ހޯރަފުށީ އިންޓަނޭޝަނަލް ޕްރީސްކޫލް އެޅުމުގެ މަސައްކަތް ފަށައިފި

ހ.އ ހޯރަފުށީގައި ހަދާ އިންޓަނޭޝަނަލް ޕްރީސްކޫލުގެ އަމަލީ މަސައްކަތް ފަށައިފިއެވެ.

މި މަސައްކަތް ފަށާފައިވަނީ ކުޑަކުދިންގެ ދުވަހާ ގުޅުވައިގެން އަންގާރަ ދުވަހު ހޯރަފުށީގައި ބޭއްވި ރަސްމިއްޔާތެއްގައެވެ. އެ ރަސްމިއްޔާތުގައި ރައްޔިތުންގެ މަޖިލީހުގެ ހޯރަފުށި ދާއިރާގެ މެމްބަރު އަހުމަދު ސަލީމް އާއި އެ ރަށުގެ ގިނަ އަދަދެއްގެ ރައްޔިތުން ބައިވެރިވެލެއްވިއެވެ. އެ ރަސްމިއްޔާތުގައި މަސައްކަތް ފަށައިދިނީ ކުޑަކުދިން ލައްވައެވެ.

އިންޓަނޭޝަނަލް ޕްރީސްކޫލުގެ އަމަލީ މަސައްކަތް ފަށާފައިވާއިރު މިއީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ އިޖުތިމާއީ އާއްމު ޒިންމާގެ ދަށުން އަޅާ ސްކޫލެކެވެ. އެ ސްކޫލުގެ ބިންގާ އަޅާފައިވަނީ 2022 މާޗު 31 ވަނަ ދުވަހުއެވެ.

އެ ސްކޫލުގައި ތިން ކްލާސްރޫމް ހެދުމަށް ހަމަ ޖެހިފައިވާއިރު އެމްޓީސީސީ އިން ލަފާ ކުރާ ގޮތުގައި އަށް މަސް ދުވަހުގެ ތެރޭގައި ސްކޫލުގެ މަސައްކަތް އެއްކޮށް ނިންމާލެވޭނެއެވެ. މި މަސައްކަތް ނިންމައި ސްކޫލް ހިންގަން އެމްޓީސީސީ އިން ހަވާލު ކުރާނީ ހޯރަފުށީ ކައުންސިލާއެވެ.

ހޯރަފުށީގައި އިންޓަނޭޝަނަލް ޕްރީސްކޫލެއް އަޅަން ނިންމާފައިވަނީ އެ ރަށުގައި ޕްރީސްކޫލްގެ ހިދުމަތް އެކަށީގެންވާ ފެންވަރެއްގައި ނުދެވޭތީ އެކަމާ ރައްޔިތުން ކަންބޮޑުވެފައިވާތީއެވެ. މި ސްކޫލުގެ ސަބަބުން އެ ރަށުގެ ކުޑަކުދިންނަށް ލިބިދޭން ޖެހޭ ތައުލީމު އެންމެ ފުރިހަމަ ގޮތުގައި ލިބޭނެ ކަމަށާއި އެއީ ރަށަށް ވެސް ލިބުނު ވަރަށް ބޮޑު އުފަލެއް ކަމަށް ހޯރަފުށީ ކައުންސިލުން ބުނެފައިވެއެވެ.

މި ސްކޫލް އަޅަން އެހީތެރިކަން ފޯރުކޮށްދެއްވާތީ އާއި ރަށުގެ ތަރައްގީއަށް ކޮށްދެއްވާ މަސައްކަތްތައް ފާހަގަކޮށް ހޯރަފުށީ ކައުންސިލުން ވަނީ އެ ދާއިރާގެ މެމްބަރު އަހުމަދު ސަލީމް އަށް ޝުކުރު އަދާކޮށްފައެވެ.