މިއަހަރުގެ ނޮވެމްބަރު މަހު ފަށާ ފީފާ ވޯލްޑް ކަޕްގެ ކޮލިފިކޭޝަންގައި މިސްރާއި ސެނެގާލް ބައްދަލުކުރި މެޗުގައި، މުހައްމަދު ސަލާހްގެ މޫނަށް ސެނެގާލްގެ ސަޕޯޓަރުން ލޭޒަރ ލައިޓް އެޅުވުމުން، ފުޓްބޯޅައިގެ މައި އިދާރާ ފީފާއިން ސެނެގާލްގެ ފުޓްބޯޅަ ފެޑެރޭޝަން ޖޫރިމަނާ ކޮށްފިއެވެ.

ކުޅިވަރުގެ ރޫހާ ޚިލާފަށް ސެނެގާލްގެ ސަޕޯޓަރުން ކުރި އަމަލުތަކަށް ބަލައި ފީފާއިން ވަނީ އެގައުމުގެ އެފްއޭ 180،000 ޔޫއެސް ޑޮލަރުން ޖޫރިމަނާކޮށްފައެވެ. ކޮލިފިކޭޝަންގެ ފަހު މެޗުގައި ޕެނަލްޓީ ޖަހައިގެން މޮޅުވެގެން ސެނެގާލް ވަނީ ވޯރލްޑް ކަޕުގެ ޖާގައެއް ކަށަވަރު ކޮށްފައެވެ. މި މެޗުގައި ސަލާހް ޕެނަލްޓީ ޖެހިއިރު ސެނެގާލްގެ ސަޕޯޓަރުން ވަނީ އޭނާގެ މޫނަށް ފެހި ކުލައިގެ ލޭޒަރ ލައިޓެއް އަޅުވާފައެވެ. ސަލާހް ޖެހި ޕެންލަޓީ ދިޔައީ ގޯލުގެ ހުރަސް ދަނޑި މަތިން ބޭރަށެވެ.

މި މައްސަލަ ބެލި ފީފާގެ ޑިސިޕްލިނަރީ ކޮމިޓީން ބުނީ، ސެނެގާލްއިން ވަނީ ސްޓޭޑިއަމްގެ ގަވައިދުތައް ތަންފީޒު ކުރުމުގައި ފެއިލްވެފައި ކަމަށެވެ. ޖޫރިމަނާކުރުމުގެ އިތުރުން ފީފާއިން ވަނީ، ސެނެގާލްގެ ކުރިއަށް އޮތް ވާދަވެރި މެޗެއް ސަޕޯޓަރުން ސްޓޭޑިއަމްއަށް ނުވައްދައި ކުޅޭގޮތަށް ނިންމާފައެވެ.

ފީފާގެ ޑިސިޕްލިނަރީ ކޮމިޓީން ވަނީ ވޯރލްޑް ކަޕް ކޮލިފިކޭޝަންގައި ހިނގި މިފަދަ އެތައް މައްސަލައެއް ބަލާފައެވެ. އެގޮތުން ޖެނުއަރީ މަހުން ފެށިގެން ކުޅުނު ކޮލިފިކޭޝަން މެޗުތަކުގައި ދިމާވި މިފަދަ ހާދިސާތަކަށް ބަލައި، ބައެއް ގައުމުތަކުގެ ފުޓްބޯޅަ ފެޑެރޭޝަން ޖޫރިމަނާކުރުމާއި ސްޓޭޑިއަމް ބަންދު ކުރުންފަދަ ފިޔަވަޅުތައް ފީފާއިން އަޅާފައިވެއެވެ.

މީގެ ތެރޭގައި ނައިޖީރިއާގެ ސަޕޯޓަރުން ސްޓޭޑިއަމްގައި ހަމަނުޖެހުން ހިންގުމުގެ ސަބަބުން 154،000 ޑޮލަރުން ޖޫރިމަނާކުރުން ހިމެނެއެވެ. އަދި މިފަދަ އަމަލުތައް ކޮށްގެން 128،000 ޑޮލަރުން ކޮންގޯ ޖޫރިމަނާ ކޮށްފައި ވާއިރު، ލެބަނަން ވަނީ 103،000 ޑޮލަރުން ޖޫރިމަނާ ކޮޮށްފައެވެ. އަދި ސަޕޯޓަރުންގެ މެދުގައި ނަސްލީ ތަފާތުކުރުން ގެންގުޅުމުގެ ސަބަބުން 98،000 ޑޮލަރުން ޗިލީ ޖޫރިމަނާކޮށް 56،500 ޑޮލަރުން ކޮލޮމްބިއާވެސް ޖޫރިމަނާކޮށްފައިވެއެވެ.