ފަސިންޖަރުން އުފުލަމުން ދިޔަ އެންގާރާ އެއަރލައިންސް ބޯޓެއް ވެއްޓިއްޖެ

ބުރާސްފަތި ދުވަހު ރަޝިޔާގެ އިރުމަތީ ސަރަޙައްދު ކަމުގައިވާ އަމޫރު ގައި 49 މީހުން އުފުލަމުންދިޔަ ފަސިންޖަރުން އުފުލާ މަތިންދާބޯޓެއް ވެއްޓިއްޖެ އެވެ.

އެންގާރާ އެއަރލައިންސްގެ ދެ އިންޖީނު އެޅި އެންޓޮނޮވް-24 މަތިންދާބޯޓެއް ބްލަގޮވެޝްޗެންސްކް ސިޓީން ޓިންޑާ އަށް ދަތުރު ކުރަމުން ދަނިކޮށް ރާޑަރުން ގެއްލިފައިވާ ކަމަށް ސަރަޙައްދުގެ ގަވަރުނަރު ވަސީލީ އޯރްލޮވް ޓެލެގްރާމްގައި ވިދާޅުވެފައިވާ ކަމަށް އޭއެފްޕީ އިން ރިޕޯޓުކޮށްފައި ވެއެވެ.

ފަހުން، ސަލާމަތްކުރުމުގެ އޮޕަރޭޝަން ގައި ހަރަކާތްތެރިވި ހެލިކޮޕްޓަރަކަށް ޓިންޑާ އިން ގާތްގަނޑަކަށް 16 ކިލޯމީޓަރު (10 މޭލު) ދުރުގައިވާ ފަރުބަދައެއްގެ އަރިމަތީގައި ވެއްޓުނު ބޯޓުގެ އަނދަމުންދާ ބައިތައް ފެނިފައި ވެއެވެ.

ބޯޓުގައި ތިބި ފަސިންޖަރުންގެ ތެރޭގައި 5 ކުޑަކުދިންނާއި 6 ފަޅުވެރިން ހިމެނެއެވެ.

ރެސްކިއު އޮޕަރޭޝަން ގައި ހަރަކާތްތެރިވާ ފަރާތްތަކުން ބުނިގޮތުގައި، މަތިން ބަލާއިރު ދިރިހުރި މީހެއްގެ އެއްވެސް ނިޝާނެއް ނުފެއެވެ.

އަމޫރު ސަރަޙައްދުގެ ސިވިލް ޑިފެންސް އޭޖެންސީން ބުނެފައިވަނީ އެ ސަރަޙައްދަށް ސަލާމަތްކުރާ ފަރާތްތައް ފޮނުވަމުންދާ ކަމަށެވެ.

ބޯޓު ވެއްޓުނު ސަބަބެއް އަދި ހާމަ ކޮށްފައެއް ނުވެއެވެ.