ލީގު ބުރުގެ ފަހު މެޗުގައި ސޮކަރ މޭޓްސްއަށް މޮޅެއް

އެފްއޭއެމް ވެޓަރެންސް ލީގުގައި ކުޅުނު ލީގު ބުރުގެ ފަހު މެޗުން މޯލްޑިވްސް ސޮކަރ މޭޓްސް މޮޅުވެއްޖެއެވެ.

ލީގު ބުރުގެ ފަހު މެޗުގައި ބައްދަލުކުރީ ސޮކަރ މޭޓްސްއާއި ކްލަބް އީގަލްސްއެވެ. ސޮކަރ މޭޓްސްއިން މެޗު ކާމިޔާބުކުރީ 2-0ންނެވެ. ހަމަހަމަ ކުޅުމެއް ފެނުނު މި މެޗުގައި ސޮކަރ މޭޓްސްއިން ދެލަނޑުވެސް ޖެހީ ދެވަނަ ހާފުގައެވެ. ފުރަތަމަ ލަނޑު ޖަހައި ސޮކަރ މޭޓްސްއަށް ލީޑު ނަގައިދިނީ އިސްމާއީލް އަނިލްއެވެ. ސޮކަރ މޭޓްސްއަށް ލީޑު ފުޅާކޮށްދިނީ އަހުމަދު އަފުރާދުއެވެ.

މުބާރާތުގެ ލީގު ބުރުގެ ހުރިހާ މެޗެއް ނިމުނުއިރު އެއްވަނައަށް ދިޔައީ ހުޅުމާލެ ވެޓަރެންސްއެވެ. އެއީ ދެވަނައަށް ދިޔަ ސޮކަރ މޭޓްސްއާ އެއްވަރަށް 14 ޕޮއިންޓް ހޯދައިގެންނެވެ. އަންނަ ހޮނިހިރު ދުވަހު ކުޅޭ ފައިނަލުގައި ވާދަކުރާނީ ސޮކަރ މޭޓްސްއާއި ހުޅުމާލެ ވެޓަރެންސްއެވެ.

ތިންވަނައަށް ދިޔައީ 10ޕޮއިންޓް ހޯދި ދަ ގްރާންޑޭ ސްޕޯޓްސް ކްލަބެވެ. ހަތަރު ވަނަ ހޯދި ދިވެހި ސިފައިންގެ ކްލަބާއި ފަސް ވަނަ ހޯދި ކްލަބް ގްރީން ސްޓްރީޓްސްއަށް ވަނީ ހަތް ޕޮއިންޓް ލިބިފައެވެ. ހަވަނައަށް ދިޔަ އީގަލްސްއަށް ވަނީ ފަސް ޕޮއިންޓް ލިބިފައެވެ. އެންމެ ފުލަށް ދިޔަ ޕޮލިސް ވަނީ ކުޅުނު ހުރިހާ މެޗަކުން ބަލިވެފައެވެ.

އެފްއޭއެމާ ގުޅިގެން ކްލަބް އިވެންޓްސްއިން މިފަހަރުގެ މުބާރާތް އިންތިޒާމުކުރާއިރު، މުބާރާތް އަލުން ބާއްވަންފަށާފައި މިވަނީ ތިން އަހަރުގެ މެދުކެނޑުމަކަށްފަހުއެވެ. 40 އަހަރުން މަތީގެ ކުޅުންތެރިންނަށް ޚާއްސަކޮށްފައިވާ މުބާރާތުގައި މިފަހަރު 7 ޓީމު ވާދަކުރެއެވެ. ކޮންމެ ޓީމެއްގައިވެސް 35 އަހަރުން މަތީގެ ދެ ކުޅުންތެރިން ހިމަނަން ފުރުސަތު ލިބެއެވެ.