ރ.މަޑުއްވަރީ ބުލޫޕްރިންޓް ހަބް ފުޓްސަލް މުބާރާތުގެ ޗެމްޕިއަން ޓީމަށް 30،000 ރުފިޔާ! މުބާރާތް ފަށައިފި
10 ޓީމާއެކު މުބާރާތް ފަށައިފި
މުބާރާތް ފައްޓަވައިދެއްވީ ޤައުމީ ޓީމްގެ ކުރީގެ ޑިފެންޑަރު ސޮބާހު މުޙައްމަދު
ޗެމްޕިއަން ޓީމަށް 30,000 ރުފިޔާ ކަނޑައެޅިފައިވާ ބުލޫޕްރިންޓް ހަބް ފުޓްސަލް މުބާރާތް ރ.މަޑުއްވަރީގައި ފަށައިފިއެވެ.
މުބާރާތުގެ ފުރަތަމަ ދެ މެޗު ކާމިޔާބުކުރީ ޕެންތާރސް ސްޕޯރޓްސް ކްލަބާއި, ޓީމް ވާލެވެ. ޕެންތާރސް މެޗު ކާމިޔާބުކުރީ ނޮދާރންސްއާ ވާދަކޮށް 5-4 ނެވެ. މެޗުގައި ޕެންތާރސް ސްޕޯރޓްސް ކްލަބްގެ ހަސަން ތަސްލީމާއި, އިބްރާހީމް ޒިހުނީ، ކޮންމެ ކުޅުންތެރިއަކު ދެ ލަނޑު ޖެހިއެވެ. އެޓީމްގެ އަނެއް ލަނޑު ޖެހީ މެޗުގެ މޮޅު ކުޅުންތެރިޔާ މުޙައްމަދު ޖުމާން އަހުމަދެވެ. ނޮދާރންސްގެ ލަނޑުތައް ޖެހީ ހަސަން ސާމިރު, މާއިސް މުޙައްމަދު, މުސާ ނާޖިހު އަދި އާދަމް މުޒުހިރުއެވެ.
ޓީމް ވާލު މެޗު ކާމިޔާބުކުރީ ބީބީ ނިއުޖެނެރޭޝަންއާ ވާދަކޮށް 3-1 ނެވެ. މެޗުގައި ޓީމް ވާލުގެ އަހުމަދު ނާހީ ދެ ގޯލް ޖެހިއެވެ. އެޓީމްގެ އަނެއް ލަނޑުޖެހީ މެޗުގެ މޮޅު ކުޅުންތެރިޔާ މުޙައްމަދު އިރުޝާމްއެވެ. ބީބީ ނިއު ޖެނެރޭޝަންގެ ހަމައެކަނި ލަނޑުޖެހީ ހަސަން ޖަވާދުއެވެ. މިމުބާރާތުގައި ރާއްޖޭގެ އެންމެ މޮޅު ފުޓްސަލް ކުޅުންތެރިން ޓީމްތަކަށް ކުޅެއެވެ. އޭގެތެރޭގައި އަހުމަދު އަޔާޒު (އަޔާ), ހުސައިން ޝަރީފް (އޮންލީ), އިބްރާހީމް މުބީން (މުއްކި), އަދި އައްޒާމް ހިމެނެއެވެ.
