ލަލީގާ ކާމިޔާބުކޮށް އަންޗެލޯޓީ ތާރީޚުގެ ތެރެއަށް!

މި ސީޒަންގެ ލަލީގާ ރެއާލް މެޑްރިޑަށް ކާމިޔާބު ކޮށްދީގެން އެޓީމުގެ ކޯޗު ކާލޯ އަންޗެލޯޓީ ތާރީޚުގެ ފަތްފުށްތަކުން ޖާގަ ހޯދައިފިއެވެ.

ލަލީގާ ކާމިޔާބު ކުރެވުމުން އޭނާގެ ޓްރޮފީ ކެބިނެޓަށް މަދުވެފައިވާ ހަމައެކަނި ޓްރޮފީވެސް ލިބުނީއެވެ. މިއާއެކު އަންޗެލޯޓީވެފައި ވަނީ ޔޫރަޕުގެ ގަދަ ފަސް ލީގު ކާމިޔާބުކުރި ހަމައެކަނި ކޯޗަށެވެ. ލަލީގާގެ އިތުރުން އޭނާ ވަނީ އިނގިރޭސި ޕްރިމިއަރ ލީގު، ބުންޑެސްލީގާ، ފްރާންސް ލީގު އަދި އިޓާލިއަން ލީގުވެސް ކާމިޔާބުކޮށްފައެވެ.

އަންޗެލޯޓީ އިޓާލިއަން ލީގު ކާމިޔާބު ކުރީ އޭސީ މިލާންއާއިއެކުއެވެ. ޗެލްސީއާއެކު އިނގިރޭސި ޕްރިމިއަރ ލީގު ކާމިޔާބު ކުރިއިރު، ބުންޑެސްލީގާ ނެގީ ބަޔާން މިއުނިކްއާއިއެކުގައެވެ. އަދި އޭނާ ވަނީ ޕީއެސްޖީއަށް ފްރާންސް ލީގު ކާމިޔާބުކޮށްދީފައެވެ. މީގެ އިތުރުން އަންޗެލޯޓީ ވަނީ ތިން ޗެމްޕިއަންސް ލީގުވެސް ކާމިޔާބު ކޮށްފައެވެ.

މީގެ ކުރިންވެސް ރެއާލްއަށް ކޯޗުކޮށްދިން އަންޗެލޯޓީ އެނބުރި އެޓީމާއި ގުޅުނީ މިސީޒަނަށެވެ. އޭނާއަކީ ޓީމުގެ ކުޅުންތެރިންނާއި ސަޕޯޓަރުންގެ ލޯބި ލިބިފައިވާ ކޯޗެކެވެ. އަންޗެލޯޓީއަކީ ރެއާލްގެ ތާރީޚުގައިވެސް ޓީމް މޮޅުކޮށްދިނުމުގެ ޕަސެންޓޭޖު އެންމެ މަތީ ކޯޗެވެ.