ފުޓްބޯޅައިގެ ފްރީ ސްޓައިލް ވޯލްޑް ޗެމްޕިއަން ޝޯން ގާނިއަރ ރާއްޖެ އައިސްފައިވަނީ މޯލްޑިވްސް ސްޕޯޓްސް އެވޯޑްސްއާއެކު ރާއްޖެ އިޝްތިހާރުވެގެން ދިޔުމުގެ ތެރެއިން ކޮންޓެކްޓް ކޮށްގެން ކަމަށް މިނިސްޓަރު މަހްލޫފް ވިދާޅުވެއްޖެއެވެ.
ޗުއްޓީ ހޭދަ ކުރުމަށް މިވަގުތު ރާއްޖޭގައި ހުރި ޝޯން ވަނީ ކ.ގުޅީގައި މި ސަރުކާރުން ގާއިމުކޮށްފައިވާ ޓާފް ފުޓުބޯޅަ ދަނޑު ރަސްމީކޮށް ހުޅުވުމުގައި ބައިވެރިވެފައެވެ. ދަނޑު ހުޅުވައިދެއްވީ ފްރީ ސްޓައިލް ވޯލްޑް ޗެމްޕިއަން ޝޯން އަދި ޔޫތު މިނިސްޓަރު އަޙުމަދު މަޙްލޫފްއެވެ. މީގެ އިތުރުން ޝޯން އަދި މިނިސްްްޓަރ މަހްލޫފް ވަނީ އެރަށުގެ ފުޓްސަލް ދަނޑު ވެސް ހުޅުވާދެއްވާފައެވެ.
ދަނޑު ހުޅުވުމަށްފަހު މިނިސްޓަރު ވިދާޅުވީ އެ ދަނޑުގެ މަސައްކަތް ނިންމާ ހުޅުވުމަކީ ލިބުނު ހިތްހަމަ ޖެހުމެއް ކަމަށެވެ. އަދި މިހާރު ކުރިއަށްދާ ވަށާ ފެންސްގެ މަސައްކަތް ވެސް ވީ އެންމެ އަވަހަކަށް ނިންމާލެވޭނެ ކަމަށް އުންމީދު ކުރައްވާ ކަމަށެވެ. މީގެ އިތުރުން އެ ރަށުގެ ޒުވާނުން އެދޭ ގޮތަށް ދަނޑުގައި ރަނގަޅު ފެންވަރެއްގެ ލައިޓިންގ ސިސްޓަމެއް ވެސް ގާއިމުކުރުމާއި އެރަށުގެ ކަނބަލުން ވޮލީ ކުޅުމަށް ވޮލީ ކޯޓެއް ގާއިމުކުުރުމުގެ ކަންކަން ވެސް ބައްލަވާނެ ކަމަށް ވިދާޅުވިއެވެ.
ދަނޑު ހުޅުވުމުގެ ގޮތުން ގުޅީގެ ޓީމަަކާއި، ޔޫތު މިނިސްޓްރީގެ ޓީމަކާ ދެމެދު އެކުވެރި ކަމުގެ މެޗެއް ކުޅުނެވެ. އެ މެޗު 2-1ން ކާމިޔާބުކުރީ ގުޅީ ޓީމެވެ. މިނިސްޓްރީގެ ހަމައެކަނި ލަނޑު ޖެއްސެވީ މިނިސްޓަރެވެ.
އެންމެ ފަހު ހަރަކާތެއްގެ ގޮތުގައި ވަނީ ޝޯންގެ ހުނަރުވެރި ފްރީސްޓައިލް ހަރަކާތްތަކެއް ވެސް ކުރިއަށް ގެންގޮސްފައެވެ.
