ނިއުގެ މައްސަލަ ހައްލުކުރަން ކުރެވޭނެ ކަމެއް ނެތް، އެކަމަކު ވިކްޓަރީގެ މައްސަލަ އަދިވެސް ހައްލުވާނެ: ބައްސާމް

ކުޅުންތެރިންގެ މުސާރައިގެ މައްސަލައިގެ ސަބަބުން ފިޔަވަޅު އަޅާފައިވާ ދިވެހި ފުޓްބޯޅައިގެ މަޝްހޫރު ދެ ކުލަބު ކަމަށްވާ ނިއުރޭޑިއަންޓް ސްޕޯޓްސް ކުލަބާއި ވިކްޓަރީ ސްޕޯޓްސް ކުލަބުގެ މައްސަލަ ހައްލުކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ގިނަ މަސައްކަތްތަކެއް ކުރި ކަމަށާއި، އެހެން ނަމަވެސް ނިއުގެ މައްސަލައިގައި މިހާރު އެފްއޭއެމަށް ކޮށްދެވޭނެ މާ ބޮޑު ކަމެއް ނެތް ކަމަށް އެ އިދާރާގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ފުޓްބޯޅައިގެ ހުރިހާ ހަރަކާތަކުން ނިއު ސަސްޕެންޑް ކުރަން އެފްއޭއެމުން ނިންމާފައިވަނީ ކުޅުންތެރިންނަށް މުސާރަ ނުދޭ ކަމަށް މިދިޔަ އަހަރުގެ ޖެނުއަރީ މަހުގެ ތެރޭގައެވެ. އަދި ފުރަތަމަ ޑިވިޝަނުގައި ވާދަކުރަމުން އައި އެންމެ ޒަމާންވީ ކުލަބު ކަމަށްވާ ވިކްޓަރީ ސަސްޕެންޑް ކުރީ އެ ކުލަބުން ކުޅުންތެރިންނާއި ކޯޗުންނަށް ނުދީ ހުރި މުސާރަ ދިނުމަށާއި، ކުލަބު ލައިސަންސްގެ ކަންކަން ފުރިހަމަކުރަން އެފްއޭއެމުން ދިން މުއްދަތުގައި އެކަންކަންކޮށްފައި ނުވާތީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. މި ސަސްޕެންޝަނުތަކުގެ ސަބަބުން ނިއު އާއި ވިކްޓަރީ މިހާރު ވަނީ ދެވަނަ ޑިވިޝަނަށް ރެލިގޭޓް ވެފައެވެ.

ރާއްޖެ ޓީވީގެ "ކުޅިވަރު ފައިލް" ޕްރޮގްރާމުގައި މީގެ ކުރިން ވާހަކަ ދައްކަވަމުން ބައްސާމް ވިދާޅުވީ ފުރަތަމަ ޑިވިޝަނުގެ ކޮންމެ ކުލަބަކީވެސް އެފްއޭއެމުގެ ރައީސްގެ ހައިސިއްޔަތުން ހަމަހަމަ ކުލަބުތަކެއް ކަމަށާއި، މިއަހަރު އަލަށް ފުރަތަމަ ޑިވިޝަން އަރާ ކުލަބާއި، މާޒީގައި މަޝްހޫރު ކުލަބަކާ ދެމެދު ތަފާތެއް ނުކުރާނެ ކަމަށެވެ.

ބައްސާމް ވިދާޅުވީ އެ ދެ ކުލަބުގެ ސަސްޕެންޝަން އުވާލައި، އެކަމުން ސަލާމަތް ކުރުމަށް އެފްއޭއެމުގެ ރައީސްގެ ހައިސިއްޔަތުން ވަރަށް ގިނަ މަސައްކަތްތަކެއް ކުރެއްވި ކަމަށާއި، ގޮތެއް ނުނިމި އޮތީ އެ ކުލަބުތަކުން އެއްބާރުލުން ނުދިނުމުގެ ސަބަބުން ކަމަށެވެ.

އަދި ބޮޑެތި ނަން މަޝްހޫރު ކުލަބުތަކުން މުބާރާތްތަކުގައި ވާދަކުރާތަން ފެންނަން ބޭނުންވާ ކަމަށާއި، އެހެން ނަމަވެސް ކޮންމެ ކުލަބެއްވެސް ހިންގަން ވާނީ ހެދިފައިވާ ގަވާއިދުތަކާއި އުސޫލުތަކުގެ ތެރެއިން ދައްކަން ޖެހޭ ފައިސާގެ ދަރަންޏެއް އޮތް ނަމަ، އެ ދަރަނި އަދާކޮށްގެން ކަމަށްވެސް ބައްސާމް ވިދާޅުވިއެވެ.

