ފައިނަލަށް ދެވުނީ ކުޅުންތެރިންނާއި ސަޕޯޓަރުންގެ ހިތްވަރުން: އަންޗެލޯޓީ
5 މެއި 2022 | ބުރާސްފަތި 06:13އަންޗެލޯޓީ ވަނީ ޗެމްޕިއަންސް ލީގުގެ ތިން ފައިނަލުގައި ލިވަޕޫލްއާއި ދެކޮޅަށް ކޯޗުކޮށްދީފައި
ރެއާލް މެޑްރިޑްގެ ކޯޗު ކާލޯ އަންޗެލޯޓީ
ޔުއެފާ ޗެމްޕިއަންސް ލީގުގެ ފައިނަލަށް ދަތުރު ކުރެވުނީ ޓީމުގެ ކުޅުންތެރިންނާއި ސަޕޯޓަރުންގެ ހިތްވަރުންކަމަށް ރެއާލް މެޑްރިޑްގެ ކޯޗު ކާލޯ އަންޗެލޯޓީ ބުނެފިއެވެ.
އަންޗެލޯޓީ ބުނީ ޓީމަށް ކުރިމަތިވި އެންމެ އުނދަގޫ ހާލަތުގައި އެންމެ ބޮޑަށް މަސައްކަތް ކުރީ ޓީމުގެ ކުޅުންތެރިންނާއި ސަޕޯޓަރުން ކަމަށެވެ. އެހެންކަމުން އޭނާ ވަނީ ސަޕޯޓަރުންނާއި ކުޅުންތެރިންނަށް ޚާއްސަ ޝުކުރެއް އަދާކޮށްފައެވެ.
އިދިކޮޅުން ކުޅުނު މެންޗެސްޓަރ ސިޓީއަކީ ވަރުގަދަ ޓީމެއްކަން ފާހަގަކޮށް އަންޗެލޯޓީ ބުނީ ފަހަތުން އަރާ މޮޅުވެވުނީ ނަސީބާއި، ހިތްވަރާއި އެތައް ގުރުބާނީއަކުން ކަމަށެވެ. މި މެޗުގައި ޓީމުގެ ފަރާތުން އޭނާ ހިތްހަމަޖެހޭ ވަރުގެ ރަނގަޅު ކުޅުމެއް ފެނުނުކަން ފާހަގަކޮށް އަންޗެލޯޓީ ބުނީ ޓީމު ފައިނަލަށް ދަތުރުކުރީ މުބާރާތުގައި ވާދަކުރި އެންމެ ވަރުގަދަ ޓީމުތައް ބަލިކޮށްފައި ކަމަށެވެ. ރެއާލް މުބާރާތުގެ ފައިނަލަށް ދަތުރުކުރީ ސެމީ ފައިނަލުގައި މެންޗެސްޓަރ ސިޓީގެ މައްޗަށް ފަހަތުން އަރާ ކުރި ހޯދައިގެންނެވެ.
ފުރަތަމަ ލެގުގައި އެއް ލަނޑުގެ ތަފާތުން ޓީމު ބަލިވެފައި އޮތުމުން ކުޅުންތެރިންނަށް ހިތްވަރު ދިނުމުގެ ގޮތުން މި މެޗަށް ނިކުތުމުގެ ކުރިން މުބާރާތުގައި ފަހަތުންއަރާ ކުރި ހޯދި ހުރިހާ މެޗެއްގެ ވީޑިއޯ ކުޅުންތެރިންނަށް ދައްކާފައި ވާނެކަމަށް އަންޗެލޯޓީ ބުންޏެވެ. އަދި އެވީޑިއޯ ނިމުނު ތަނުގައި އަދި އެއް "ކަމްބެކް" ހަދަން ޖެހޭނެކަން ފާހަގަކޮށްފައިވެއެވެ.
މުބާރާތުގެ ފައިނަލުގައި ރެއާލް ބައްދަލުކުރާނީ ލިވަޕޫލްއާއެވެ. އަންޗެލޯޓީ ބުނީ ލިވަޕޫލް އާއި އެޓީމުގެ ކޯޗު ޖާގަން ކްލޮޕް ވަރަށް ރަނގަޅަށް ދަންނަ ކަމަށެވެ. އަދި މެޗަށް ނިކުންނާނީ އިދިކޮޅު ޓީމަށް ފުރިހަމައަށް އިހްތިރާމް ކޮށްގެން ކަމަށްވެސް އޭނާ ބުންޏެވެ. އަންޗެލޯޓީ ވަނީ ޗެމްޕިއަންސް ލީގުގެ ތިން ފައިނަލުގައި ލިވަޕޫލްއާއި ދެކޮޅަށް ކޯޗުކޮށްދީފައެވެ.
