އަންނަ އަހަރުގެ ރޯދަޔަށް ރާއްޖޭގައި ތިބި ހާފިޒުން ތަރާވީސް ނަމާދު ކުރުމަށް ތައްޔާރުކުރުމުގެ ޕްރޮގްރާމެއް
8 މެއި 2022 | އާދީއްތަ 22:23މި ޕްރޮގްރާމް ކުރިއަށް ގެންދާނީ އިސްލާމިކް ޔުނިވަރސިޓީއާ ގުޅިގެން
އިސްލާމިކް މިނިސްޓްރީގެ ޕާމަނަންޓް ސެކްރެޓަރީ އަހްމަދު އަދީލް
އަންނަ އަހަރުގެ ރޯދަމަހަށް ރާއްޖޭގައި ތިބި ހާފިޒުން ތަރާވީސް ނަމާދު ކުރުމަށް ތައްޔާރު ކުރުމުގެ ޕްރޮގްރާމެއް ފަށަން އިސްލާމިކް މިނިސްޓްރީން ނިންމާފައިވާ ކަމަށް އެ މިނިސްޓްރީގެ ޕާމަނަންޓް ސެކްރެޓަރީ އަހްމަދު އަދީލް ވިދާޅުވެއްޖެއެވެ.
ރާއްޖެޓިވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން އަދީލް ވިދާޅުވީ ޤުރުއާން ހިތުދަސްވިޔަސް ހިފްޒުކޮށް ތަރާވީސް ކުރުމާއި ނަމާދުގައި ހިފްޒުކޮށް ކިޔެވުމާއި ކޮންމެވެސް ވަރެއްގެ ތަފާތުތަކެއް ހުރެދާނެ ކަމަށެވެ. ބައެއް މީހުންނަށް ހިފްޒު ކުރެވުނު ނަމަވެސް ތަރާވީސް ނަމާދު ކުރުމަށް ގޮންޖެހުންތަކާއި ދިމާވާ ކަމަށާއި އެހެންކަމުން އެކަމަށްޓަކައި މީހުން ތައްޔާރު ކުރުމުގެ ޕްރޮގްރާމެއް ކުރިއަށް ގެންދިޔުމަށް މިނިސްޓްރީގެ ފަރާތުން ނިންމާފައިވާ ކަމަށެވެ.
މި ޕްރޮގްރާމް މިނިސްޓްރީން ކުރިއަށް ގެންދިޔުމަށް ނިންމާފައިވަނީ އިސްލާމިކް ޔުނިވަރސިޓީއާ ގުޅިގެންނެވެ. ޕްރޮގްރާމުގެ ތެރެއިން ދިވެހި ހާފިޒުން ގިނަ ކުރެވިގެންދާނެ ކަމަށް ވެސް އޭނާ ވިދާޅުވިއެވެ.
މިނިސްޓްރީގެ މަސައްކަތްތަކާއި ބެހޭ ގޮތުން ވާހަކަފުޅުދައްކަވަމުން އަދީލް ވިދާޅުވީ މަސައްކަތްތަކަށް އެކަށީގެންވާ މިންވަރަށް މުވައްޒަފުން ނެތުމުން ދަތިތައް ދިމާވާ ކަމަށެވެ. އެގޮތުން 40 މިސްކިތުގެ އިމާމުންގެ ކަންތައްތައް ބެލެހެއްޓުމަށް ތިބޭނީ ދެ ސުޕަވައިޒަރުން ކަމަށާއި ދީނީ މައުލޫމާތުތައް ފޯރުކޮށްދިނުމަށްޓަކައި ޖުމްލަ ތިބީ 5 މީހުން ކަމަށް ވެސް އޭނާ ވިދާޅުވިއެވެ.
ބައެއް ރަށްތަކުގައި އިހްޔާ ފޯރަމް މި ރޯދަ މަހު ކުރިއަށް ގެންގޮސްފައިވާއިރު މިއީ އަލަށް ފަށައިގަނެވުނު މަސައްކަތެއް ކަމަށް އަދީލް ވިދާޅުވިއެވެ. އަދި މިކަމަށް ވަރަށް ތަރުހީބު ލިބިގެންދިޔަ ކަމަށް ވެސް އޭނާ ވިދާޅުވިއެވެ.
ދިވެހި ހާފިޒުންނަށް ހިތްވަރު ދިނުމުގެ ގޮތުން ތަރާވީސް ކުރާ ކޮންމެ ރެޔަކަށް 500 ރުފިޔާގެ އެލަވަންސެއް މި ރޯދަ މަހު މިނިސްޓްރީން ވަނީ ދީފައެވެ. މީގެކުރިން ދިވެހި ހާފިޒުންނަށް ދެމުން އައީ 400 ރުފިޔާގެ އެލަވަންސް އެކެވެ.
މީގެއިތުރުން މި ރޯދަ މަހު ރާއްޖެއިން ބޭރުން ބައެއް ހާފިޒުން ސަރުކާރުން ވަނީ ގެނެސްފައެވެ. އެގޮތަށް ބޭރު ހާފިޒުން ގެނެސްފައިވަނީ ދިވެހި ހާފިޒުން ބޭނުންވާ ވަރަށް ނުލިބޭތީ ކަމަށް ވެސް މިނިސްޓްރީން އޭރު ބުނެފައިވެއެވެ.
