ދެއަހަރުގެ މެދުކެނޑުމަކަށްފަހު ބައިބަލާ މުބާރާތް ފަށައިފި

ދެއަހަރުގެ މެދުކެންޑުމަކަށްފަހު އީދު ބައިބަލާ ޗެލެންޖު 1443 ގެ ނަމުގައި ބައިބަލާ މުބާރާތް ފަށައިފިއެވެ.

މުބާރާތް ކުރިއަށް ގެންދަނީ ހެންވޭރު ދޮންވެލި ބީޗުގައެވެ. މުބާރާތުގެ ފުރަތަމަ ރޭގައި 14 ޓީމު ކުޅުނު އިރު ހަތް ޓީމަކުން ވަނީ ގަދަ 16 ގެ ޖާގަ ކަށަވަރުކޮށްފައެވެ. މުބާރާތުގެ ގަދަ 16 ގެ ޖާގަތައް ކަށަވަރުކުރީ ރޮކް ސްޓްރީޓް ޒެޑް، މަސްއޮޑި ވޯވޯ، ކްލަބް ޓީނޭޖް، ކްލަބް އީގަލްސް، ބުރު ސްޕޯޓްސް ކްލަބް އަދި ހުޅުމާލެ ސްޕޯޓްސް ކްލަބްގެ އިތުރުން ލޮރެންޒޯ ސްޕޯޓްސް ކްލަބްއެވެ.

ފުރަތަމަ މެޗުގައި ވާދަކުރީ ޓީސީ ލަޔަންސް އާއި ރޮކް ސްޓްރީޓް ޒެޑްއެވެ. ފޯރިގަދަ މި މެޗުގައި ކޮންމެ ޓީމަކުންވެސް އެއްގޭމު ކާމިޔާބު ކުރުމާއެކު ނަތީޖާ ނެރެން ޖެހުނީ ގަދަ ހިފުމަކުންނެވެ. ގަދަ ހިފުމުގައި ވާދަކޮށް ޓީސީ ލަޔަންސް މެޗު ކާމިޔާބުކުރީ ދެ ގޭމް އެއް ގޭމުންނެވެ. މެޗުގެ މޮޅު ކުޅުންތެރިއަކަށް ހޮވުނީ ރޮކް ސްޓްރީޓްގެ އަހުމަދު ޝާފިއުއެވެ.

ދެވަނަ މެޗުގައި ބައްދަލުކުރީ މަސްއޮޑި ވޯވޯ އާއި ކްލަބް އެސްޑިޒެޑްއެވެ. މި މެޗު ސީދާ ދެސެޓުން ކާމިޔާބުކުރީ މަސްއޮޑި ވޯވޯއެވެ. މެޗުގެ މޮޅު ކުޅުންތެރިއަކަށް ހޮވުނީ މޮސްއޮޑި ވޯވޯގެ އަބްދުﷲ ހުމައިދުއެވެ.

ތިންވަނަ މެޗުގައި ކްލަބް އޯވަންއޯ އާއި ވާދަކޮށް ކްލަބް ޓީންއޭޖް މެޗު ކާމިޔާބުކުރީ ސީދާ ދެގޭމުންނެވެ. ހަތަރުވަނަ މެޗުގައި ބައްދަލުކުރީ ކްލަބް އީގަލްސް އާއި ރޮކް ޒެޑްއެވެ. މި މެޗު ސީދާ ދެސެޓުން ކާމިޔާބުކުރީ ކްލަބް އީގަލްސްއެވެ. ފަސްވަނަ މެޗުގައި ވާދަކުރީ މަސްއޮޑި ޓައިޓަންސްއާއި ބުރު ސްޕޯޓްސް ކްލަބްއެވެ. ކޮންމެ ޓީމަކުންވެސް އެއްގޭމު ގެންދިއުމުން ގަދަ ހިފުމަކަށް ގޮސް ދެގޭމުން އެއް ގޭމު ކާމިޔާބުކޮށްގެން މެޗު ކާމިޔާބުކުރީ ބުރު ސްޕޯޓްސް ކަލްބެވެ. މެޗުގެ މޮޅު ކުޅުންތެރިއަކީ ބުރު ސްޕޯޓްސް ކްލަބްގެ މުހައްމަދު ހަނީފްއެވެ.

ހަވަނަ މެޗުގައި ވާދަކުރީ ލިޓިލް ޓައުންއާއި ހުޅުމާލެ ސްޕޯޓްސް ކްލަބްއެވެ. ހުޅުމާލެ ސްޕޯޓްސް ކްލަބް މެޗު ކާމިޔާބުކުރީ ސީދާ ދެގޭމުންނެވެ. ހަތްވަނަ މެޗުގައި ލޮރެންޒޯ ސްޕޯޓްސް ކްލަބް ޓީސީ ފްރެޓާނިޓީގެ މައްޗަށް ކުރިހޯދީ ސީދާ ދެގޭމުންނެވެ.

ކޮންމެ އަހަރަކުވެސް ރާއްޖޭގައި ބާއްވަމުން އަންނަ މި މުބާރާތް ދެއަހަރަށް މެދުކެނޑުނީ ކޮވިޑުގެ ސަބަބުންނެވެ.