ކުރިޔަށް އޮތް ފަސް އަހަރަށް އެމްޑީޕީގެ ޗެއާޕާސަން ހޮވުމަށް ކުރިޔަށްގެންދިޔަ ވާދަވެރި އިންތިޚާބު 7658 ވޯޓުގެ ތަފާތަކުން އިކޮނޮމިކް މިނިސްޓަރ ފައްޔާޒު އިސްމާއީލް ކާމިޔާބުކުރައްވައިފިއެވެ.

މިއިންތިޚާބުގައި ފައްޔާޒު އާ ވާދަކުރެއްވީ މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ (އިންތި)އެވެ. މިއިންތިޚާބުގައި ޗެއަރޕާސަން ހޮވުމަށް 94،211 މީހުންނަށް ވޯޓުލެވެއެވެ. ވަގުތީ ނަތީޖާ ދައްކާގޮތުން މީގެތެރެއިން 49،370 މެމްބަރުން ވަނީ ޗެއާޕާސަން ކަމަށް ފައްޔާޒު އާއި އިންތިއާ ތެރެއިން ބޭފުޅަކު އިންތިޚާބުކުރުމަށް ވޯޓުލާފައެވެ. އޭގެތެރެއިން 28،514 މީހުން ވޯޓުލާފައިވަނީ ޗެއާޕާސަންކަމަށް ފައްޔާޒު އިސްމާއީލް އިންތިޚާބުކުރުމަށެވެ. އެއީ ވޯޓުލީ މީހުންގެ 58 އިންސައްތަ އެވެ. އިމްތިޔާޒު ފަހުމީ އަށް ވޯޓުލާފައިވަނީ 20،856 މީހުންނެވެ. އެއީ ވޯޓުލީ މީހުންގެ 42 އިންސައްތަ އެވެ.

އިންތިޚާބުގައި ބޮޑެތި ސިޓީތަކުން ދެ ބޭފުޅުންނަށް ވޯޓު ލިބިވަޑައިގެންނެވި ގޮތަށް ބަލާލާއިރު މާލެ ސިޓީން އިންތި އަށް ވަނީ ފައްޔާޒަށްވުރެ ގިނައިން ވޯޓު ލިބިވަޑައިގަންނަވާފައެވެ. މާލެ ސިޓީން އިންތިއަށް ލިބިވަޑައިގެންނެވީ 2513 ވޯޓެވެ. ފައްޔާޒަށް ލިބިވަޑައިގެންނެވީ 2218 ވޯޓެވެ. މާލެ ސިޓީގެ ވަކިވަކި ދާއިރާތަކަށް ބަލާލާއިރު އިންތިއަށް ވުރެ ގިނައިން ފައްޔާޒަށް ވޯޓު ލިބިވަޑައިގަންނަވާފައިވަނީ ހުޅުމާލެ ދާއިރާ، ހެންވޭރު ދެކުނު ދާއިރާ، މައްޗަންގޮޅި ދެކުނު ދާއިރާ، މާފަންނު ހުޅަނގު ދާއިރާ އަދި މާފަންނު ދެކުނު ދާއިރާ އިންނެވެ. އެހެން ދާއިރާތަކުން ކުރީގައި އުޅުއްވީ އިންތިއެވެ. އެންމެ ބޮޑު ތަފާތަކުން އިންތިއަށް ވޯޓު ލިބިވަޑައިގަންނަވާފައިވަނީ ގަލޮޅު އުތުރު ދާއިރާ އިންނާއި އިންތި ތަމްސީލުކުރައްވާ މާފަންނު އުތުރު ދާއިރާއިންނެވެ. ގަލޮޅު އުތުރު ދާއިރާ ތަމްސީލުކުރައްވަނީ އީވާ އަބްދުﷲ އެވެ.

ވަގުތީ ނަތީޖާ ދައްކާގޮތުން އައްޑޫ ސިޓީން ކުރީގައި އުޅުއްވަނީ ފައްޔާޒުއެވެ. ފައްޔާޒަށް އައްޑޫ ސިޓީން 2925 ވޯޓު ލިބިވަޑައިގެންނެވިއިރު އިންތިއަށް ލިބިވަޑައިގަތީ 2592 ވޯޓެވެ. އިންތިއަށް ފައްޔާޒަށް ވުރެ ގިނައިން ވޯޓު ލިބިވަޑައިގަންނަވާފައިވަނީ މަރަދޫ ދާއިރާ އާއި ހިތަދޫ މެދު ދާއިރާއިންނެވެ. އެހެން ދާއިރާތަކުން ކުރީގައި އުޅުއްވަނީ ފައްޔާޒެވެ. އެންމެ ބޮޑު ތަފާތަކުން ފައްޔާޒު ކުރި ހޯއްދަވާފައިވަނީ އައްޑޫ މީދޫ ދާއިރާއިންނެވެ. އެދާއިރާ ތަމްސީލުކުރައްވަނީ ރޮޒައިނާ އާދަމްއެވެ. ރޮޒައިނާ އަކީ ފައްޔާޒު އާއެކު އިންތިޚާބުގައި އަންހެނުންގެ ރޫހުގެ ރައީސާ ކަމަށް ވާދަކުރެއްވި ބޭފުޅެއްވެސްމެއެވެ.

މިއިންތިހާބުގައި މާލޭގައި 87 ވޯޓު ފޮށި ބެހެއްޓިއިރު, 194 ރަށެއްގައި ވޯޓު ފޮށި ބެހެއްޓިއެވެ.