މުސާރައިގެ އޮނިގަނޑަށް ބަދަލު ގެނައުމަކީ ޓީޗަރުންގެ ދުވަސްވީ އުންމީދެއް

ޓީޗަރުންނަކީ ގައުމު ބިނާ ކުރުމުގެ މުހިންމު ދައުރެއް އަދާ ކުރާ ބައެއްކަން އަހަރެމެން އެންމެންވެސް ގަބޫލްކުރެއެވެ. ޅަދަރިންނަށް ތައުލީމު އުގަންނައިދީ އެ ކުދިން މުޖުތަމައުއަށް ބޭނުން ހިފޭ ބަޔަކަށް ހެދުމުގައި އިސްދައުރެއް އަދާ ކުރަނީ ޓީޗަރުންނެވެ. އެކި މިޒާޖުގެ އެތައް ކުދިންނަކާ ކުރިމަތިލައި, އެ ހުރިހާ ކުދިންނަށް އެނގޭ ގޮތަށް ފިލާވަޅުތައް ބުނެދިނުމަށް ކޮންމެ ދުވަހަކުވެސް އެމީހުން ބުރަ މަސައްކަތްތަކެއް ކުރެއެވެ.

ނަމަވެސް ޓީޗަރުންނަށް މިބުރަ މަސްއޫލިއްޔަތާ އެކަށީގެންވާ އުޖޫރައެއް ދެވޭބާވައެވެ؟ މުސާރައިގެ ކުރިއެރުމާއި މަގާމުގެ ކުރިއެރުން ނުލިބިގެން އެވާހަކަ ޓީޗަރުން ދައްކަމުން އަންނަތާ އެތައް ޒަމާންތަކެއް ވެއްޖެއެވެ. ކުރާ މަސައްކަތާ އެއްވަރުގެ އުޖޫރައެއް އެމީހުންނަށް ނުލިބޭ ކަމުގެ ޝަކުވާއަކީ އެމީހުންގެ އެންމެ ބޮޑު ޝަކުވާއެވެ. އެވާހަކަތައް ކަމާބެހޭ ފަރާތްތަކަށް އަޑު އިއްވުމަށް ޓީޗަރުން އެތައް ގޮތަކަށް މިހާތަނަށް ވަނީ މަސައްކަތްތަކެއް ކޮށްފައެވެ. އެހެންނަމަވެސް އެމީހުން ބޭނުންވާ ހެޔޮ ބަދަލެއް މިހާތަނަށް އޮތީ ނުލިބިފައެވެ.

ޓީޗަރުންނަށް މުސާރައިގެ ކުރިއެރުމާއި މަގާމުގެ ކުރިއެރުން ނުލިބޭ މައްސަލައިގައި ޓީޗަރސް އެސޯސިއޭޝަނުން ކޯޓަށްވެސް ދާން ނިންމިއެވެ. އެމީހުން ބުނަމުުން އަންނަނީ ކޮވިޑްގެ ސަބަބުން މުސާރައިގެ ކުރިއެރުން މަޑުޖައްސާލާފައި އޮތް އެހެން ދާއިރާތަކަށްވެސް މުސާރައިގެ ކުރިއެރުން ދޭން ފެށިއިރު ޓީޗަރުންނަށް އެކަން އޮގަތަށް ނުހިނގާ ކަމަށެވެެ. ޕްރޮމޯޝަން ނުލިބުމުގެ ޝަކުވާ ގިނަ ޓީޗަރުން ކުރަމުން އަންނަކަމަށް އެއެސޯސިއޭޝަނުން ބުނެއެވެ.

އެހެންނަމަވެސް މި ހުރިހާ ކަމަކަށް ހައްލު ލިބިގެންދާނެކަމުގެ އުފާވެރި ޚަބަރު ސަރުކާރުން މިވަނީ ދީފައެވެ. ތައުލީމީ ދާއިރާގެ ހުރިހާ މުވައްޒަފުންގެ މުސާރަ އާދީއްތަ ދުވަހުން ފެށިގެން ބޮޑުކުރައްވާ، މުސާރައިގެ އޮނިގަނޑު އާދީއްތަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިއުލާންކުރައްވަން މިވަނީ ނިންމަވާފައެވެ. އެކަން ރައީސުލްޖުމްހޫރިއްޔާގެ އޮފީހުން ވަނީ ކަށަވަރުކޮށްދެއްވާފައެވެ. ތަޢުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކޮށް، އެކަމާއި ގުޅޭ މައުލޫމާތުތައް ގައުމާއި މުޚާތަބުކުރައްވާ ރައީސް ހާމަކުރައްވާނެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހު މިއަހަރުގެ ރިޔާސީ ބަޔާނުގައިވެސް ވަނީ ތައުލީމީ ދާއިރާގެ ހުރިހާ މުވައްޒަފުންގެ އެންމެ ދުވަސްވީ ޝަކުވާއަށް ހައްލެއް ގެނެސްދެއްވާނެކަމަށް ވައުދުވެވަޑައިގެންފައެވެ. ރައްޔިތުންގެ މަޖިލީހަށް މިއަހަރުގެ ރިޔާސީ ބަޔާން އިއްވަވާ ދެއްވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވީ ގައުމު ބިނާކޮށްދެއްވުމުގެ އެންމެ ބުރަ މަސައްކަތްކުރައްވާ ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑު ކުރެއްވުމުގެ ވައުދު ފުއްދަވާއިރު، މުސާރަތައް 50 އިންސައްތައަށްވުރެ ބޮޑުކޮށްދެއްވާނެކަމަށް ވަނީ ވިދާޅުވެފައެވެ.

ރާއްޖޭގެ ތަޢުލީމީ ދާއިރާގައި މި ވަގުތު 9،119 މުދައްރިސުން އަންނަނީ މަސައްކަތްކުރަމުންނެވެ. އޭގެ ތެރޭގައި 6،498 ދާއިމީ ދިވެހި މުދައްރިސުންނާއި، 1،730 ބިދޭސީ މުވައްޒަފުންނާއި ވަގުތީ 891 މުދައްރިސުންނެވެ.

ސަރުކާރުގެ ސްކޫލްތަކުގައި މަސައްކަތްކުރާ ޓީޗަރުންގެ މުސާރައިގެ އޮނިގަނޑަށް ބަދަލު ގެނެސް، ޕޭ ކޮމިޝަނަށް ފޮނުވާފައިވާކަމަށް 2019 ވަނަ އަހަރުގެ އޮކްޓޯބަރ މަހު އެޑިޔުކޭޝަން މިނިސްޓަރ ޑރ އާއިޝަތު އަލީ ވަނީ ވިދާޅުވެފައެވެ. އެންމެފަހުން ޓީޗަރުންގެ މުސާރައަށް ބަދަލު ގެނެސްފައިވަނީ 2015 ވަނަ އަހަރުއެވެ. އެއޮނިގަނޑަށް އަމަލުކުރަން ފަށާފައިވަނީ 2016 ވަނަ އަހަރުއެވެ.

ވުމާއެކު، ތައުލީމީ ދާއިރާގެ މުސާރަ ބޮޑު ކުރެއްވުމަށް ނިންމެވި ނިންމެވުމަކީ ގިނަ ބަޔަކަށް އުއްމީދުތަކެއް ލިބިގެން ދިޔަ ނިންމުމަކަށް މިވަނީ ވެފައެވެ. މިއީ ޓީޗަރުންގެ އެތައް ދުވަހެއްވީ ދިގު އިންތިޒާރެއްގެ ނިމުމެވެ.