ތެރޭގައި ފެނިގެންދިޔައީ ވާދަވެރިކޮށް ދެ ފަރާތަށް ބަހުގެ ހަމަލާތައް ދެމުންދިޔަ ތަނެވެ.
އެމްޑީޕީގެ 17 އަހަރުގެ ތާރީޚުގައި ބޭއްވި އެންމެ ވާދަވެރި އެއް އިންތިޚާބު ކާމިޔާބުކުރެއްވުމަށްފަހު، އިންތިޚާބުގެ ކާމިޔާބީ ފާހަގަކުރެއްވުމަށް ޖަގަހައަށް ވަޑައިގެން ނޫސްވެރިންނާ ބައްދަލުކުރައްވާ ވާހަކަފުޅުދައްކަވަމުން ފައްޔާޒު ވިދާޅުވީ މަސައްކަތްކުރައްވާނީ ޕާޓީ އިތުރަށް ހަރުދަނާކުރެއްވުމަށް ކަމަށެވެ. ޕާޓީގެ އެންމެ އިސް ލީޑަރު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ޕާޓީގެ ރައީސް، ރައީސް މުހައްމަދު ނަޝީދާއެކު ޕާޓީގެ އިދާރީ ކަންކަން މިހާރަށްވުރެ ހަރުދަނާކޮށް، ޕާޓީގެ ޙަރަކާތްތައް މުޅި ރާއްޖޭގައި ހިންގޭނެ ގޮތަކަށް ކަންކަން އިންތިޒާމުވެ ތަންފީޒުކުރުމަށް އިސްކަމެއްދެއްވާނެކަމަށް ފައްޔާޒު ވިދާޅުވިއެވެ. އަދި މަޤާމާ ހަވާލުވެވަޑައިގަންނަވާ ދުވަހުން ފެށިގެން އެމަސައްކަތް ކުރަން ފައްޓަވާނެކަމަށް ފައްޔާޒު ވިދާޅުވިއެވެ.
ކެމްޕެއިން ތެރޭގައި ރައީސް ނަޝީދުގެ ފަރާތްޕުޅުން ބޮޑެތި ތުހުމަތުތަކެއް ފައްޔާޒަށް އަމާޒުކުރައްވާފައިވާއިރު، ރައީސް ނަޝީދާއެކު މަސައްކަތްކުރެއްވުމަށް ފަސޭހަވާނެތޯ ނޫސްވެރިއަކު ސުވާލުކުރުމުން ފައްޔާޒު ވިދާޅުވީ ރައީސް ނަޝީދާއެކު މަސައްކަތްކުރަން ވަރަށް ފަސޭހަކަމަށާއި ޒާތީ އެއްވެސް ކަމެއް ނޯންނާނެކަމަށެވެ. ޕާޓީ ހިންގާލުމަށް އިންތި އާއި އިންތިގެ ޓީމާއެކު މަސައްކަތްކުރެވޭނެކަމަށްވެސް ފައްޔާޒު ވިދާޅުވިއެވެ.
