ޓީޗަރުންގެ މުސާރަ ބޮޑުކުރުމަށް މިސަރުކާރުން ވެފައިވާ ވައުދުގެ ދަށުން, މެއި މަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އިއުލާނުކުރައްވާފައިވާއިރު، އެކަމާގުޅޭ ތަފްސީލުތައް އާދިއްތަ ދުވަހު އާންމު ކުރާނެކަމަށް ރައީސް އޮފީހުން ބުނެފިއެވެ.
މިއަހަރަށް ރިޔާސީ ބަޔާން އިއްވަވަމުން ރައީސް ވިދާޅުވީ، ގައުމު ބިނާކުރުމުގެ އެންމެ ބުރަ މަސްއޫލިއްޔަތު އަދާކުރަނީ ދަރިން ބިނާކުރާ އެދުރުން ކަމަށެވެ. އެމީހުންނަށް އެކަށީގެންވާ އުޖޫރައެއް ލިބިދިނުމަކީ މިސަރުކާރުގެ ވައުދެއްކަމަށާއި، އެގޮތުން 56 އިންސައްތައިގެ ކުރިއެރުމެއް އަންނާނެކަމަށް ރައީސް ވިދާޅުވިއެވެ.
ރައީސް ވަނީ ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރައްވަން ނިންމަވާފައިވާކަން ހާމަކުރައްވާފައެވެ. މިބަދަލާއެކު، ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ, އިތުރުގަޑި ނުލައި، 12,628 ރުފިޔާއިން 19,740 ރުފިޔާއަށް ބޮޑުވެގެންދާނެ ކަމަށް ވެސް ރައީސް ވިދާޅުވިއެވެ.
އަންނަ މޭ މަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރަން އަޅުގަނޑު ނިންމައިފިން. މި ބަދަލާއެކު، ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ, އިތުރުގަޑި ނުލާ 12,628 ރުފިޔާއިން 19,740 ރުފިޔާއަށް ބޮޑުވެގެންދާނެ. މިއީ 56 ޕަސެންޓްގެ ކުރިއެރުމެއް.ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ރިޔާސީ ބަޔާން
އެކަމާ ގުޅޭގޮތުން ރާއްޖެއެމްވީން ސުވާލުކޮށްލުމުން ރައީސް އޮފީހުން ބުނީ، ރިޔާސީ ބަޔާނުގައި ރައީސް ވިދާޅުވި ފަދައިން، މެއި މަހުން ފެށިގެން ޓީޗަރުންގެ މުސާރަ ބޮޑު ވާނެ ކަމަށެވެ. އާދިއްތަ ދުވަހު ޓީޗަރުންގެ މުސާރައިގެ ތަފްސީލުތައް ހާމަކުރާނެކަމަށް ރައީސް އޮފީހުން މައުލޫމާތު ދެއެވެ.
އެޑިޔުކޭޝަން މިނިސްޓަރު ޑރ. އާއިޝަތު އަލީވެސް ވަނީ މީގެ ކުރީން ދުވަހަކުވެސް ބޮޑު ކޮށްދީފައި ނުވާ މިންވަރަކަށް މުދައްރިސުންގެ މުސާރަ ބޮޑުކޮށްދެއްވަން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އިއުލާންކުރެއްވުމަކީ ސްކޫލްތަކާއި ގުޅިފައިވާ ހުރިހާ ފަރާތްތަކަށް ލިބުނު މަތިވެރި އުފަލެއްކަމަށް ވިދާޅުވެފައެވެ.
ސަރުކާރުގެ ސްކޫލްތަކުގައި މަސައްކަތްކުރާ ޓީޗަރުންގެ މުސާރައިގެ އޮނިގަނޑަށް ބަދަލު ގެނެސް، ޕޭ ކޮމިޝަނަށް ފޮނުވާފައިވާކަމަށް 2019 ވަނަ އަހަރުގެ އޮކްޓޯބަރ މަހު އެޑކިޔުކޭޝަން މިނިސްޓަރ ޑރ އާއިޝަތު އަލީ ވަނީ ވިދާޅުވެފައެވެ. އެންމެފަހުން ޓީޗަރުންގެ މުސާރައަށް ބަދަލު ގެނެސްފައިވަނީ 2015 ވަނަ އަހަރުއެވެ. އެއޮނިގަނޑަށް އަމަލުކުރަން ފަށާފައިވަނީ 2016 ވަނަ އަހަރުއެވެ.
ވުމާއެކު، ތައުލީމީ ދާއިރާގެ މުސާރަ ބޮޑު ކުރެއްވުމަށް ނިންމެވި ނިންމެވުމަކީ ގިނަ ބަޔަކަށް އުއްމީދުތަކެއް ލިބިގެން ދިޔަ ނިންމުމަކަށް މިވަނީ ވެފައެވެ.
ރާއްޖެއެމްވީއާ ވާހަކަ ދެއްކި ބައެއް ޓީޗަރުން ބުނީ, ރައީސްގެ ރިޔާސީ ބަޔާނާއެކު ޓީޗަރުންނަށް އިތުރު އުފާވެރިކަމެއް ލިބިގެންދިޔަ ކަމަށެވެ. އަދި މިކަމުގެ މަޝްވަރާތައް ޓީޗަރުން މެދުގައި ކުރެވި މި ދާއިރާއަށް ހެޔޮ ބަދަލުތަކެއް އަންނާނެ ކަމަށް ވަނީ ވިދާޅުވެފައެވެ.
