ޓީޗަރުންގެ މުސާރައަށް ގެންނަ ބަދަލަކީ ގައުމު ބިނާ ކުރުމުގެ ގޮތުން ގެނައި މުހިންމު ބަދަލެއް: ރައީސް

ޓީޗަރުންގެ މުސާރައަށް މި މަހުން ފެށިގެން ގެންނަ ބަދަލީ ގައުމު ބިނާ ކުރުމުގެ ގޮތުން ގެނެވޭ ވަރަށް މުހިންމު ބަދަލެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ޓީޗަރުންގެ މުސާރައިގެ އޮނިގަނޑަށް ގެނައި ބަދަލާ ގުޅޭގޮތުން ގައުމާ މުޚާތަބު ކުރައްވާ ދެއްކެވި ވާހަކަފުޅުގައެވެ. އެ މަނިކުފާނު ވިދާޅުވީ ޓީޗަރުންނަކީ ގައުމުގެ އިންސާނީ ވަސީލަތްތައް ބިނާ ކުރުމުގައި އެންމެ އިސް ދައުރެއް އަދާ ކުރާ ބައެއް ކަމަށްވާއިރު އެ ފަރާތްތަކުން ކުރަމުން އަންނަ މަސައްކަތަކީ އަގުނުކުރެވޭނެ މަސައްކަތެއް ކަމަށެވެ.

ރައީސް ވިދާޅުވީ މިހާތަނަށް ޓީޗަރުންނަށް ލިބެމުން އައި މުސާރައަކީ ކުރާ މަސައްކަތާ ބަލާއިރު ހައްގުވާވަރަށްވުރެ މާ ދަށް މުސާރައެއް ކަމަށާއި މިހާރު ގެނައި ބަދަލާއެކު ލިބޭ މުސާރައާ މެދު ހިތްހަމަ ޖެހޭނެ ކަމަށް އުއްމީދު ކުރައްވާ ކަމަށެވެ. އަދި މިއީ ސަރުކާރުގެ މުވައްޒަފުންނަށް މަސައްކަތާ އެއްވަރުގެ މުސާރައެއް ދިނުމުގެ ފެށުން ކަމަށް ވެސް އެ މަނިކުފާނު ވިދާޅުވި އެވެ.

ޓީޗަރުންގެ މުސާރައަށް ގެނައި ބަދަލާއެކު އެ ދާއިރާއިން ގިނަ ހިދުމަތްތެރިން ނުކުންނާނެ ކަމަށް އުއްމީދު ކުރައްވާ ކަމަށް ރައީސް ވިދާޅުވިއެވެ. އަދި ކުރިއަށް އޮތްތާނގައި ޓީޗަރުންނަށް ވަޒީފާގެ މާހައުލުގައި ހުރި އެހެން ގޮންޖެހުންތައް ހައްލު ކުރުމަށް މަސައްކަތް ކުރައްވާނެ ކަމަށް ވެސް އެމަނިކުފާނު ވިދާޅުވިއެވެ.

ސަރުކާރުން ވަނީ މި މަހުން ފެށިގެން ތައުލީމީ ދާއިރާގެ އެންމެންގެ މުސާރައަށް ބޮޑެތި ބަދަލުތަކެއް ގެނެސްފައެވެ. އެގޮތުން ގިނަ މީހުންގެ މުސާރައިން 35 އިންސައްތައަށް ވުރެ ބޮޑު ކުރިއެރުމެއް ވަނީ ލިބިފައެވެ. މި ބަދަލާއެކު އޯޓީއާއެކު މިހާރު ލިބޭ މުސާރައަށް ވުރެ ބޮޑު މުސާރައެއް އޯޓީއާ ނުލައި ލިބޭނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ ސަރުކާރުން މަސައްކަތް ކުރަނީ ދައުލަތުގެ ކެރި ފޯރުންތެރިކަން ހުރި މިންވަރަކުން ރައްޔިތުންގެ ކެރި ފޯރުންތެރިކަން އިތުރު ކުރުން ކަމަށެވެ.