މި ރަމަޟާން މަހުވެސް ކާނާއަށް ޖެހިފައިވާ އެތައް ބަޔަކު ދުނިޔޭގެ އެކި ކަންކޮޅުތަކުގައި އެބަތިއްބެވެ. ވަކިން ޚާއްސަކޮށް މުސްލިމުން ދިރިއުޅެމުންދާ ސީރިއާގައިވެސް ކާބޯތަކެތި ލިބުމަށް ދަތި އެތައް ބަޔަކު މިހާރުވެސް އެބަ އުޅެއެވެ.

ރޯދަ މަހު ރޯދަ ވީއްލާނެ ތަނަވަސްކަމެއް ނެތް މީހުން އުޅޭއިރު، އުމުރުން 24 އަހަރުގެ ސީރިއާގެ އަންހެނެއް ކަމަށްވާ ހިބާ ޒެއިން ގެންދަނީ ރޯދަ ވީއްލުން ބޭނުންވާ މީހުންނަށް ރޯދަ ވީއްލުން ފޯރުކޮށްދެމުންނެވެ. މި ރަމަޟާން މަހުގެ ކޮންމެ ދުވަހެއްގެވެސް ގިނަ ވަގުތު އޭނާ ހޭދަކުރަމުންގެންދަނީ އޭނާގެ ކާރުގައެވެ. މިގޮތުން ހީލޭ ސާބަހަށް މަސައްކަތްކުރާ ޖަމިއްޔާތަކުން ފޯރުކޮށްދޭ އިފްތާރު ޕެކުތައް ބޭނުންޖެހިފައިވާ މީހުންނާ ހަމައަށް ފޯރުކޮށްދިނުމުގެ މަސައްކަތް އޭނާ ދަނީ ކުރަމުންނެވެ.

އޭނާ މި މަސައްކަތް ފަށާފައިވަނީ ސީރިއާގައި ތެލުގެ އަގު އިންތިހާއަށް އުފުލި، ބޭނުންޖެހިފައިވާ މީހުންނަށް ޗެރިޓީތަކަށް އެތަކެތި ބަލާ ދާން އުނދަގޫ ވާތީއެވެ. މި މަސައްކަތް އިތުރަށް ފުޅާކުރުމުގެ ވިސްނުން އޭނާ މިހާރު ގެންގުޅެއެވެ.

ސީރިއާގައި ކާނާގެ އެހީއަށް ބޭނުންވާ މީހުންގެ އަދަދު މިހާރު ވަނީ 14.6 މިލިއަނަށް އަރާފައެވެ. މިއީ ފާއިތުވި 2021 ވަނަ އަހަރާ އަޅާ ބަލާއިރު، 1.2 މިލިއަން މީހުންގެ އިތުރުވުމެކެވެ.