ޓީޗަރުންގެ މުސާރަ ބޮޑު ކުރާތީ ޕްރައިވެޓް ސްކޫލްތަކުން ފީ ބޮޑު ކުރަން ފަށައިފިއެވެ.
"ރާއްޖެ އެމްވީ" އަށް މައުލޫމާތު ލިބިފައިވާ ގޮތުގައި ރާއްޖޭގައި ހިންގާ ގިނަ އަދަދެއްގެ ޕްރައިވެޓް ސްކޫލްތަކުން ވަނީ ފީ ބޮޑު ކުރަން ނިންމައި އެކަން އެޑިއުކޭޝަން މިނިސްޓްރީއަށާއި ބެލެނިވެރިންނަށް އަންގާފައެވެ. ފީ ބޮޑުކުރަން އެ ސްކޫލްތަކުން ނިންމާފައިވަނީ ދިރާސީ އާ އަހަރު ފެށުމާއެކު އޮގަސްޓް މަހުން ފެށިގެންނެވެ.
ބައެއް ޕްރައިވެޓް ސްކޫލްތަކުން ބުދަ ދުވަހު ބެލެނެވެރިންނަށް ފޮނުވާފައިވާ ނޯޓިސްތަކުގައި ވަނީ، ފީ ބޮޑު ކުރާ ސަބަބަކީ ޓީޗަރުންގެ މުސާރަ ބޮޑުވުން ކަމަށް ބުނެފައެވެ. އަދި ބޮޑު ކުރާ އަދަދު ސްކޫލްތަކުގެ ކައުންޓަރުން އެނގޭނެ ކަމަށް ވެސް ވަނީ ބުނެފައެވެ.
އެޑިއުކޭޝަން މިނިސްޓްރީން ބުނި ގޮތުގައި ޕްރައިވެޓް ސްކޫލްތަކަށް ބޭނުންނަމަ ފީ ބޮޑު ކުރެވިދާނެއެވެ. ނަމަވެސް ބޮޑު ކުރުމުގެ ކުރިން އެކަން މިިނިސްޓްރީއަށް ތަފްސީލުތަކާއެކު އެކަން އަންގަން ޖެހޭނެ ކަމަށާއި ފަސް އިންސައްތައަށް ވުރެ ބޮޑު ކުރަން އެދޭނަމަ އެ ހުއްދަ މިނިސްޓްރީން ނުދޭ ކަމަށް ވެސް ބުނެފައި ވެއެވެ.
މީގެ އިތުރުން އެއްވެސް ސްކޫލަކަށް ދިރާސީ އަހަރު ފެށުމުގެ ފަހުން ފީ ބޮޑު ނުކުރެވޭނެ ކަމަށާއި ފީ ބޮޑު ކުރާނަމަ ކުރެވޭނީ އަހަރު ނިންމާފައި ދިރާސީ އާ އަހަރު ފެށޭއިރު ކަމަށް ވެސް އެ މިނިސްޓްރީން ބުނެފައި ވެއެވެ. އަދި ފީ ބޮޑު ކުރުމުގެ ކުރިން ބެލެނިވެރިންނަށް ކުއްޖާ ސްކޫލުގައި ބެހެއްޓުމާ ބެހޭގޮތުން ވިސްނުމަށް ވަގުތު ދޭން ޖެހޭނެ ކަމަށް އެޑިއުކޭޝަން މިނިސްޓްރީން ބުނެފައިވެއެވެ.
ޕްރައިވެޓް ސްކޫލްތައް ފީ ބޮޑު ކުރަނީ ސަރުކާރު ސްކޫލްތަކުގެ ޓީޗަރުންގެ މުސާރަ މި މަހުން ފެށިގެން ބޮޑުވާތީއެވެ. މި ބަދަލާއެކު ޕްރައިވެޓް ތަންތަނުން ޓީޗަރުންގެ މުސާރަ ބޮޑު ނުކޮށްފިނަމަ އެތަންތަނަށް ޓީޗަރުން ލިބުމުގައި ދަތިތަކާ ކުރިމަތިވާނެއެވެ.
