ފުލުހެއްގެ ސައިކަލުގައި ރޯކޮށްލި މައްސަލައިގައި ދައުވާ އުފުލައިފި
މި މައްސަލައާ ގުޅިގެން އިތުރު ބަޔަކު ހައްޔަރުކުރިނަމަވެސް ދައުވާކުރާ ވަރަށް ހެއްކެއް ނެތް
ނ މިލަދޫގައި ފުލުހެއްގެ ސައިކަލެއްގައި ރޯކޮށްލުން
ނ.މިލަދޫގައި މަސައްކަތްކުރާ ފުލުހެއްގެ ސައިކަލުގައި ރޯކޮށްލި މައްސަލައާ ގުޅިގެން ހައްޔަރުކުރި މީހެއްގެ މައްޗަށް ދައުވާ އުފުލައިފިއެވެ.
މި މައްސަލައިގައި ޕްރޮސެކިއުޓަރ ޖެނެރަލް (ޕީޖީ) އޮފީހުން ދައުވާ އުފުލާފައިވަނީ ނ. މިލަދޫ، ފަތަގުމާގެ، ޢަބްދުﷲ ޝުހާދު އަޙްމަދުގެ މައްޗަށެވެ.
ޕީޖީ އޮފީހުން މައުލޫމާތު ދޭ ގޮތުގައި 18 ފެބުރުވަރީ 2022 ދުވަހުގެ ދަންވަރުގެ ވަގުތެއްގައި ނ. މިލަދޫ، މާގަސްދޮށުގެ ގޯތި ތެރޭގައި ބަހައްޓާފައި ހުރި ނ. މިލަދޫ ޕޮލިސް ޑެސްކުގައި މަސައްކަތްކުރާ ފުލުހެއްގެ ސައިކަލުގައި އަލިފާން ރޯކޮށްލި މައްސަލައިގައި އޭނާގެ މައްޗަށް ދައުވާ ކުރަނީ ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްއުޤޫބާތު) ގެ 220 ވަނަ މާއްދާގެ (ހ) ގެ 1 ވަނަ ނަންބަރާ ހަވާލާދީ އެމާއްދާގެ (ރ) ގެ 2 ވަނަ ނަންބަރުގެ ދަށުންނެވެ.
މި މައްސަލައިގައި އޭނާގެ މައްޗަށް އުުފުލާފައިވާ ދައުވާއަކީ މުދަލަށް ގެއްލުން ދިނުމުގެ ކުށުގެ ދަޢުވާއެވެ. އެ ދައުވާ ޕީޖީ އޮފީހުން ވަނީ ނ. މިލަދޫ މެޖިސްޓްރޭޓް ކޯޓަށް ހުށައަޅާފައެވެ.
މި މައްސަލައާ ގުޅިގެން އިތުރު ބަޔަކު ހައްޔަރުކުރި ނަމަވެސް، އެމީހުންގެ މައްޗަށް ދައުވާކުރާ މިންވަރަށް ހެކި ލިބިފައެއް ނުވެއެވެ.
މިކަން ހިނގާދިޔަ ގޮތާއި ގުޅޭގޮތުން ފުލުހުން ބުނީ ނ.މިލަދޫގައި މަސްތުވާތަކެތީގެ ވިޔަފާރި ކުރަން އުޅުނު މީހަކު ހުއްޓުވުމުން ފުލުސް މީހާއަށް އިންޒާރު ދީފައިވާ ކަމަށެވެ. އަދި އޭގެ ފަހުން ފުލުސް މީހާގެ ސައިކަލުގައި ރޯކޮށްލާފައިވާއިރު، ސައިކަލް ވަނީ ބޭނުންނުކުރެވޭ ވަރަށް އަނދާފައެވެ.
ސައިކަލުގައި އަލިފާން ރޯކޮށްލާ މަންޒަރު ފެންނަ ވީޑިއޯއެއް ސޯޝަލް މީޑިޔާގައި ވަނީ އާންމުވެފައެވެ. ވީޑިއޯއިން ފެންނަނީ ގޯތިތެރޭގައި ޕާކުކޮށްފައި އިން ސައިކަލެކެވެ. އަދި މޫނު ނިވާ ކޮށްގެންހުރި މީހަކު ގޭ ތެރެއަށް ވަދެ، ދެކޮޅު ބަލައިލުމަށްފަހު ސައިކަލްގެ މައްޗަށް ޕެޓްރޯލް އަޅާ މަންޒަރެވެ.
އެއަށްފަހު އެމީހާ އެނބުރި ދިޔުމުން މޫނު ނިވާ ކޮށްގެން ހުރި އިތުރު މީހަކު ވަދެ އެ ސައިކަލްގައި ރޯކޮށްލައެވެ. އެ މައްސަލަ ތަހުގީގުކުރުމަށްޓަކައި ފުލުހުންގެ މައި އޮފީހުން ސީނިއާ އިންވެސްޓިގޭޓަރަކު އޭރު އެ ރަށަށް ފޮނުވިއެވެ.
