2021 ވަނަ އަހަރު އެމްޓީސީސީއަށް 271.8 މިލިއަން ރުފިޔާގެ ސާފު ފައިދާއެއް
މިއީ އެމްޓީސީސީގެ ދިގު ތާރީޚުގައި ލިބިފައިނުވާވަރުގެ ބޮޑު ފައިދާއެއް
އެމްޓީސީސީގެ ސީއީއޯ އާދަމް އާޒިމް
2021 ވަނަ އަހަރު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އަށް 232 މިލިއަން ރުފިޔާގެ ފައިދާއެއް ލިބިފައިވާކަމަށް އެކުންފުނިން ހާމަކޮށްފިއެވެ.
މިއީ އެ ކުންފުނީގެ 41 އަހަރުވީ ދިގު ތާރީޚުގައި އެކުންފުންޏަށް ލިބިފައިނުވާވަރުގެ ބޮޑު ފައިދާއެކެވެ. އެމްޓީސީސީގެ 2021 ވަނަ އަހަރުގެ އަހަރީ ރިޕޯޓު އެކުންފުނިން ވަނީ އާންމުކޮށްފައެވެ.
މި ރިޕޯޓުން ދައްކާގޮތުން މިދިޔަ އަހަރު އެކުންފުންޏަށް ވަނީ ރެކޯޑު އަދަދެއްގެ ބޮޑު އާމްދަނީއެއް ލިބިފައެވެ. މިދިޔަ އަހަރު އެކުންފުންޏަށް އާމްދަނީގެ ގޮތުގައި 1.9 ބިލިއަން ރުފިޔާ ލިބިފައިވާކަމަށް އެކުންފުނިން ހާމަކުރެއެވެ. މިއީ 2020 ވަނަ އަހަރު އެކުންފުންޏަށް ލިބުނު އާމްދަނީއަށްވުރެ 43 އިންސައްތަ ބޮޑު އަދަދެއް ކަމަށް އެމްޓީސީސީން ބުނެފައިވެއެވެ. 2020 ވަނަ އަހަރު އެކުންފުންޏަށް އާމްދަނީގެ ގޮތުގައި ލިބިފައިވަނީ 1.3 ބިލިއަން ރުފިޔާއެވެ.
އެމްޓީސީސީން ބުނީ 2021 ވަނަ އަހަރު އެކުންފުންޏަށް ލިބުނު އާމްދަނީގެ އެންމެ ބޮޑު ބައެއް ހިއްސާކުރަނީ އިމާރާތްކުރުމާއި ބިން ހިއްކުމުގެ މަސައްކަތުން ކަމަށެވެ. 2021 ވަނަ އަހަރު ލިބުނު ފައިދާގެ 83.20 އިންސައްތަ މި ދެ މަސައްކަތުން ހިއްސާކުރާކަމަށާއި، އެއީ 1.6 ބިލިއަން ރުފިޔާ ކަމަށް އެކުންފުނިން ހާމަކުރެއެވެ. 12.20 އިންސައްތަ ވިޔަފާރިން ލިބުނު އާމްދަނީ ހިއްސާކުރާއިރު، އެއީ 240 މިލިއަން ރުފިޔާއެވެ. ދަތުރުފަތުރުން 58 މިލިއަން ރުފިޔާގެ އާމްދަނީއެއް ލިބިފައިވާއިރު، އެހެނިހެން މަސައްކަތްތަކުން 17 މިލިއަން ރުފިޔާގެ އާމްދަނީއެއް ލިބިފައިވާކަމަށް އެމްޓީސީސީން ބުނެއެވެ.
2021 ވަނަ އަހަރު، ޓެކްސްއަށް ކެނޑުމުގެ ކުރިން އެމްޓީސީސީއަށް ސާފު ފައިދާގެ ގޮތުގައި 271.82 މިލިއަން ރުފިޔާ ލިބިފައިވާކަމަށް އެ ކުންފުނިން ހާމަކުރެއެވެ. މިއީ އެކުންފުނީގެ 41 އަހަރުގެ ދިގު ތާރީޚުގައިވެސް މިހާ ބޮޑު ފައިދާއެއް ލިބުނު ފުރަތަމަ ފަހަރެވެ. ޓެކްސްއަށް ކެނޑުމަށްފަހު، 2021 ވަނަ އަހަރުގެ ފައިދާގެ ގޮތުގައި އެމްޓީސީސީއަށް 232 މިލިއަން ރުފިޔާ ވަނީ ލިބިފައެވެ.