ދެން ރައީސް ނަޝީދާއެކު އަޅުގަނޑަށް ވަރަށް ފަސޭހަ މަސައްކަތްކުރާ ހިތްވާ ބޭފުޅެއް ރައީސް ނަޝިދަކީ. އަޅުގަނޑަކީ ސިޔާސީ މީހެއް. އަޅުގަނޑުގެ އެއްވެސް ޕާސަނަލް ކަމެއް ނޯންނާނެ. އަޅުގަނޑު ދެކެނީ ހަމަ ރައީސް ނަޝީދަކީވެސް އެކަހަލަ ބޭފުޅެއް ގޮތަށް. ސިޔާސީ ގޮތުން ކުރައްވަންޖެހޭ ކަންކަން ރައީސް ނަޝީދު ކުރައްވާނެ. އެކަމަކު ހީވަނީ ހަމަ ވަރަށް ރަނގަޅު މަސައްކަތެއް މިޕާޓީގައި އިންތިއާއެކު އިންތިގެ ޓީމައެކު ކުރެވޭނެ ހެން. އަޅުގަނޑުގެ އަތް ވަނީ ހަމަ ހުޅުވިފައި އެބޭފުޅުންނާއެކު މިޕާޓީ ހިންގާލުމަށް.ފައްޔާޒު އިސްމާއީލް/ އިންތިޚާބީ ޗެއާޕާސަން
ކެމްޕެއިން ތެރޭގައި އުފެދިގެން ދިޔަ ވާދަވެރިކަމާއެކު ކުރިޔަށް އޮތްތަނުގައި ޕާޓީ އެކަތިގަނޑެއްގެ ގޮތުގައި މަސައްކަތްކުރާނެތޯ ކުރެވުނު ސުވާލަށް ޖަވާބު ދެއްވަމުން ފައްޔާޒު ވިދާޅުވީ ކުރިންވެސް އެމްޑީޕީގެ ތެރޭގައި ހަމަމިހާ ވަރުގަދަ އިންތިޚާބުތައް ކުރިޔަށް ގޮސްފައި އެބަހުރި ކަމަށެވެ. މިހާރުގެ ތަފާތަކީ ސޯޝަލް މީޑިޔާ ފުޅާކޮށް އޮތުމުން ފާޅުކަން ބޮޑުގޮތެއްގައި އެވާހަކަތައް ދެކެވުންކަމަށް ފައްޔާޒު ވިދާޅުވިއެވެ.
އެމްޑީޕީ ދެފަޅިވެގެން ހިނގައިދާނެކަމަށް ކުޑަކޮށްވެސް ޝައްކުނުކުރައްވާކަމަށް ފައްޔާޒު ވިދާޅުވިއެވެ. ސިޔާސީ ގޮތުން ހިންގާ ކެމްޕެއިނެއްގެ ތެރޭގައި ދައްކާ ވާހަކަ އިންތިޚާބު ނިމި ނަތީޖާ ލިބުމުން ތަފާތުވާނެކަމަށް ފައްޔާޒު ވިދާޅުވިއެވެ.
އެހެންވީމާ މިޕާޓީގެ ހަމަގައިމުވެސް އަޅުގަނޑުގެ ފަރާތަކުންނެއް އަޅުގަނޑާ ވާދަކުރެއްވި ފަރާތަކަށްވެސް އަޅުގަނޑާމެދު އެބޭފުޅުން ކެމްޕެއިން ތެރޭގައި ދެއްކެވި އެއްވެސް ވާހަކައަކަށް އަޅުގަނޑު ހިތްބުރަކަމެއް ނުބާއްވާނަން. އެހެންވީމާ އަޅުގަނޑާއެކު އެބޭފުޅުނަށް މަސައްކަތްކުރެއްވުމުގެ އެއްވެސް ދަތިކަމެއް ނޯންނާނެ. އަޅުގަނޑު ހަމަ އެގޮތަށް ދެކެނީ އެބޭފުޅުންވެސް މިކަން ދެކެވަޑައިގަންނަވާނެ ގޮތަކީ އެއީ ކަމަށް. އެއްވެސް ޝައްކެތް ނެތް އެއްކޮށް މަސައްކަތްކުރުމާމެދު.ފައްޔާޒު އިސްމާއީލް/ އިންތިޚާބީ ޗެއާޕާސަން
ފައްޔާޒު ވިދާޅުވީ އިންތިޚާބު ކުރިޔަށްދިޔަ ގޮތަށް ބަލާއިރު ޝަކުވާތަކެއް ހުންނާނެކަމަށް ޤަބޫލުކުރައްވާކަމަށާއި ނަމަވެސް ނަތީޖާއަށް ބަދަލު އަންނަފަދަ މައްސަލައެއް އަންނަ ވަރަށްވުރެ މާބޮޑު ތަފާތަކުން އާންމު މެމްބަރުން ވަނީ މިކަން ނިންމާފައިކަމަށެވެ.
