ސަލާހްގެ އިންޒާރެއް ރެއާލްއަށް!

ޔުއެފާ ޗެމްޕިއަންސް ލީގުގެ ފައިނަލް ކުޅެން ދެތިންދުވަހަށް ވެފައި ވަނިކޮށް ލިވަޕޫލްގެ ތަރި މުހައްމަދު ސަލާހް، ރެއާލް މެޑްރިޑަށް ވަރުގަދަ އިންޒާރެއް ދީފިއެވެ.

މުބާރާތުގެ ފައިނަލް މެޗުގައި ބައްދަލުކުރާނީ ލިވަޕޫލާއި ރެއާލް މެޑްރިޑެވެ. 2018 ވަނަ އަހަރު ޗެމްޕިއަންސް ލީގުގެ ފައިނަލުގައި ވެސް ބައްދަލުކުރީ ރެއާލްއާއި ލިވަޕޫލްއެވެ. އެމެޗުގައި ރެއާލްއަށް އޭރު ކުޅެމުން އައި ސާޖިއޯ ރާމޯސް ކުރި ނުރައްކާތެރި ފައުލަކާއި ގުޅިގެން ސަލާހްއަށް އަނިޔާވެ، އޭނާ ވަނީ ބަދަލުކޮށްފައެވެ. އެފަހަރުގެ މުބާރާތުގައި ލިވަޕޫލް ބަލިކޮށް ތަށި ކާމިޔާބުކުރީ ރެއާލްއެވެ.

ޕްރިމިއަރ ލީގު މި ސީޒަންގެ ރަން ބޫޓު، އަދި އެންމެ ގިނަ ލަނޑު ޖެހުމަށް އެހީތެރިވި ކުޅުންތެރިޔާގެ މަގާމު މިފަހަރު ހޯދީ ސަލާހްއެވެ. އެންމެ ގިނަ ލަނޑު ޖެހި ކުޅުންތެރިޔާގެ މަގާމަށް ޓޮޓެންހަމްގެ ސޮންވެސް ހޮވުނެވެ. މި ދެކުޅުންތެރިންވެސް މުބާރާތުގައި 23 ލަނޑު ޖަހާފައިވެއެވެ. މި ޓްރޮފީ ހިފައިގެން ސަލާހް ނަގާފައިވާ ފޮޓޯއެއް ޓްވީޓް ކުރުމަށްފަހު އޭނާ ވަނީ "ވީ އާރ ނޮޓް ޑަން ޔެޓް" ކަމަށް ބުނެފައެވެ. މިއީ ކުރިއަށް އޮތް ޗެމްޕިއަންސް ލީގުގެ ފައިނަލަށް އަމާޒުކޮށް އޭނާ ބުނެފައިވާ ބުނުމެކެވެ.

2018 ވަނަ އަހަރު މި ދެޓީމު ކުޅުނު ފައިނަލްގައި ރެއާލްގެ ސާޖިއޯ ރާމޯސް ސަލާހްއަށް ފައުލްކުރީ ގަސްތުގައި ކަމަށް ލިވަޕޫލްގެ ގިނަ ސަޕޯޓަރުން ބުނެއެވެ. އެއީ ސަލާހްއަކީ ޓީމުގެ އެންމެ މުހިންމު ކުޅުންތެރިޔާއަށް ވާތީ ރާމޯސް ކުރި ފައުލެއް ކަމަށްވެސް ގިނަ ބަޔަކު ބުނެއެވެ.

މިއަހަރުގެ ޕްރިމިއަރ ލީގު ލިވަޕޫލްއަށް ނާކާމިޔާބުވީ މުބާރާތުގެ ފަހު މެޗުގައެވެ. ފަހު މެޗުގައި ވުލްވްސް އަތުން ލިވަޕޫލް މޮޅުވި ނަމަވެސް، މެންޗެސްޓަރ ސިޓީ ވަނީ އެސްޓަން ވިލާ ބަލިކޮށް ޕޮއިންޓެއްގެ ފަރަގުން މުބާރާތް ކާމިޔާބުކޮށްފައެވެ. އެހެންކަމުން މިހާރު ލިވަޕޫލްގެ އަމާޒު އޮތީ ޗެމްޕިއަންސް ލީގު ކާމިޔާބު ކުރުމަށެވެ.

މިއަހަރުގެ އެފްއޭ ކަޕްވެސް ކާމިޔާބުކުރީ ލިވަޕޫލްއެވެ. މުބާރާތުގެ ފައިނަލުގައި ސަލާހްއަށް އަނިޔާވެގެން ދަނޑުން ބޭލި ނަމަވެސް ޗެމްޕިއަންސް ލީގުގެ ފައިނަލަށް އޭނާ ފިޓްވާނެއެވެ.