އަރޖެންޓީނާގެ ޖަލުތަކަށް ސުޕަރހީރޯއިން

އަރޖެންޓީނާގެ ވޮލަންޓިއަރުން މަސައްކަތްކުރަމުން އަންނަނީ ޖަލުތަކުގެ ގޮޅިތަކުގައި މަންމައިންނާއެކު ދުވަސްތައް ވޭތުކުރަންޖެހިފައިވާ ކުޑަކުދިންގެ މޫނުތަކަށް ހިނިތުންވުން ގެނެސްދިނުމަށެވެ. އެގޮތުން ސުޕަރހީރޯއިންނަށް ވެގެން އެކުދިންނާއެކު މަޖާ ވަގުތުތަކެއް ހޭދަކުރުމަށް ވަނީ މަސައްކަތްކޮށްފައެވެ. ބެޓްމޭން، އަޔަންމޭން އަދި ޕްރިންސެސް އެލްސާއަށް ވެގެން ޖަލުތަކަށް ވޮލަންޓިއަރުން ވަނީ ގޮސްފައެވެ.

އެގޮތުން ފަނަރަވަރަކަށް ފިރިހެނުންނާއި އަންހެނުން ވަނީ ސުޕަރހީރޯއިންގެ ހެދުން އަޅައިގެން ޖަލަށް ގޮސްފައެވެ. އަރޖެންޓީނާގެ ގާނޫނު ބުނާގޮތުން ކުޑަކުދިންގެ އުމުރުން 4 އަހަރު ވަންދެން އެކުދިންގެ މަންމައިންނާއެކު ޖަލުތަކުގައި ތިބެވޭނެެވެ. އެކަމުގެ ސަބަބުން ކުޑަކުދިންނަށް އެކި ކަހަލަ ނޭދެވޭ އަސަރުތައް އަންނަނީ ކުރަމުންނެވެ. އެގޮތުން ޖަލުގައި ބައިބޯވުމާއި ޖަލުތަކުގެ ހާލަތު ދަށްވުމުގެ ސަބަބުން އެކަމުގެ އަސަރު ކުދިންނަށް ދިގުމުއްދަތަކަށް ކުރާކަމަށް ހިޔުމަން ރައިޓްސް ވޮޗުން ވަނީ ބުނެފައެވެ.

ބެޓްމޭން ގޮތަށް ހެދުން އަޅައިގެން އެކުދިން ކައިރިއަށް ދިޔަ ޑާމިއަން ގޯމޭޒް ބުނީ މަސައްކަތްކުރަނީ ޖަލުގެ ބޭރުގައިވާ ދުނިޔޭގައި ހިނގާ ކަންތައްތައް އެކުދިންނާ ހަމައަށް ގެނެސްދިނުމަށް ކަމަށެވެ. ގޯމޭޒްއަކީ ހީރޯ ކުލަބުގެ އޯގަނައިޒަރެވެ. މިކުލަބަކީ މިގޮތަށް އެހީތެރިކަން ބޭނުންވާ ކުދިންނަށް އެހީވުމަށް އުފައްދާފައިވާ ކުލަބެކެވެ.

އުމުރުން 31 އަހަރުގެ ޑަލްމާ ލުނާ އަކީ 16 އަހަރުގެ ޖަލު ހުކުމެއް ތަންފީޒުކުރަމުން އަންނަ މަންމައެކެވެ. ޑަލްމާ ބުނީ ޖަލުގައި ކުޑަކުއްޖަކު ބެލުމަކީ ފަސޭހަކަމެއް ނޫންކަމަށެވެ. ނަމަވެސް މިއުނދަގޫ ހާލަތުގައިވެސް މަސައްކަތްކުރަނީ ވީއެންމެ ރަނގަޅަށް ކަންކަން ކުރެވޭތޯކަމަށް ޑަލްމާ ބުންޏެވެ.

ގޯމޭޒް ބުނީ އުންމީދުކުރަނީ ސުޕަރހީރޯއިންގެ ބާރާއެކު އެކަމުގެ ރަނގަޅު އަސަރު އެކުދިންގެ ދިރިއުޅުމުން ފެނިގެންދިޔުންކަމަށެވެ.