އައިއެމްއެފްއިން އެދުމުންވެސް ޕާކިސްތާނު ސަރުކާރުން ތެލުގެ ސަބްސިޑީ ކަނޑާނުލި

ޕާކިސްތަނުގައި ތެޔޮ އަދި ގޭހަށް އެޤައުމުގެ ސަރުކާރުން ފޯރުކޮށްދެމުންދާ ސަބްސިޑީ ކަނޑާނުލާނެ ކަމަށް އެޤައުމުގެ ސަރުކާރުން ބުނެފިއެވެ.

ޕާކިސްތާނުގެ އިޤްތިސާދީ ހާލާތު ގޯސްވަމުން އަންނައިރު، ތެލާއި ގޭހުގެ ސަބްސިޑީއަކީ އެޤައުމުގެ ސަރުކާރަށް މިވަގުތު އުފުލޭނެ ބުރައެއް ނޫންކަމަށް ސަރުކާރުގެ އޮފިޝަލުންނާއި އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ވަނީ ފާހަގަކޮށްފައެވެ.

އިޤްތިސާދީ ހާލަތު ރަނގަޅު ކުރުމަށްޓަކައި އައިއެމްއެފް އާއެކު މަޝްވަރާތައް ކުރަމުންދާއިރު، އެއިދާރާއިން ވަނީ ސަރުކާރަށް ބުރަ ބޮޑުވާހެން ތެޔޮ އަދި ގޭހަށް ދެމުން އަންނަ ސަބްސީޑީ ކަނޑާލުމަށް ބުނެފައެވެ.

އެގޮތުން މިދިޔަ ހޯމަ ދުވަހު އައިއެމްއެއެފް އިން ވަނީ އެއިދާރާ އާއެކު ޕާކިސްތާނުން 2019 ވަނަ އަހަރު ސޮއިކޮށްފައިވާ އެކްސްޓެންޑެޑް ފައިނޭންޝަލް ފެސިލިޓީ އަލުން ފެށުމުގެ ކުރިން ސަރުކާރުގަ ނެތް ފައިސާއިން ފޯރުކޮށްދެމުންދާ ސަބްސިޑީތައް ކަނޑާލުމަށް އެޤައުމުގެ ސަރުކާރުން އެއްބަސްވެފައިވާ ކަމަށް ބުނެފައެވެ. ނަމަވެސް ހޮނިހިރު ދުވަހު ޕާކިސްތާންގެ ސަރުކާރުން ވަނީ ތެލާއި ގޭހުގެ އަގު އުފުލުނަ ނުދީ އެއްވަރެއްގައި ހިފެއްޓުމަށް، ތެޔޮ އަދި ގޭހަށް ދެމުން އަންނަ ސަބްސިޑީ ކަނޑާނުލާނެ ކަމަށް ބުނެފައެވެ.

ޕާކިސްތާންގެ ފިނޭންސް މިނިސްޓްރީން ނެރުނު ބަޔާނެއްގައި ބުނެފައި ވަނީ ޕެޓްރޯލްގެ އަގު އުފުލުމުގެ ސަބަބުން އާންމު ރައްޔިތުންނަށް ދިމާވާނެ ގޮންޖެހުންތަކަށް ވިސްނާ، ސަބްސިޑީ ކަނޑާނުލާން ބޮޑުވަޒީރު ޝަހްބާޒް ޝަރީފް ވިދާޅުވެފައިވާކަމަށެވެ.

ޕާކިސްތާންގައި ތެލާއި ގޭހަށް ސަބްސިޑީ ދޭން ނިންމާފައި ވަނީ އެޤައުމުގެ ކުރީގެ ބޮޑުވަޒީރު އިމްރާން ޚާންގެ ވެރިކަމުގައެވެ. އެގޮތުން މިނިންމުމާއެކު އޭޕްރިލްއިން ޖޫން މަހަށް ތެޔޮ އަދި ގޭހުގެ ސަބްސިޑީގެ ގޮތުގައި ސަރުކާރުން ދެ ބިލިއަން ޑޮލަރު ޚަރަދުކުރުމަށް ވަނީ ހަމަޖެހިފައެވެ.

