އޮޅުވާލައިގެން އަދާލަތު ޕާޓީއަށް މީހުން ވާއްދާފައިވާ ކަމަށް ބުނާ މައްސަލަ އެ ޕާޓީން ދޮގުކޮށްފި

އަދަލާތު ޕާޓީގެ މެމްބަރަކަށް ވުމަށް ހުށަހަޅާ ފޯމުތައް އިލެކްޝަންސް ކޮމިޝަނަށް ހުށައަޅަމުން އަންނަނީ ސިޔާސީ ޕާޓީތަކުގެ ގާނޫނާ ގަވާއިިދާ އެއްގޮތުގެ މަތިން ފުރިހަމަ ކުރަންޖެހޭ އެންމެހައި އިޖުރާއަތުތައް ފުރިހަމަ ކުރުމަށްފަހު ކަމަށް އެޕާޓީން ބުނެފިއެވެ.

އަދާލަތު ޕާޓީން މިހެން ބުނެފައިވަނީ ޕީޕީއެމްގެ މެންބަރުންތަކެއް އޮޅުވާލައިގެން އަދާލަތު ޕާޓިއަށް ވައްދާފައިވާކަމަށް ތުހުމަތުކޮށް ސޯޝަލް މީޑިއާގައި ޕީޕީއެމުން އާންމުކޮށްފައިވާ ވީޑިއޯއަކާ ގުޅިގެންނެވެ. ޕީޕީއެމުން ވަނީ އޮޅުވާލައިގެން އަދާލަތު ޕާޓީއަށް މެމްބަރުން ވައްދާފައިވާ ކަމަށާއި، "ވަގަށް" ވައްދާފައިވާ މެމްބަރުން ޕާޓީގެ ދަފްތަރުން އުނިކުރުމަށް ގޮވާލާފައެވެ.

ޕީއެންސީގެ ނާއިބު ރައީސް އަދި ހުޅުމާލެ ދާއިރާގެ ކައުންސިލް މެންބަރު އިބްރާހީމް ޝުޖާއު ވިދާޅުވީ، ޕީޕީއެމް ގެ އާއިލާއެއް "ވަގަށް" އަދާލަތު ޕާޓީއަށް ވެއްދިކަމުގެ ޝަކުވާ ލިބިފައިވާ ކަމަށާއި، އެ ފޯމްގައި ޖަހާފައިވާ ފޯނު ނަމްބަރަކީވެސް ވުޖޫދުގައި ނެތް ނަމްބަރެއް ކަމަށެވެ.

ފޯމުގައިވާ އިނގިލީގެ ނިޝާން ދިމާނުވާކަމަށާއި ހީވަނީ ފައިގެ ބޮޑުވާ އިނގިލީގެ ނިޝާނެއްހެންކަމަށްވެސް ޝުޖާއު ވިދާޅުވެފައިވެއެވެ.

މިކަމާ ގުޅިގެން އަދާލަތު ޕާޓީން ބުނީ، ޕާޓީއަށް ލިބޭ ފޯމުތަކުގެ ސައްޚަކަން ޕާޓީން ކަށަވަރުކުރާ ކަމަށެވެ. އަދި މެމްބަރަކު ޕާޓީގެ ދަފްތަރުން އުނިކުރުމަށް އެދިއްޖެނަމަ އެކަންވެސް ކުރާ ކަމަށެވެ.

މިކަމާ ގުޅިގެން އަދާލަތު ޕާޓީގެ މަޝްވަރާ މަޖިލީހުގެ މެމްބަރު ތޫބާ ރަޝީދު ވިދާޅުވީ، މިއީ ޕާޓީގެ އަގުވެއްޓުމަށް ޕީޕީއެމުން ރާވައިގެން ހިންގާ ޖަރީމާއެއް ކަމަށެވެ. މި މައްސަލަ ބެލުމަށްފަހު ފިޔަވަޅު އަޅާނެކަމަށްވެސް އޭނާ ވިދާޅުވިއެވެ.

ޕީޕީއެމުން ދަނީ އެ ޕާޓީގެ މެމްބަރުން އެހެން ޕާޓީތަކަށް ވައްދާކަމަށް ތުހުމަތު ކުރަމުންނެވެ. އަދި އެކަން ބެލުމަށް ކޯޓަށް މައްސަލަ ހުށައަޅާނެ ކަމަށްވެސް ޕީޕީއެމުންވަނީ ބުނެފައެވެ.