ރާއްޖޭގެ ދެ ސަރަހައްދެއްގައި މެރިން ޕޮލިސް ޚިދުމަތް ފުޅާކުރުމަށް ގިނަ މަސައްކަތްތަކެއް ކުރަމުންދާކަމަށް ފުލުހުން ބުނެފިއެވެ.
އަންގާރަ ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން ސަބް އިންސްޕެކްޓަރ އޮފް ޕޮލިސް ޒަހީރު އީސާ ވިދާޅުވީ، މެރިން ޕޮލިސް ހަރުދަނާ ކުރުމަށް ގިނަ މަސައްކަތްތަކެއް ކުރެވޭ ކަމަށެވެ. އެގޮތުން ރާއްޖޭގެ ދެ ސަރަހައްދެއްގައި މެރިން ޕޮލިސް ޚިދުމަތް ފުޅާކުރުމަށް މިހާރުވެސް ގިނަ މަސައްކަތްތަކެއް ކުރެވެމުންދާކަމަށް އޭނާ ވިދާޅުވިއެވެ.
އެ ބަދަލުތައް މި އަހަރުގެ ތެރޭގައި ފެނިގެންދާނެކަމަށް އުއްމީދު ކުރެވޭކަމަށްވެސް އޭނާ ވިދާޅުވިއެވެ.
ޒަހީރު އިތުރަށް ވިދާޅުވީ، މިވަގުތު އޮތް އެންމެ ބޮޑު އެއް ގޮންޖެހުމަކީ ބޭނުންވާ ވަސީލަތްތައް ނެތުންކަމަށެވެ. އެގޮތުން ރާއްޖެއަކީ ބޮޑު ކަނޑުގެ ސަރަހައްދެއް އޮންނަ ގައުމަކަށްވާއިރު، އެކަށީގެންވާ ވަސީލަތްތައް ހުރުމުގެ މުހިއްމުކަން އޭނާ ފާހަގަކުރެއްވިއެވެ.
ހަމައެއާއެކު، ކަނޑުދަތުރުކުރާ ފަރާތްތަކާއި އުޅަނދުތައް ދުއްވާ ފަރާތްތަކުންވެސް އަދާކުރަންޖެހޭ ޒިންމާތައް ފުރިހަމައަށް އަދާކުރުމަށް އޭނާ ވަނީ އެދިވަޑައިގެންފައެވެ.
މި ޕްރޮގްރާމްގައި ބައިވެރިވެވަޑައިގެން ދެއްކެވި ވާހަކައިގައި ސަބް އިންސްޕެކްޓަރ އޮފް ޕޮލިސް ރިމާޒް އަބްދުއްރަހީމް ފާހަގަކުރެއްވި ގޮތުގައި، ދިވެހި ފުލުހުންގެ ޚިދުމަތުގެ އައު ގާނޫނުގެ ދަށުން މެރިން ފުލުހުންނަށްވެސް އިތުރު ޒިންމާތަކެއް ވަނީ ހަވާލުކޮށްފައެވެ.
ވުމާއެކު، ގާނޫނީގޮތުން މެރިން ފުލުހުންގެ މައްޗަށް ލާޒިމުކޮށްފައިވާ ޒިންމާތައްވެސް ކުރިއަށްވުރެ ބޮޑަށް އިތުރުވެފައިވާކަން އޭނާ ފާހަގަ ކުރެއްވިއެވެ.
އަޅުގަނޑުމެންނަށް ގާނޫނީ ގޮތުންވެސް އެބައިން މެރިން ޕޮލިހުންގެ ދައުރެއް. އަލަށް އެކުލަވާލެވުނު ފުލުހުންގެ ޚިދުމަތުގެ ގާނޫނުގެ 5 ވަނަ ނަންބަރުގެ ރ ގެ 8 ވަނަ ނަންބަރަށް މެރިން ފުލުހުންގެ ދައުރެއް އެބަ އޮތް ބަޔާން ކޮށްފަ. އެއީ ކުރިން ގާނޫނުގައި ނެތް ކަމެއް.ސަބް އިންސްޕެކްޓަރ އޮފް ޕޮލިސް ރިމާޒް އަބްދުއްރަހީމް
އޭގެ އިތުރުން، މިއީ މޫސުން ގޯސް ދުވަސްވަރަކަށްވާތީ، މޫސުމަށް ސަމާލުވުމަށްވެސް ފުލުހުން ވަނީ އިލްތިމާސްކޮށްފައެވެ.
