ވިކްޓަރީގެ ރައީސްކަމަށް ހުސައިން އާދަމް (އާދަމްބެ)!

އެފްއޭއެމްގެ ސަސްޕެންޝަނެއްގައި އޮތް ވިކްޓަރީ ސްޕޯޓްސް ކްލަބުގެ ރައީސްކަމަށް ހުސައިން އާދަމް (އާދަމްބެ) އިންތިޚާބުވެވަޑައިގެންފިއެވެ.

އާދަމްބެ މި މަގާމަށް އިންތިޚާބުވީ ހުކުރު ދުވަހުގެރޭ ކަލާފާނު ސްކޫލުގައި ކުރިއަށް ގެންދިޔަ ކްލަބުގެ އަހަރީ އާންމު ޖަލްސާގައެވެ. ވިކްޓަރީގެ ޗެއަރޕަރސަންގެ މަގާމުގައި މީގެ ކުރިން ހުރި ޑރ. އިބްރާހީމް ނާޝިދު (ނާޝް)އާއި ބޯޑުގެ ބައެއް މެމްބަރުން ވަނީ މީގެ މަހެއްހާ ދުވަސްކުރިން މަގާމުން އިސްތިއުފާ ދީފައެވެ. އެހެންކަމުން މިރޭގެ ޖަލްސާގައި ވަނީ ހުސްވެފައިވާ މަގާމުތަކަށް މެމްބަރުން އިންތިޚާބުކޮށްފައެވެ.

މުލީއާގޭ ޗީފް އޮފް ސްޓާފްގެ މަގާމުގައި ހުރި އާދަމްބެ ވިކްޓަރީގެ ރައީސްކަމުގެ މަސްއޫލިއްޔަތާ ހަވާލުވީ ޖަލްސާގައި ބައިވެރިވި 46 މެމްބަރުގެ ފުރިހަމަ ތާއީދާއެކުއެވެ. ރައީސްކަމަށް ކުރިމަތިލީވެސް، 1980ގެ އަހަރުތަކުގައި ވިކްޓަރީއަށް ކުޅުނު އާދަމްބެ އެކަންޏެވެ. ނައިބު ރައީސަކަށް އިންޚާބުވީ އިސްމާއިލް ލަތީފުއެވެ. އަލަށް އިންތިޚާބުވި ބޯޑުގެ މެމްބަރުންގެ ތެރޭގައި ހިމެނެނީ ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު، ފާތިމަތު ޝެރިން، ވިކްޓަރީގެ ކުރީގެ މިޑްފީލްޑަރު މުހައްމަދު ޝައްފާޒު، އިބްރާހީމް މުހައްމަދު، އަހުމަދު ފައިސަލް، އިބްރާހީމް އިޒްހާން، އިސްމާއީލް ޝަރީފް، އަހުމަދު އަރީސް އަދި ޓީމަށް ގިނަ ދުވަހު ޚިދުމަތްކޮށްފައިވާ މަޝްހޫރު ގޯލްކީޕަރު ޓްރެއިނަރު އަހުމަދު ރިޔާޒް (ގާނާ)އެވެ. މި މެމްބަރުންވެސް ހޮވިފައިވަނީ ޖަލްސާއަށް ހާޒިރުވެތިބި ހުރިހާ މެމްބަރުންގެ އަޣުލަބިއްޔަތުންނެވެ. ވިކްޓަރީގެ އައު ޖެނެރަލް ސެކްރެޓަރީއެއްގެ މަގާމަށް އައްޔަނުކޮށްފައިވަނީ ކްލަބް މޯލްޑިވްސްގެ އިސް ދައުރެއް އަދާކުރަމުން އަންނަ މޫސާ ރަމީޒްއެވެ.

ކުޅުންތެރިންގެ މުސާރަ ނުދިނުމާއި އެޑްމިނިސްޓްރޭޓިވް ގިނަ މައްސަލަތަކުގެ ސަބަބުން އެފްއޭއެމުން ވަނީ 2019 ވަނަ އަހަރު ފުޓްބޯޅައިގެ ހުރިހާ ހަރަކާތަކުން ވިކްޓްރީ ސަސްޕެންޑު ކޮށްފައެވެ. އެހެން ކަމުން އައު ބޯޑުގެ އެންމެ ބޮޑު އަމާޒަކަށް ވާނީ ކޯޗުންނާއި ކުޅުންތެރިންނަށް ދޭންޖެހޭ މުސާރައިގެ މައްސަލަ ހައްލު ކުރުމާއި، ކްލަބް ލައިސަންސްގެ ކަންކަން ފުރިހަމަކުރުމެވެ. މިއަހަރުގެ ދެވަނަ ޑިވިޝަންގެ ކުޅުން ފެށުމުގެ ކުރިން މިކަންކަން ހަމަޖެއްސިއްޖެ ނަމަ، ސަސްޕެންޝަން ފިލުވާލައި، ދެވަނަ ޑިވިޝަންގައި އެޓީމަށް ކުޅެވޭނެއެވެ.