އެމްޑީޕީން އަބަދުވެސް އިސްކަންދެނީ ސުލްޙަވެރި ސިޔާސީ ޙަރަކާތް ހިންގަން: ރައީސް ނަޝީދު
ރައީސް ނަޝީދު ވޯޓު ލައްވާފައިވަނީ ޖަމާލުއްދީން ސުކޫލުގައި ބެހެއްޓިފައިވާ ވޯޓު ފޮއްޓަށް
ޗެއަރޕާސަން، އަންހެނުންގެ ރޫހު އަދި ޒުވާނުންގެ ހިތްވަރުގެ ރައީސުން ހޮވުމަށް ބާއްވާ އިންތިޚާބުގައި ރައީސް ނަޝީދު ވޯޓު
އެމްޑީޕީގެ ޗެއަރޕާސަން، އަންހެނުންގެ ރޫހު އަދި ޒުވާނުންގެ ހިތްވަރުގެ ރައީސުން ހޮވުމަށް ބާއްވާ އިންތިޚާބުގައި ރައްޔިތުންގެ މަޖިލީހުގެ ރައީސް، އަދި އެމްޑީޕީގެ ރައީސް ރައީސް މުޙައްމަދު ނަޝީދު ވޯޓު ލައްވައިފިއެވެ.
ރައީސް ނަޝީދު ވޯޓު ލައްވާފައިވަނީ ޖަމާލުއްދީން ސުކޫލުގައި ބެހެއްޓިފައިވާ ވޯޓު ފޮއްޓަކަށެވެ. އެމަނިކުފާނު ވޯޓު ލެއްވީ ހޮނިހިރު ދުވަހުގެ ހެނދުނު 10:17 ގައެވެ.
ވޯޓު ލެއްވުމަށްފަހު ރާއްޖެއެމްވީ އިން ކުރި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ، މިއީ އެމްޑީޕީއަށް ބޮޑު ކާމިޔާބީއެއް ލިބޭ ދުވަހެއް ކަމަށެވެ.
އެމްޑީޕީ އަބަދުވެސް މަސައްކަތް ކުރަމުން އަންނަނީ އިންތިޚާބުތައް މެދުވެރިކޮށްގެން ސުލްޙަވެރި ސިޔާސީ ޙަރަކާތް ހިންގައި، އެމްޑީޕީއާއި، ރާއްޖޭގެ ކުރިމަގުވެސް ރާވަމުން ގެންދިއުމަށްކަމަށް ރައީސް ނަޝީދު ވިދާޅުވިއެވެ.
ޖަމާލުއްދީން ސުކޫލުގައި 5 ވޯޓު ފޮއްޓެއް ބެހެއްޓިފައިވާއިރު، ޗެއަރޕަރސަން ކަމަށް ކުރިމަތިލައްވާފައިވާ އިކޮނޮމިކް މިނިސްޓަރ ފައްޔާޒް އިސްމާއިލްވެސް ވޯޓު ލައްވާފައިވަނީ އެ ސުކޫލްގަ ބަހައްޓާފައިވާ ފޮއްޓަކަށެވެ.
މި އިންތިޚާބުގެ ވޯޓުލުން ފަށާފައިވަނީ ހެނދުނު 9:00 ގައެވެ. އަދި ހަވީރު 4:00 އާއި ހަމަޔަށް ވޯޓުލުން ކުރިއަށްދާނެއެވެ.
މިއިންތިޚާބުގައި ޗެއަރޕާސަން ހޮވުމަށް 94،211 މީހުންނަށް ވޯޓުލެވޭކަމަށް އެމްޑީޕީން ބުނެއެވެ. އަދި އަންހެނުންގެ ރޫހުގެ ރައީސަކު އިންތިޚާބުކުރުމަށް 41،027 މެމްބަރުންނަށް ވޯޓުލެވޭއިރު ޒުވާނުންގެ ހިތްވަރަށް މީހަކު އިންތިޚާބުކުރުމަށް 32،057 މެމްބަރުންނަށް ވޯޓުލެވެއެވެ.
އެމްޑީޕީއިން ވަނީ ވޯޓުލާ މަރުކަޒުގައި ވޯޓުލުން ކުރިޔަށްދާނެ ގޮތް އާންމުކޮށްފައެވެ. އެއުސޫލަށް ބަލާލާއިރު ވޯޓުލާ ނިމުމުން ވޯޓުފޮށި ބަންދުކުރާތާ 15 މިނެޓް ފަހުން ވޯޓު ފޮށި ގުނަން ފަށާގޮތަށް ވަނީ ނިންމާފައެވެ. މީގެއިތުރުން ވޯޓު ކަރުދާހުގައި ފާހަގަޖެހުމަށްފަހު ވޯޓު ކަރުދާހުގެ ފޮޓޯ ނަގައިގެން ނުވާނެކަމަށް ވަނީ އަންގާފައެވެ.
