މިހާރު ކުރިއަށްދާ އީދު ބައިބަލާ ޗެލެންޖު 1443ގެ ކުއާޓާ ފައިނަލަށް ދަތުރުކުރި ޓީމުތައް ޔަގީންވެއްޖެއެވެ.

މުބާރާތުގެ ކުއާޓާ ފައިނަލަށް ދަތުރުކޮށްފައި ވަނީ އެލްޓީ ސްޕޯޓްސް ކްލަބް، ކްލަބް އީގަލްސް، ޓީސީ ސްޕޯޓްސް، ބީޖީ ޖޫނިއަރ، ކްލަބް ޓިންއޭޖް، ޔުނައިޓެޑް އީސްޓް ކޯސްޓް، ކްލަބް 010 އަދި ބީޖީ ސްޕޯޓްސް ކްލަބެވެ.

ބުދަ ދުވަހުގެރޭ ކުޅުނު ގަދަ 16 ގެ ފުރަތަމަ މެޗުގައި ބައްދަލުކުރީ އެލްޓީ ސްޕޯޓްސް ކްލަބާއި ބީޖީ ނިއު ޖެނެރޭޝަންއެވެ. މި މެޗު ސީދާ ދެގޭމުން ކާމިޔާބުކުރީ އެލްޓީ ސްޕޯޓްސް ކްލަބެވެ. މެޗުގެ މޮޅު ކުޅުންތެރިއަކަށް ހޮވުނީ އެލްޓީގެ އިސްމާއިލް ޝައްފާންއެވެ.

ދެވަނަ މެޗުގައި ހުޅުމާލެ ސްޕޯޓްސް ކްލަބާއި ވާދަކޮށް ޓީސީ ސްޕޯޓްސް ކްލަބުން މެޗު ކާމިޔާބުކުރީ ގަދަ ހިފުމަށް ގޮސްގެންނެވެ. ޓީސީ މޮޅުވީ ގަދަ ހިފުމުގެ ގަދަ ހިފުމުގައި 2-1 ންނެވެ. މެޗުގެ މޮޅު ކުޅުންތެރިއަކީ ޓީސީގެ ހަސަން ތައުހީދެވެ.

ތިންވަނަ މެޗުގައި ބުރު ސްޕޯޓްސް ކްލަބާއި ވާދަކޮށް ކްލަބް ޓީންއޭޖު ކުރި ހޯދީ ސީދާ ދެގޭމުންނެވެ. މެޗުގެ މޮޅު ކުޅުންތެރިއަކަށް ހޮވުނީ ޓީންއޭޖުގެ އިބްރާހިމް މުބީނެވެ. ހަތަރުވަނަ މެޗުގައި ބްރަދާސް އޮފް އޮފް ބޮސްނިއާ ސީދާ ދެގޭމުން ބަލިކޮށްގެން ކުއާޓާގެ ޖާގަ ހޯދީ ބީޖީ ސްޕޯޓްސް ކްލަބްއެވެ. މެޗުގެ މޮޅު ކުޅުންތެރިއަކީ ބީޖީގެ އަލީ ޝާފިއުއެވެ.

ފަސްވަނަ މެޗު ގަދަ ހިފުމަކަށް ގޮސްގެން ކާމިޔާބުކުރީ ކްލަބް އީގަލްސްއެވެ. މެޗުގެ މޮޅު ކުޅުންތެރިއަކަށް ހޮވުނީ އީގަލްސްގެ މުހައްމަދު ރިލްވާންއެެވެ. ހަވަނަ މެޗުގައި ބީޖީ ސްޕޯޓްސް ކަލަބް ޖޭއާރް ވަނީ ސީދާ ދެގޭމުން މީޓް ދަ އީގަލްސް ބަލިކޮށްފައެވެ. މެޗުގެ މޮޅު ކުޅުންތެރިއަކަށް ހޮވުނީ ބީޖީގެ އަލީ ހުޝާމްއެވެ.

ހަތްވަނަ މެޗުގައި ބައްދަލުކުރީ ޔުނައިޓެޑް އީސްޓް ކޯސްޓާއި ޓީންއޭޖް ޖޫނިއާއެވެ. މި މެޗު ސީދާ ދެގޭމުން ކާމިޔާބުކުރީ ޔުނައިޓެޑް އީސްޓް ކޯސްޓްއެވެ. މެޗުގެ މޮޅު ކުޅުންތެރިއަކީ ޔުނައިޓެޑް އީސްޓް ކޯސްޓްގެ ރިޝްވާން އަހުމަދެވެ. ފަހު މެޗުގައި މަސްއޮޑި ވޯވޯ ބަލިކޮށް ކުއާޓާގެ ފަހު ޖާގަ ކަށަވަރުކުރީ ކްލަބް 010 އެވެ. އެޓީމު މެޗު ކާމިޔާބުކުރީ ސީދާ ދެގޭމުންނެވެ. މެޗުގެ މޮޅު ކުޅުންތެރިއަކަށް ހޮވުނީ އާދަމް އަހްސަލްއެވެ.

މުބާރާތުގެ ކުއާޓާ ފައިނަލުގެ މެޗުތައް ފަށާނީ ބުރާސްފަތި ދުވަހުގެރޭ 20:30 ގައެވެ. މެޗުތައް އޮންނާނީ ހެންވޭރު ދޮންވެލި ބީޗުގައެވެ.