ކުންފުނިތަކުގެ މުބާރާތުގެ ޗެމްޕިއަންކަން ފްރެންޑްސް މޯލްޑިވްސް ހޯދައިފި

ރަމަޟާން ކްރިކެޓް ކާނިވަލްގައި ހިމެނޭ ކުންފުނިތަކުގެ މުބާރާތުގެ ޗެމްޕިއަންކަން ފްރެންޑްސް މޯލްޑިވްސް ހޯދައިފިއެވެ. އެޓީމް ޗެމްޕިއަންކަން ހޯދީ ފައިނަލްގައި ޓީމް ސިވިލިއަން (ޓީސީއެމް)އާ ވާސަކޮށް ހަ ވިކެޓުން މެޗު ކާމިޔާބުކޮށްގެންނެވެ.

ޓީސީއެމް ފުރަތަމަ ކުޅެން އަރައި އަށް އޯވަރުގެ ތެރޭގައި ފަސް ކުޅުންތެރިން ނުބައިވެގެން ހެދުނީ 118 ލަނޑެވެ. ފްރެންޑްސް މޯލްޑިވްސްއިން ވަނީ 6.4 އޯވަރުގެ ތެރޭގައި އެންމެ ކުޅުންތެރިއަކު ނުބައިވެގެން 120 ލަނޑު ހަމަކޮށް މެޗު ކާމިޔާބުކޮށްފައެވެ. ފައިނަލް މެޗުގައި ފްރެންޑްސް މޯލްޑިވްސްގެ މަލިންދާ، 10 ބޯޅައިން 36 ލަނޑު ހެދިއެވެ. ހަފަހަރު ހަޔަކަށް ޖެހިއެވެ. ސިރިދާރަން ނުބައިނުވެ 31 ލަނޑު ހެދިއެވެ. ޓީސީއެމްއިން އެންމެ ގިނަ ލަނޑު ހެދީ 34 ލަނޑު ހެދި މުހައްމަދު ޝިޔާމެވެ. މުބާރާތުގެ އެންމެ މޮޅު ބެޓްސްމަނަކީވެސް ޝިޔާމެވެ. މުބާރާތުގައި އޭނާ 160 ލަނޑު ހެދިއެވެ. އެންމެ ގިނަ ވިކެޓް ނެގީ އަށް ވިކެޓްނެގި ރަނޫކާ ޕެރޭރާއެވެ.

މިމުބާރާތުގެ ޗެމްޕިއަން ޓީމަށް 25,000 ރުފިޔާ، އަދި ދެވަނަ ޓީމަށް 5500 ރުފިޔާ ވަނީ ދީފައެވެ. މުބާރާތުގެ ޗެމްޕިއަންކަން ފްރެންޑްސް މޯލްޑިވްސް ހޯދީ މެޗަކުން ބަލިނުވެއެވެ.