2021 ވަނަ އަހަރު އެމްޓީސީސީން ވަނީ އުމްރާނީ ތަރައްގީގެ ގިނަ މަޝްރޫއުތަކެއް ކާމިޔާބުކަމާއެކު ހިންގާފައެވެ. އެގޮތުން އަހަރުތެރޭގައި އުމްރާނީ ތަރައްގީގެ އައު 57 މަސްރޫއެއް އެ ކުންފުންޏާ ހަވާލުކޮށް، 27 މަޝްރޫއެއްގެ މަސައްކަތް ކާމިޔާބުކަމާއެކު ވަނީ ނިންމިފައެވެ. ކުންފުނީގެ އާންމު ވިޔަފާރި ދާއިރާއާއި ކުންފުނީގެ އެހެނިހެން ވިޔަފާރި ދާއިރާތަކަށް އަމާޒުކޮށް ތަފާތުއެކި މާކެޓިންގ ހަރަކާތްތަކެއްވެސް ވަނީ ހިންގާފައެވެ.
އަދި މުޅި ދިވެހިރާއްޖޭގެ އާންމު ދަތުރުފަތުރުގެ ޚިދުމަތް ސަރުކާރުން ވަނީ އެމްޓީސީސީއާ ހަވާލުކޮށްފައެވެ. އެގޮތުން މޯލްޑިވްސް ޕޯޓްސް ލިމިޓެޑްއިން، ގްރޭޓަރ މާލެ ސަރަހައްދާއި އަތޮޅުތެރޭގައި ދެމުންއައި އާންމު ބަހާއި ފެރީގެ ޚިދުމަތްވަނީ އެ ކުންފުންޏާ ހަވާލުކޮށްފައެވެ. ރާއްޖޭގެ ރަށްތައް ހައި ސްޕީޑް ފެރީގެ ނިޒާމަކުން، އެއް ވިއުގައަކުން ގުޅާލުމަށް ސަރުކާރުން ވެފައިވާ ވައުދުގެ ދަށުން "ރާއްޖެ ޓްރާންސްޕޯޓް ލިންކް" ޕްރޮޖެކްޓްގެ ފުރަތަމަ ފިޔަވަހީގެ މަސައްކަތް އެ ކުންފުންޏާއި ހަވާލުކޮށްފައިވަނީވެސް 2021 ވަނަ އަހަރު ތެރޭގައެވެ. އަދި ކުންފުނީގެ މަޝްރޫއުތައް ހިނގަމުންދާ ރަށްރަށަށް ކުންފުނީގެ އިޖުތިމާއީ ޒިންމާގެ ދަށުން ވަނީ ޖުމުލަ 304 ހަރަކާތެއް ހިންގައި، އެކި ގޮތްގޮތުން އެހީތެރިކަން ފޯރުކޮށްދީ ގިނަ މަސައްކްތަކެއް ކޮށްދީފައެވެ.
އެމްޓީސީސީން މިހާރު ގެންދަނީ އެ ކުންފުނީގެ އެކި ވިޔަފާރިތައް އިތުރަށް ފުޅާކޮށް ހަރުދަނާކުރުމަށް އަޅަންޖެހޭ އެންމެހާ ފިޔަވަޅުތަކާއި އިސްތިރާޖީ ޕްލޭންތައް އެކުލަވާލައި، ހާލަތު ބަދަދަލުވަމުންދާ މިންވަރަށް ރިއާޔަތްކޮށް މުރާޖައާކުރަމުންނެވެ. އަދި އީޖާދީ ތަރައްގީއަށް ހިތްވަރުދިނުމާއި، ޚިދުމަތުގެ ފެންވަރު ރަނގަޅުކޮށް، ކުންފުނީގެ ކަންކަން އިސްލާހުކުރުމުގައި މެދުނުކެނޑި މަސައްކަތް ކުރާނެކަމަށް އެމްޓީސީސީން ބުނެއެވެ.
