ރާއްޖޭގެ ތައްޔާރީތަކަށް ތައުރީފް، އިތުރު ފުރުޞަތުތައް ލިބުން ގާތް!

ރާއްޖޭގައި މިހާރު ކުރިއަށްދާ ސައުތް އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގެ ތައްޔާރީތަކަށް ޞަރަހައްދީ އަދި ބައިނަލްއަޤްވާމީ ފެޑެރޭޝަންތަކުގެ ތައުރީފް ލިބިއްޖެއެވެ. މުބާރާތް ހުޅުވުމުގެ ރަސްމިއްޔާތަށްފަހު ރާއްޖެ ޓީވީގެ "ކުޅިވަރު ފައިލް" ޕްރޮގްރާމްގައި ބައިވެރިވެވަޑައިގެން ޓީޓީ އެސޯސިއޭޝަންގެ ނައިބު ރައީސް އިބްރާހިމް ޝިއުރީ ވިދާޅުވީ "ކޮސް" ނުވާ އެއްވެސް ޤައުމެއް ނެތްކަމަށެވެ.

ޝިއުރީ ވިދާޅުވީ މިއީ ވަރަށް ތަފާތު މުބާރާތެއްކަމަށާއި, އިންތިޒާމްތަކަށް ހުރިހާ ޤައުމަކުންވެސް ކުރަނީ ތައުރީފުކަމަށެވެ. މިފެންވަރަށް މުބާރާތް ބާއްވާނެކަމަށް ޤައުމުތަކުން އުއްމީދުނުކުރާކަމަށާއި, މުބާރާތަށް ތައްޔާރުވެފައިވާ މިންވަރަށް ޤައުމުތަކުގެ ހިފެހެއްޓުމެއް ނެތް ތައުރީފު ލިބެމުންދާކަމަށެވެ.

ޝިއުރީ ވިދާޅުވީ މުބާރާތް ހުޅުވުމުގެ ރަސްމިއްޔާތަށްފަހު ކޮމަންވެލްތް ޓޭބަލް ޓެނިސް އެސޯސިއޭޝަންގެ ރައީސްވެސް ވަރަށް ބޮޑަށް ތައުރީފްކުރެއްވި ކަމަށާއި, އެހެން މުބާރާތްތައްވެސް ރާއްޖޭގައި ބޭއްވޭ ފެންވަރަށް މިމުބާރާތް ބާއްވަމުންދާކަން ފާހަގަކުރެއްވިކަމަށެވެ.

ކޮމަންވެލްތް ޓޭބަލް ޓެނިސް ޗެމްޕިއަންޝިޕް ރާއްޖޭގައި ބޭއްވޭނެކަމުގެ އިޝާރާތެއްވެސް ދެއްވިއެވެ. އެމުބާރާތް އޮންނާނީ މިއަހަރުކަމެއް, އަންނަ އަހަރުކަމެއް ޔަޤީނެއް ނޫނެވެ. މުބާރާތް ހުޅުވުމުގެ ރަސްމިއްޔާތުގައި ޔޫތް މިނިސްޓަރު އަހުމަދު މަހުލޫފްވެސް ވިދާޅުވީ ކޮމަންވެލްތް ޓޭބަލް ޓެނިސް ޗެމްޕިއަންޝިޕް ރާއްޖޭގައި ބޭއްވޭތޯ މަސައްކަތްކުރަމުން އަންނަ ކަމަށެވެ. މުބާރާތް ބާއްވަން ރާއްޖެއިން ހުށަހަޅުއްވާނެކަމުގެ ޔަޤީންކަން މިނިސްޓަރު ދެއްވިއެވެ.

މުބާރާތުގެ އޯގަނައިޒިންގއާއި, ޓީމްތަކުގެ އެކޮމަޑޭޝަންއާއި, ކެއުންފަދަ ކަންކަން އިންތިޒާމްކޮށްފައިވާ ގޮތްވެސް މުބާރާތުގައި ބައިވެރިވާ ޤައުމުތަކުން ވަނީ ފާހަގަކޮށްފައެވެ. މިއީ ޤައުމެއްގެ ހައިޞިއްޔަތުންވެސް ލިބޭ އުފަލެއްކަމަށް ޝިއުރީ ވިދާޅުވިއެވެ.

މުބާރާތް ރާއްޖޭގައި ކުރިއަށްދަނީ މިމަހުގެ 9-11 އަށެވެ. މުބާރާތުގައި ރާއްޖޭގެ އިތުރުން ޞަރަހައްދުގެ އިންޑިޔާ, ޕާކިސްތާން, ނޭޕާލް, ސްރީލަންކާ އަދި ބަނގްލަދޭޝް ވާދަކުރެއެވެ.