2019 ވަނަ އަހަރު ޖުލައި މަހުން 2022 ވަނަ އަހަރުގެ ސެޕްޓެމްބަރު މަހުގެ ނިޔަލަށް އައިއެމްއެފް އިން ޕާކިސްތާނަށް އެކްސްޓެންޑެޑް ފައިނޭންސް ފެސިލިޓީގެ ދަށުން ހަ ބިލިއަން ޑޮލަރު ފޯރުކޮށްދޭން ވަނީ އެއްބަސްވެފައެވެ. ނަމަވެސް އިމްރާން ޚާންގެ ބައެއް ނިންމުންތަކާއެކު ތިން ބިލިއަން ޑޮލަރުގެ އެހީ ފޯރުކޮށްދިނުމަށް ފަހު މި ޕްރޮގްރާމް ވަނީ ހުއްޓިފައެވެ.

މި ޕްރޮގްރާމް އަލުން ފެށުމުގެ އުންމީދުގައި, ޕާކިސްތާންގެ މިހާރުގެ ސަރުކާރުން ވަނީ ސަރުކާރުގެ ޚަރަދުތައް ކުޑަކޮށް, ފަންޑު އިތުރުކުރުމަށް މަސައްކަތްކޮށްފައެވެ. އެގޮތުން ޕަބްލިކް ސަރވިސް ޑިވެލޮޕްމެންޓް ފަންޑްސް ހިފަހައްޓައި, ސަރުކާރުގެ ޚަރަދުކުޑަކޮށް, އައިއެމްއެފާއެކު މަޝްވަރާތައްކޮށް ހުއްޓިފައިވާ ޕްރޮގްރާމް އަލުން ފެށުމުގެ މަސައްކަތް ކުރައްވާނެކަމަށް ފިނޭންސް މިނިސްޓަރު މިފްތާހް އިސްމާއިލް ވަނީ ވިދާޅުވެފައެވެ.

ޕާކިސްތާންގެ އައު ފިނޭންސް މިނިސްޓަރު މިފްތާހް އިސްމާއިލް އާއި އައިއެމްއެފްގެ ޑެޕިއުޓީ މެނޭޖިން ޑިރެކްޓަރު އެންޓޮއިނެޓް ސަޔެހް އާއި ދެމެދު ކުރިއަށް ގެންދެވުނު މަޝްވަރާތަކަށް ފަހު އެއިދާރާއިން ވަނީ ޕްރޮގްރާމް އަލުން ފެށުމަށް ނިންމާ، އެއް އަހަރު ދުވަހަށް ޕްރޮގްރާމް އެކްސްޓެންޑް ކޮށްދޭން ބުނެފައެވެ.

އައިއެމްއެފް އިން ވަނީ ސެޕްޓެމްބަރު މަހަށް ނިމޭ ޕްރޮގްރާމަށް އިތުރު ނުވަ މަސް ދުވަސް އިތުރުކޮށް އެއް އަހަރަށް ޕްރޮގްރާމް ދިގުދައްމާލާފައެވެ. އަދި ޕްރޮގްރާމްގެ ދަށުން ދޫކުރާ ހަ ބިލިއަން ޑޮލަރުގެ ލޯން އިތުރުކުރަން ނިންމާފައެވެ.

ރޮއިޓަރސްގައި ރިޕޯޓުކޮށްފައިވާގޮތުން ޕްރޮގްރާމް އަލުން ފެށުމުގެ ކުރިން ޕާކިސްތާންގެ ހާލަތު ބަލައި ރިވިއު ކުރުމަށް އައިއެމްއެފްގެ ޓީމެއް މި މެއި މަހު އެޤައުމަށް ދިޔުމަށް ވަނީ ހަމަޖެހިފައެވެ. އައިއެމްއެފްގެ ރިވިއު ކާމިޔާބުކަމާއެކު ނިންމާލެވިއްޖެ ނަމަ ޕާކިސްތާނަށް 900 މިލިއަން ޑޮލަރުގެ އެހީ ލިބިގެންދާނެ ކަމަށް އެނޫހުން ވަނީ ފާހަގަކޮށްފައެވެ.

އެޤައުމުގެ އިޤްތިސާދު އަނޑިއަޅާލަމުންދާ މިދަނޑިވަޅުގައި ޕާކިސްތާނަށް ބޭރުގެ އެހީ ވަނީ ވަރަށް މުހިންމުވެފައެވެ. ރިޕޯޓުތައް ބުނާގޮތުން ޕާކިސްތާންގެ ފޮރިން ރިޒަރވް މިހާރު ވަނީ 10.5 ބިލިއަން ޑޮަލަރަށް ވެއްޓިފައެވެ.

އައިއެމްއެފްގެ ފެސިލިޓީ އަލުން ފެށުމާއެކު ޕާކިސްތާނަށް އެހެން އެކްސްޓަރނަލް ފަންޑުތައްވެސް ހުޅުވިގެންދާނެއެވެ.