މުޖުތަމައުގައި ހިނގާ ކުށްތަކާއި ބައިބަލާ ގުޅުވުން ކުށްވެރިކުރަން: ބައިބަލާ އެސޯސިއޭޝަން

މުޖުތަމައުގައި ހިނގާ ކުށްތަކާއި ބައިބަލާ މަބާރާތާ ގުޅުވުމުން ބައިބަލާ އެސޯސިއޭޝަނުން އެކަން ކުށްވެރިކުރިކޮށްފިއެވެ.

މިއަހަރުގެ ބައިބަލާ މުބާރާތް ލަސްކުރުމާއި ގުޅޭގޮތުން ބައިބަލާ އެސޯސިއޭޝަނުން ނެރުނު ބަޔާނެއްގައި ބުނީ ބައިބަލާ އެސޯސިއޭޝަންއަކީ ރާއްޖޭގައި އޮތް ހަމަ އެކަނި ސަޤާފީ ކުޅިވަރަކާއި ގުޅުންހުރި އެސޯސިއޭޝަންއަށް ވާއިރު، މި ކުޅިވަރާއި މުޖުތަމައުގައި ހިނގާ ކުށްތަކާއި ގުޅުވާ ގުޅުވުން، އެޖަމިއްޔާއިން ކުށްވެރިކުރާ ކަމަށެވެ. ބައިބަލާއަކީ ޒަމާނުއްސުރެ ޒުވާނުންގެ މެދުގައި މަޤުބޫލުކަން ހޯދާފައިވާ ކުޅިވަރެކެވެ. މިފަދަ ކުޅިވަރުތަކަކީ މީހުން ބިނާކުރުމާއި، މުޖުތަމައުއަށް ފައިދާހުރި ހަށިހެޔޮ ޒުވާނުންނެރެދޭނެ ހަރަކާތްތަކެއްކަން ފާހަގަކޮށް، މިއީ ގިނަ ޒުވާނުންގެ މަސްލަހަތާއި ގުޅުންހުރި ކުޅިވަރެއްކަން ގަބޫލުކުރާކަމަށް ބައިބަލާ އެސޯސިއޭޝަނުން ބުންޏެވެ.

ކޮވިޑް-19 ގެ ބަލި މަޑުކަމާއެކު ބައިބަލާ މުބާރާތް މެދުކެނޑުނުއިރު އަލުން މިއަހަރު، 1443 ވަނަ އަހަރުގެ ބައިބަލާ މުބާރާތުގެ ނަމުގައި މިމުބާރާތް ބޭއްވުމަށް ސަރުކާރުން ވަނީ ހުއްދަދީފައެވެ. މުބާރާތް އިއުލާންކޮށް ގުރުއަތު ނަގާފައިވާއިރު، 34 ޓީމުން 1000 އަށްވުރެ ގިނަ ޒުވާނުންމިވަނީ ބައިވެރިވެފައެވެ. އަދި ޓީމުތަކުން ބައިބަލާ ރިންގުއަޅައި، ޕްރެކްޓިސްތައްފަށާ، ޖާޒީތަށް ޕްރިންޓްކޮށް ގިނަ ހަރަދުތަކެއް މިހާތަނަށް ކުލަބްތަކުން ކޮށްފައިވާކަން އެސޯސިއޭޝަންގެ ބަޔާނުގައި ފާހަގަކޮށްފައިވެއެވެ.

މިހެން މިކަން އޮތްއިރު މުބާރާތް ފެށެން އެއްދުވަހަށް ވެފައިވަނިކޮށް މާލެ ސަރަހައްދުގައި ހިނގި މާރާމާރިތަކާއެކު މުބާރާތް ލަސްކޮށްފައިވަނީ ފުލުހުންގެ އެދުމުގެ މަތިންނެވެ. އެސޯސިއޭޝަންއިން އެންމެ ބޮޑަށް އިސްކަންދެނީ ޑިސިޕްލިން ގޭމްއަކަށް ވުމާއެކު، މާލެ ތެރޭ ހިނގައިދިޔަ މާރާމާރީތަކާއި ގުޅިގެން ފުލުހުންގެ އެދުމުގެ މަތިން މުބާރާތް ފަސްކުރެވިފައިވުމާއި ގުޅިގެން މުބާރާތުގައި ބައިވެރިވާ ޓީމުތަކާއި ބައިބަލާ އެސޯސިއޭޝަންގެ ހިންގާ ކޮމިޓީ މަޝްވަރާކޮށް ގޮތްތަކެއް ނިންމާފައިވާކަމަށް ބައިބަލާ އެސޯސިއޭޝަންއިން ބުނެފައިވެއެވެ. އެގޮތުން މުބާރާތުގެ ތެރެއިންކުޅިވަރުގެ ރޫހާއި، އިޖުތިމާއީ މިންގަނޑުތަކާއި ހިލާފަށް އަމަލުކުރާ ޓީމުތަކާއި މެދު ހަރުކަށި ފިޔަވަޅުމަށް އެ އެސޯސިއޭޝަނުންވަނީ ނިންމާފައެވެ.

މިމުބާރާތުގެ އިންތިޒާމްތައް މިހާތަނަށް ރޭވިފައިވަނީ ފުލުހުންނާއި ގުޅިގެން، ފުލުހުންގެ އިރުޝާދުގެ މަތިންނެވެ. އެގޮތުން ފުލުހުން އެދުނު ގޮތައް ބައިބަލާ ކުޅެން ހަމަޖެހިފައިވާ ތަނާއި، އެތަނުގައި ކެމެރާ ހަރުކުރުމާއި، ސަޕޯޓަރުން ވަކިވާނެހެން ތަނުގެ އިންތިޒާމްތައް ހަމަޖައްސާފައިވާކަމަށް ބައިބަލާ އެސޯސިއޭޝަނުން މައުލޫމާތުދެއެވެ.

އެހެންކަމުން 1443 ވަނަ އަހަރުގެ ބައިބަލާ މުބާރާތް ކުރިން ރޭވިފައިވާގޮތަށް ކުރިއަށް ގެންދިޔުމަށް އެސޯސިއޭޝަނުން ނިންމައި، އެކަންކަން އިންތިޒާމްކުރަން ފަށާފައިވާކަން ބައިބަލާ އެސޯސިއޭޝަނުން ހާމަކުރިއެވެ. ރާއްޖޭގެ ސަލާމަތްތެރިކަމަކީ ދިވެހި ފުލުހުންގެ ހިދުމަތުން ބަލައި ކަށަވަރުކުރަން ޖެހޭކަމަށްވީހިނދު، އެއެސޯސިއޭޝަނުން ކުރިއަށްދާނީ ފުލުހުންގެ އިރުޝާދާއެކު އެންމެ މަސްލަހަތު ހުރި ގޮތެއްގައި ކަމަށްވެސް އެސޯސިއޭޝަންގެ ބަޔާނުގައިވެއެވެ.