ނ. ހޮޅުދޫ ބާފާ ޖަމްއިއްޔާއިން އެރަށުގައި ބާއްވާ ސޮކަރ ކަޕް ފުޓްބޯޅަ މުބާރާތުގެ ފުރަތަމަ މެޗު އެއްވަރުވެއްޖެއެވެ. ފިތުރު އީދުގެ މުނާސަބަތުގައި މިއަދު ފެށި މުބާރާތުގެ ފުރަތަމަ މެޗުގައި ވާދަކުރީ ހޮޅުދޫ ދަ ސިޓީއާއި, ހެނބަދޫ ޑީޓޫ ސްޕޯރޓްސް ކްލަބެވެ. މެޗު އެއްވަރުވީ 4-4ންނެވެ.

މެޗުގައި ފުރަތަމަ ތިންގޯލް ފުރަތަމަ ހާފްގައި ޖެހީ ދަ ސިޓީންނެވެ. 27 މިނިޓްގެ ތެރޭގައި ދަ ސިޓީގެ ތިން ލަނޑު ޖަހައިދިނީ ހުސެއިން ޝައްފާހުއާއި އަހުމަދު ސައްޔާހުއެވެ. ފުރަތަމަ ލަނޑާއި ތިންވަނަ ލަނޑު ޖެހީ ޝައްފާހުއެވެ. ޑީ ޓޫ ސްޕޯރޓްސްގެ މުހައްމަދު ވަހީދު ލަނޑެއް ޖަހާފައި ވަނިކޮށް, ފުރަތަމަ ހާފްގެ އިތުރު ވަގުތުގައި ދަ ސިޓީން އެމީހުންގެ ހަތަރުވަނަ ލަނޑު ޖެހިއެވެ. ހަތަރު ވަނަ ލަނޑު ޖެހީ އުނެއިޝް ޒުބައިރުއެވެ. ޑީޓޫ ސްޕޯރޓްސްއިން މެޗު އަނބުރާލީ ދެވަނަ ހާފްގައެވެ. ދެވަނަ ހާފްގައި އެޓީމްގެ ތިން ލަނޑު ޖެހީ ހުސެއިން އަބްދުﷲއާއި މުހައްމަދު ވަހީދެވެ. ފުރަތަމަ ހާފްގައިވެސް ލަނޑު ޖެހި މުހައްމަދު ވަހީދު ހެޓްރިކް ހަދައި ޓީމް އެއްވަރުކޮށްދިނީ އިތުރު ވަގުތުގައި ލަނޑު ޖަހައިގެންނެވެ. މެޗުގެ މޮޅު ކުޅުންތެރިއަކީވެސް އޭނާއެވެ.

މުބާރާތުގެ ދެވަނަ މެޗުގައި އަންގާރަ ދުވަހު ވާދަކުރާނީ ހޮޅުދޫ އެފްސީ ބޭސް ސިޓީއާއި މަގޫދޫ ފުޓްބޯޅަ ޓީމެވެ. މުބާރާތުގައި ވާދަކުރަނީ ފަސް ޓީމެވެ. ލީގުބުރު ނިމޭއިރު އެންމެ ގިނަ ޕޮއިންޓް ހޯދާ ޓީމަށް ފައިނަލްގެ ފުރަތަމަ ޖާގަ ލިބޭނެއެވެ. ދެވަނަ ޖާގަ ހޯދަން ދެވަނަ ޓީމާއި ތިންވަނަ ޓީމް ޖެހޭނީ ޕްލޭއޮފްއެއް ކުޅޭށެވެ. މިއީ މިދިޔަ 15 އަހަރުގެ ތެރޭގައި މިމުބާރާތް ބާއްވާ 13 ވަނަ ފަހަރެވެ. މެދުކެނޑުނީ ކޯވިޑްގެ ހާލަތުގައެވެ.