އައިފެލް ޓަވަރ ޔޫކްރެއިންގެ ދިދައިގެ ކުލަތަކުން ދިއްލާލައިފި

ޔޫކްރެއިން ރަޝިޔާ ހަނގުރާމައިގައި ޔޫކްރެއިންއާއެކު ވާކަން ދެއްކުމުގެ ގޮތުން ފްރާންސްގެ ޕެރިސްގައި ހުންނަ އައިފެލް ޓަވަރު ޔޫކްރެއިންގެ ދިދައިގެ ކުލަތަކުން ދިއްލާލައިފިއެވެ.

ހޯމަ ދުވަހުގެ ރޭ އައިފެލް ޓަވަރު ދިއްލާފައިވަނީ ޔޫކްރެއިންގެ ދިދައިގައި ހުންނަ ކުލަތައް ކަމަށްވާ ރީނދޫ އަދި ނޫ ކުލައިންނެވެ. މިއީ ޔޫކްރެއިންގެ ރައްޔިތުންނާއެކު ވާކަން ދެއްކުމުގެ ގޮތުންނެވެ.

ފްރާންސްގެ ރައީސް އެމަނުއަލް މެކްރޯން އަދި ޖަރުމަންގެ ޗާންސެލަރ އޮލާފް ސްކޯލްޒްވަނީ ޔޫކްރެއިނަށް ފުރިހަމަ އެއްބާރުލުން ދޭނެ ކަމުގެ ޔަގީންކަން ދީފައެވެ.

ޔޫކްރެއިންގެ ރައްޔިތުންނާއެކު ވާކަން ދެއްކުމަށް ޖަރުމަންގެ ބްރެންޑެންބާރގް ގޭޓްވެސް ވަނީ ޔޫކްރެއިންގެ ދިދައިގެ ކުލަތަކުން ދިއްލާފައެވެ. ޖަރުމަންގެ ޗާންސެލަރުވަނީ ގޭޓް ކައިރީގައި ހޯމަ ދުވަހު ފްރާންސްގެ ރައީސާ ވެސް ބައްދަލުކުރައްވާފައެވެ.

ހަނގުރާމައިގައި 5.8 މިލިއަނަށްވުރެ ގިނަ މީހުންވަނީ ޔޫކްރެއިން ދޫކޮށް އެހެން ގައުމުތަކަށް ގޮސްފައެވެ. އަނިޔާ ލިބުނު މީހުންގެ އަދަދު ހަތަރު ހާހާ ގާތްކުރާއިރު، ޔޫކްރެއިންގެ 3،680 މީހުންވަނީ މަރުވެފައެވެ.