ޑައިވް ކުރަން ޏ. ފުވައްމުލަކު ކައިރިއަށް ފޭބި މުހައްމަދު ސައީދު އަދިވެސް ނުފެންނަ ކަމަށް އެމްއެންޑީއެފުން ބުނެފިއެވެ.

ސައީދު ގެއްލުނީ ހޯމަ ދުވަހުގެ ވަގުތެއްގައި އޭނާ އާއި އިތުރު މީހަކު ޑައިވިންއަށް ގޮސްއުޅެނިކޮށެވެ. އޭނާ ގެއްލުނު ސަރަހައްދު އެމްއެންޑީއެފުން ދަނީ ބަލައި ފާސްކުރަމުންނެވެ.

އެމްއެންޑީއެފް އިން ބުނި ގޮތުގައި ބުދަ ދުވަހު އެކަނިވެސް ސައީދު ހޯދަން ހަތަރު ޑައިވް ކޮށްފައިވެއެވެ. ނަމަވެސް އޭނާ ފެނިފައި ނުވާ ކަމަށާއި ޑައިވް ބެލްޓެއް އެ ސަރަހައްދުގެ 68 މީޓަރު އަޑިން ފެނިފައިވާ ކަމަށް ބުނެފައިވެއެވެ.

އެމްއެންޑީއެފްގެ ޑައިވަރުންނަށް އެ ސަރަހައްދުން އަންގާރަ ދުވަހުވެސް ސައީދު މަސް ބާނަން ގެންގުޅުނު ބައެއް ތަކެތި ވަނީ ފެނިފައެވެ. އެތަކެތި ފެނިފައިވަނީ 59 މީޓަރު އަޑިންނެވެ.

ކޯސްޓްގާޑާއި ފުވައްމުލަކުގެ ޑައިވަރުން ގުޅިގެން ސައީދު ހޯދުމުގެ މަސައްކަތް ކުރަމުން އަންނައިރު މޫސުން ގޯސްވުމުގެ ސަބަބުން ގޮންޖެހުންތަކާ ކުރިމަތިވި ކަމަށް އެމްއެންޑިއެފުން ބުނެފައިވެއެވެ.

ސައީދު ޑައިވިންގ އަށް ފޭބީ 2022 މެއި 2 ވަނަ ދުވަހުގެ 14:30 ހާއިރުކަމަށާއި، ފީނަން ފޭބިއިރު އޭނާ ލައިގެން ހުރީ ކަޅުކުލައިގެ ޑައިވިންގ ސޫޓަކާއި ކަޅުކުލައިގެ ފިންސެއް ކަމަށާއި، އަޅައިގެން ހުރީ ކަޅުކުލައިގެ މާސްކެއްކަމަށާއި، އަދި އޭނާގެ އަތުގައި ރީނދުލާއި އޮރެންޖު ކުލައިގެ ބެލޫނެއް އޮންނާނެކަމަށް ކޯސްޓްގާޑަށް މައުލޫމާތު ލިބިފައިވާކަމަށް އެފަރާތުން ހާމަކުރެއެވެ.

ފުވައްމުލަކު "ޓައިގަރ ޝާކް" ޑައިވިންގ ޕޮއިންޓަށް ފޭބި ސައީދު ގެއްލުނުކަމުގެ މައުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ)އަށް ލިބިފައިވަނީ 2022 މެއި 2 ވަނަ ދުވަހު 15:36 ހާއިރުއެވެ.

ސައީދުއާ ބެހޭ އެއްވެސް ޚަބަރެއް ވޭތޯ އެ ސަރަހައްދުން ދަތުރުކުރާ އުޅަނދުފަހަރުން ބަލައިދިނުމަށް އެމްއެންޑީއެފުން ވަނީ އެދިފައެވެ. އަދި އޭނާއާ ބެހޭ އެއްވެސް މައުލޫމާތެއް ލިބިއްޖެނަމަ ލަސްނުކޮށް ކޯސްޓްގާޑުގެ ހިލޭ ގުޅޭ ނަންބަރު 191ށް ގުޅުމަށް އެމްއެންޑީއެފުން އެދެއެވެ.

ސައީދުއާއެކު ޑައިވިންއަށް ދިޔަ މަހުމޫދު ފާއިޒު ވަނީ ހާލު ދެރަވުމުގެ ސަބަބުން ވަގުތުން ދ. އަތޮޅު ކަނޑިންމައިގައި ހުރި ޑީކޯ ޗެމްބަރަށް ގެންގޮސްފައެވެ.