ނިއު އާއި ވިކްޓަރީގެ ދަރަނި އަދާކުރުމަށް ލޯނެއްގެ ގޮތުގައި ކޮންމެވެސް ވަރެއްގެ އެހީއެއް ދިނުމަށް އެފްއޭއެމުން ހުށަހެޅި ކަމަށާއި، އެހެން ނަމަވެސް އެ ކުލަބުތަކުގެ ދަރަނި ބޮޑުކަމުން އެފްއޭއެމުން ދޭ ފައިސާއިން ހައްލުކުރެވޭނެ ގޮތެއް ނެތްއިރު، ނިއުގެ މައްސަލަ އެންމެ ފުރަތަމަ ފެންމަތިވެގެން އައިރު، އޭރު ބިދޭސީ ކުޅުންތެރިޔާއަށް ދޭން އޮތް ފައިސާ އެފްއޭއެމުން ދީގެން އެ މައްސަލަ ހައްލުކުރުމަށް ކުރި މަސައްކަތްވެސް ކޮޅެއްގައި ނުޖެހުނީ ކުޅުންތެރިޔާ އާއި ކުލަބާ އޮތް މައްސަލަ ބޮޑުވެ، ވާހަކަ ނުދެކެވިގެން ކަމަށް ބައްސާމް ވިދާޅުވިއެވެ.

އަދި މިހާރު އޮތް ދަރަންޏައް ބަލާއިރު، ނިއުގެ މައްސަލަ އަކީ އެފްއޭއެމަށްވެސް އަތްފޯރާ ވަރަށް ވުރެން ބޮޑުކޮށް އޮތް މައްސަލައެއް ކަމަށާއި، އެހެން ނަމަވެސް ވިކްޓަރީ އޮތް ދަރަނި މިލިޔަނަކަށްވެސް ނާރާއިރު، އެފްއޭއެމާ ވާހަކަ ދެކެވި، އެ މައްސަލައަށް ހައްލެއް ހޯދޭނެ ވަގުތު އަދިވެސް އެބައޮތް ކަމަށް ބައްސާމް ވިދާޅުވިއެވެ.

މީގެ އިތުރުން ބައްސާމް ވިދާޅުވީ މީގެ ކުރިންވެސް ވިކްޓަރީގެ މައްސަލައަށް ހަލެއް ހޯދުމަށް ގިނަ މަޝްވަރާތަކެއް ކުރި ކަމަށާއި، އެހެން ނަމަވެސް އެފްއޭއެމުން ދޭ ލޯނެއް ނަގަން ވިކްޓަރީގެ މިހާރުގެ ޗެއާމަން ބޭނުންނުވާ ކަމަށާއި، އެހެން ކަމުން އަމިއްލައަށް އެކަން ހައްލުކުރާނެ ކަމަށް އެފްއޭއެމުން ގަބޫލުކޮށްގެން ތިބި ކަމަށެވެ.

ފުޓްބޯޅައިގެ ހުރިހާ ކަމަކުން ނިއު ސަސްޕެންޑް ކުރިއިރު، ނިއުއިން ދިވެހި ކުޅުންތެރިންނަށް މުސާރައިގެ ގޮތުގައި 2.4 މިލިޔަން ރުފިޔާ ދޭން އޭރު ޖެހުނެވެ. އެކަމަކު އެފްއޭއެމުގައި ހުރި ނިއުގެ ފައިސާއިން ދިވެހި ކުޅުންތެރިންނަށް ވަނީ މުސާރަ ދީފައެވެ. އެކަމަކު އަފްޣާނިސްތާނުގެ ޑިފެންޑަރު ހާރޫން އަމީރީއަށް މުސާރައިގެ ގޮތުގައި އަދި އުސޫލުން ބޭރުން އެއްބަސްވުން ބާތިލުކޮށްފައިވާތީ 703،707 (ހަތް ލައްކަ ތިންހާސް ހަތްސަތޭކަ ހަތް) ރުފިޔާ ދޭން ފީފާއިން ވަނީ ނިއުއަށް އަންގާފައެވެ. އަދި ކުރީގެ ކޯޗު ބެނާޑޯ ޓަވަރޭޒަށް 511،342 (ފަސް ލައްކަ އެގާރަހާސް ތިންސަތޭކަ ސާޅީސް ދޭއް) ރުފިޔާ ދޭންވެސް ވަނީ އަންގާފައެވެ. އެކަމަކު ޖޫރިމަނާ އާއެކު މި އަދަދުތައް މިހާރު އެތައް ގުނައެއް ބޮޑުވާނެ ކަމަށް ގަބޫލުކުރެވެއެވެ.