އިމުގާ ޕޯޓަލް ބޭނުންކުރުމުގައި ރައްޔިތުންނަށް ލުއި ފަސޭހަވާނެހެން ޕޯޓަލްއަށް ބަދަލުތަކެއް ގެންނަން ނިންމައިފިއެވެ.
ރާއްޖެއިން ބޭރަށް ފުރާއިރާއި، އެނބުރި ރާއްޖެ އައުމުގެ ކުރިން އިމުގާ ޕޯޓަލް މެދުވެރިކޮށް "ޓްރެވެލަރ ޑިކްލަރޭޝަން" ފޯމު ފުރަންޖެހެއެވެ.
އެހެންނަމަވެސް އިމުގާ ފޯމު ފުރުމުގައި އާންމުންނަށް ކޮންމެވެސް އުނދަގޫތަކެއް ކުރިމަތިވާކަމުގެ ޝަކުވާ ދަނީ ލިބެމުންނެވެ. ނަން ނުޖެހުމަށް ޝަރުތުކޮށް އެއަރޕޯޓުން ރާއްޖެއެމްވީއާ ވާހަކަދެއްކި މީހަކު ބުނިގޮތުގައި، ރާއްޖެއިން ބޭރަށް ފުރަމުންވެސް އަދި އެނބުރި ރާއްޖެ އަންނަމުންވެސް މި ފޯމު ފުރަންޖެހޭތީ ދަތިތަކަކާ ކުރިމަތިލާންޖެހޭ ކަމަށެވެ.
މިކަމާގުޅިގެން ރާއްޖެއެމްވީއަށް މައުލޫމާތުދެމުން އިމިގްރޭޝަންގެ އޮފިޝަލަކު ބުނީ، ވަރަށް އަވަހަށް އިމުގާ ޕޯޓަލްއަށް ބަދަލުތަކެއް ގެންނަން މަސައްކަތްކުރަމުންދާކަމަށެވެ. މި ބަދަލުތައް ގެނެވުމާއެކު މި ފޯމު ފުރުމުގައި އިތުރު ފަސޭހަތަކެއް ވެގެންދާނެ ކަމަށް އިމިގްރޭޝަންގެ އޮފިޝަލު ބުނެފައިވެއެވެ.
އާންމުންގެ ޝަކުވާތައް މިހެން ހުރުމުގެ ސަބަބުން މި ފޯމު ފުރަން ނުޖެހޭނެގޮތެއް ހެދުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ފަރާތުން ވެސް ވަނީ އިމިގްރޭޝަނަށް ހުށަހަޅާފައެވެ. މިކަން އެމްއޭސީއެލްގެ އޮފިޝަލަކު ވަނީ ރާއްޖެއެމްވީއަށް ކަށަވަރުކޮށްދީފައެވެ.
އިމުގާ ޕޯޓަލް މެދުވެރިކޮށް ދަތުރުވެރިޔާގެ ސިއްހީ އެކި މައުލޫމާތުތައް ހުށަހަޅަންޖެހެއެވެ. އޭގެ ތެރޭގައި ވެކްސިން ފުރިހަމަކޮށްފައިވާނަމަ އެކަމުގެ ތަފްސީލު ހާމަކުރަންޖެހެއެވެ. އެކަމުގެ ލިޔެކިޔުންތަކުގެ ކޮޕީއެއް ހެލްތު ޑިކްލަރޭޝަން ފޯމާއެކު އިމުގާ ޕޯޓަލްއަށް ހުށަހަޅަންޖެހެއެވެ. އިމުގާ ޕޯޓަލް މެދުވެރިކޮށް ކުރި މަސައްކަތުން ކޮވިޑް-19ގެ ހާލަތުގައި ރާއްޖޭގައި ކޮވިޑް ކޮންޓްރޯލްކުރުމަށް ވަރަށް ބޮޑު އެހީއަކަށް ވެގެންދިޔަ ކަމަށް އިމިގްރޭޝަނުން ބުނެފައިވެއެވެ.
