ގްރޫޕް މާރާމާރީތަކުގައި އިތުރު ބަޔަކު ހަތިޔާރާއެކު ހައްޔަރު ކޮށްފި
7 މެއި 2022 | ހޮނިހިރު 16:55މާރާމާރީތަކާ ގުޅިގެން ހައްޔަރު ކުރީ ހަތަރު ފިރިހެނުން
މާރާމާރީ ހިންގައިގެން މަގު ބަންދުކޮށްފައި
އީދު ދުވަހުން ފެށިގެން މާލެ އާއި ހުޅުމާލޭގައި ހިންގި ގްރޫޕް މާރާމާރީތަކުގައި އިތުރު ހަތަރު މީހަކު ހަތިޔާރާއެކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާއިން ބުނީ މާރާމާރީތަކާ ގުޅިގެން ހުޅުމާލޭގެ ފުރަތަމަ ފިޔަވަހީގެ އެޕާޓްމަންޓެއް ބަލައި ފާސްކުރި އިރު މަސްތުވާތަކެއްޗާއި ތޫނު ހަތިޔާރު ފެނިފައިވާ ކަމަށެވެ. އަދި އެ މައްސަލައިގައި ހަތަރު ފިރިހެނުން ހައްޔަރު ކޮށްފައިވާ ކަމަށް ވެސް ބުނެފައި ވެއެވެ.
މި މައްސަލައިގައި ހައްޔަރު ކޮށްފައިވަނީ އުމުރުން 19 އަހަރުގެ މީހަކާއި 24 އަހަރުގެ މީހަކާއި 25 އަހަރުގެ މީހަކާއި 26 އަހަރުގެ މީހެކެވެ.
ފުލުހުން ބުނި ގޮތުގައި އެ އެޕާޓްމަންޓުން ފެނިފައިވަނީ އެކި ސައިޒުގެ ހަ ވަޅި އާއި މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ހަ ސެލޯފިން ކޮޅާއި ފިލްމް ހުސްކުރި ދެ ދަޅު ކަމަށެވެ.
މި މައްސަލައިގައި ހައްޔަރު ކުރި ހަތަރު މީހުންނަށް ވެސް ކޯޓުން ވަނީ 15 ދުވަހުގެ ބަންދުގެ މުއްދަތެއް ޖަހާފައެވެ.
މާލެ އާއި ހުޅުމާލޭގައި ހިންގި ގްރޫޕް މާރާމާރީތަކުގައި 18 އަހަރު ނުފުރޭ ކުޑަކުދިންތަކަކަށް ވެސް ތޫނު އެއްޗެހިން ހަމަލާ ދީފައިވާއިރު އެ މައްސަލަތަކުގައި މިހާތަނަށް ގިނަ ބަޔަކު ވަނީ ހައްޔަރުކޮށްފައެވެ. އަދި ބައެއް މީހުން ހޯދަން ފުލުހުން ވަނީ އިއުލާން ވެސް ކޮށްފައެވެ.
