ސްރީލަންކާގެ އައު ބޮޑު ވަޒީރު ރަނިލް ވިކްރެމެސިންހައަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ތަހުނިޔާ ވިދާޅުވެއްޖެއެވެ.
ބޮޑުވަޒީރުކަމާ ހަވާލުވެވަޑައިގަތް ރަނިލް ވިކްރެމެސިންހައަށް ތަހުނިޔާ ވިދާޅުވެ ކުރެއްވި ޓްވީޓެއްގައި ރައީސް ޞާލިޙު ވިދާޅުވީ، އައު ބޮޑު ވަޒީރުގެ ލީޑަރޝިޕްގެ ދަށުން ސްރީލަންކާއަށް މިހާރު ދިމާވެފައިވާ ހާލަތުން އަރައިގަތުމަށް މަސައްކަތް ކުރައްވާނެ ކަމުގެ ޔަޤީންކަން އެބައޮތް ކަމަށެވެ. އަދި ޤައުމަށް ސުލްޙައާއި ހަމަޖެހުން ގެނެސްދިނުމަށް މަސައްކަތް ކުރައްވާނެ ކަމަށް އުންމީދު ކުރައްވާކަމަށެވެ.
ރަނިލް ވިކްރެމެސިންހަ ބޮޑުވަޒީރުކަމުގެ ހުވާކުރައްވާފައި ވަނީ ބުރާސްފަތި ދުވަހުއެވެ.
ލަންކާގެ ބޮޑުވަޒީރުކަމުގެ މަޤާމަށް ރަނިލް ވިކްރެމެސިންހަ އައްޔަނުކުރައްވާފައިވާއިރު، އޭނާ ވަނީ މީގެ ކުރިން އެކި ފަހަރުމަތިން ލަންކާގެ ބޮޑުވަޒީރުކަމުގެ މަޤާމު އަދާކުރައްވާފައެވެ. މިއީ ވިކްރެމެސިންހަ ލަންކާގެ ބޮޑުވަޒީރުކަމުގެ މަޤާމާއި ހަވާލުވެވަޑައިގެން ހަ ވަނަ ފަހަރެވެ.
ވިކްރެމެސިންހަ ބުދަ ދުވަހު ވަނީ ބޮޑުވަޒީރުކަމުގެ މަޤާމާއި ހަވާލުވެވަޑައިގަތުމާއި ގުޅޭގޮތުން ރައީސް ގޮތަބަޔާއާއެކު މަޝްވަރާކުރައްވާފައެވެ. ބޮޑުވަޒީރުކަމުގެ މަޤާމާއި ވިކްރެމެސިންހަ ހަވާލުވެވަޑައިގެންފައި މިވަނީ ކުރިން އެމަޤާމުގައި ހުންނެވި މަހިންދަ ރާޖަޕަކްސަ ހޯމަ ދުވަހު މަޤާމުން އިސްތިއުފާ ދެއްވުމާއި ގުޅިގެންނެވެ.
