ރެއާލް ފައިނަލަށް، ސިޓީގެ އުންމީދުތައް ފެނަށް!
ބެންޒެމާ ވަނީ މި ސީޒަންގައި 43 މެޗު ކުޅެގެން 43 ލަނޑު ޖަހާފައި
ޗެމްޕިއަންސް ލީގުގައި ރެއާލް އާއި ސިޓީ ބައްދަލުކުރި ސެމީގެ ދެވަނަ މެޗުގެ ތެރެއިން
ޔުއެފާ ޗެމްޕިއަންސް ލީގު ސެމީ ފައިނަލުގެ ދެވަނަ މެޗުގައި މެންޗެސްޓަރ ސިޓީ ބަލިކޮށް ރެއާލް މެޑްރިޑް މުބާރާތުގެ ފައިނަލުގެ ޖާގަ ކަށަވަރުކޮށްފިއެވެ.
ބުދަ ދުވަހުގެރޭ ރެއާލްގެ ބެރްނާބެއު ސްޓޭޑިއަމްގައި ކުޅުނު މި މެޗު އެޓީމުން ކާމިޔާބުކުރީ 3-1 ންނެވެ. މި މެޗުން ރެއާލް މޮޅުވިއިރު ސެމީ ފައިނަލުގެ ފުރަތަމަ މެޗުން އެޓީމު ބަލިވީ 4-3 ންނެވެ. ރޭގެ ނަތީޖާއާއެކު ރެއާލް ފައިނަލަށް ދަތުރުކުރީ 6-5 ން އެގްރިގޭޓުން ކުރި ހޯދައިގެންނެވެ.
މުބާރާތުން ކެޓުމާއެކު ސިޓީން ފުރަތަމަ ފަހަރަށް ޗެމްޕިއަންސް ލީގު ހޯދުމަށް ކުރަމުން އައި މަސައްކަތް ނާކާމިޔާބުވީއެވެ. ސިޓީއަށް މިހާތަނަށް ޗެމްޕިއަންސް ލީގު ކާމިޔާބު ކުރެވިފައެއް ނުވެއެވެ.
މި މެޗުގައި ފުރަތަމަ ލަނޑުޖަހާ ލީޑު ނެގީ ސިޓީންނެވެ. މެޗުގެ 73 ވަނަ މިނެޓުގައި ގޯލުގެ ކައިރި ކަނަށް ބޯޅަ ވައްދާލައިގެން ސިޓީއަށް ލީޑު ނަގައިދިނީ ރިޔާދް މާރޭޒްއެވެ. އޭގެ ފަހުންވެސް ލީޑު ފުޅާކުރުމަށް ސިޓީއަށް ރަނގަޅު ފުރުސަތުތަކެއް ލިބުނެވެ. ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޖެކް ގްރީލިޝް ފޮނުވާލި ފުރަތަމަ ހަމަލާ ރެއާލްގެ ޑިފެންޑަރު ފާލަންޑް މެންޑީ ގޯލު ރޮނގުމަތިން ދިފާއުކުރިއިރު، ދެވަނަ ހަމަލާ މަތަކުރީ ކީޕަރު ތީބޯ ކޯޓުއާއެވެ.
ރެއާލްގެ ދެލަނޑުވެސް ފެނުނީ މެޗުގެ ފަހު ވަގުތުގައެވެ. ބެންޒެމާގެ ޕާހަކުން މެޗުގެ 89 ވަނަ މިނެޓުގައި ލަނޑުޖަހާ ރެއާލްއަށް އުންމީދު އައުކޮށްދިނީ ރޮޑްރިގޯއެވެ. އިތުރު ވަަގުތުގެ ގޮތުގައި ދެއްކި ހަ މިނެޓުގެ ތެރެއިން ދެވަނަ މިނެޓުގައި ރެއާލްގެ ދެވަނަ ލަނޑުވެސް ކާމިޔާބުކޮށްދިނީ ރޮޑްރިގޯއެވެ. މިއީ ކަވާހާލް ނެގި ހުރަހަކުން އޭނާ ޖެހި ލަނޑެކެވެ. މެޗުގެ ފުރިހަމަ ވަގުތު ހަމަވިއިރު ދެޓީމު އެގްރިގޭޓުގެ ގޮތުން އެއްވަރުވީ 5-5 ންނެވެ.
ރެއާލް ފަައިނަލުގެ ޖާގަ ކަށަވަރުކުރީ އިތުރު ވަގުތުގެ ދެހާފު ކުޅެގެން ނަތީޖާ ނެރެގެންނެވެ. އިތުރު ވަގުތުގެ ފުރަތަމަ ހާފުގައި ރެއާލް ފައިނަލަށް ގެންގޮސްދިން ލަނޑު ކާމިޔާބު ކޮށްދިނީ ޓީމުގެ ކެޕްޓަން ކަރިމް ބެންޒެމާއެވެ. މިއީ ސިޓީގެ އޭރިއާ ތެރެއިން އެޓީމުގެ ކެޕްޓަން ރުބެން ޑިއާސް ބެންޒެމާއަށް ކުރި ފައުލަކާއި ގުޅިގެން ރެފްރީ ދިން ޕެނަލްޓީއެކެވެ.
މި ލަނޑާއެކު ބެންޒެމާ ވަނީ މި ސީޒަންގައި 43 މެޗު ކުޅެގެން 43 ލަނޑު ޖަހާފައެވެ. އަދި ޗެމްޕިއަންސް ލީގުގެ އެއް ސީޒަނެއްގެ ނޮކްއައުޓް ސްޓޭޖުގައި 10 ލަނޑު ޖަހާ އޭނާ ވަނީ ކްރިސްޓިއާނޯ ރޮނާލްޑޯގެ ރެކޯޑާއި ހަމަކޮށްފައެވެ.
