ސެކުރިޓީ ފީޗާތަކާ އެކު ވޮލީ މުބާރާތުގެ ޓިކެޓް ވިއްކަނީ
ޓިކެޓުތަކުގައި އެސޯސިއޭޝަންގެ ތައްގަނޑާއެކު ވެރިއެއްގެ ސޮއި
ދިވެހިރާއްޖޭގެ ސީނިއާ ފިރިހެން ވޮލީ ޓީމުގެ ކުޅުންތެރިން
ބުދަ ދުވަހު ފެށުމަށް ހަމަޖެހިފައިވާ އޭޝިއަން މެންސް ސެންޓްރަލް ޒޯން ވޮލީބޯލް ޗެމްޕިއަންޝިޕްގެ މެޗުތައް ބަލަން ޒުވާނުންގެ މަރުކަޒަށް ވަނުމަށް ނަގަންޖެހޭ ޓިކެޓް ސެކިއުރިޓީ ފީޗާ ތަކެއް އެކުލެވޭނެ ކަމަށް މި މުބާރާތުގެ ޗެއާމަން މުހައްމަދު ޝާފީ ވިދާޅުވެއްޖެ އެވެ.
ރާއްޖެޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަވަމުން ވީއޭއެމްގެ ޑައިރެކްޓާރ އެންޑް މާކެޓިންގެ މަގާމު އަދާކުރައްވާ ޝާފީ ވިދާޅުވީ ޒުވާނުންގެ މަރުކަޒަކީ މިވަރުގެ މުބާރާތަކަށް ސަޕޯޓަރުން ވަނުމަށް ބަލާއިރު ޖާގައިގެ ދަތިކަން އިންތިހާއަށް ދިމާވާނެ ތަނެއް ކަމަށާއި އެހެން ކަމުން މެޗު ބަލަން ވަންނަ ސަޕޯޓަރުންގެ އަދަދު ދެނެގަތުމަށް ޓިކެޓްތަކުގައި ހާއްސަ ކަންތައްތަކެއް އެކުލެވޭނެ ކަމަށެވެ.
ޝާފީ ވިދާޅުވީ މުބާރާތުގައި ވާދަކުރާ ހަތަރު ގައުމު މެޗުތައް ކުޅޭއިރު، ކޮންމެ ދުވަހެއްގެ ޓިކެޓެއްގައި ވެސް ތަފާތު ކަމެއް ހުންނާނެ ކަމަށާއި އަދި އެ ޓިކެޓުތަކުގައި އެސޯސިއޭޝަންގެ ތައްގަނޑާއެކު ވެރިއެއްގެ ސޮއި އެކުލެވިފައިވާނެ ކަމަށެވެ.
ވީއޭއެމްގެ ޑައިރެކްޓާރ އެންޑް މާކެޓިންގ މުހައްމަދު ޝާފީ
ޝާފީ ވިދާޅުވީ މިފަދަ ބޮޑު މުބާރާތެއް ރާއްޖޭގައި ބޭއްވެނީ ގިނަ ހަރަދުތަކެއް ކޮށްގެން ކަމަށާއި އެހެން ނަމަވެސް ޓިކެޓް ވިއްކައިގެން މާބޮޑު ފައިދާތަކެއް ހޯދުމުގެ އެއްވެސް ވިސްނުމެއް ނުގެންގުޅޭ ކަމަށެވެ.
މި މުބާރާތުގެ ޓިކެޓް ވިއްކުމުގައި މާގިނަ ހަރަކާތްތަކެއް ރޭވިފައި ނެތް ނަމަވެސް މިއަދުން ފެށިގެން ރާއްޖެއާއި ކިރިގިސްތާނު މެޗުގެ ޓިކެޓް ޒުވާނުންގެ މަރުކަޒުން ލިބެން ހުންނާނެ ކަމަށާއި އެހެން ނަމަވެސް ބުދަ ދުވަހުން ފެށިގެން ހުރިހާ މެޗުތަކެއްގެ ޓިކެޓް އެއްކޮށް ވިއްކަން ހުންނާނެ ކަމަށް ވެސް ވީއޭއެމުން މައުލޫމާތުދެ އެވެ.
މި މުބާރާތުގެ ޓިކެޓް ވިއްކުމަށް ހަމަޖެހިފައި ވަނީ 50 ރުފިޔާ އަށެވެ. އަދި މި ޓިކެޓަކީ "ސްވެނިއާ" ޓިކެޓެއްގެ ގޮތުގައި ބޭނުން ކުރެވޭނެ އެއްޗެއް ކަމަށް ވެސް އެފަރާތުން މައުލޫމާތުދެ އެވެ.
